హరి తల్లిదండ్రులకు 'తానా' భరోసా…
అలాస్కా గడ్డపై ఆగని గాలింపు చర్యలు.
టెక్నాలజీతో ప్రాణ రక్షణ..
అలాస్కాలో అదృశ్యమైన ఎన్నారై హరి ఆచూకీ కోసం ఉత్తర అమెరికా తెలుగు సంఘం (తానా) నాయకులు చేస్తున్న అన్వేషణ వివరాలను తానా ఇంటర్నేషనల్ కో-ఆర్డినేటర్ కృష్ణప్రసాద్ సోంపల్లి హరి తల్లితండ్రులకు, బంధువులకు వివరించారు.
హ్యూస్టన్లో నివసిస్తున్న ప్రకాశం జిల్లా అద్దంకికి చెందిన కరసాని హరి డిసెంబరు 22న అలాస్కా పర్యటనకు వెళ్లి అదృశ్యమైన సంగతి తెలిసిందే. తానా అధ్యక్షుడు సరేన్ కొడాలి, అంతర్జాతీయ విద్యార్థుల సమన్వయకర్త డాక్టర్ ఉమా ఆర్.కటికి సూచన మేరకు సంతమాగులూరులో నివసిస్తున్న హరి కుటుంబాన్ని ప్రసాద్ సోంపల్లి సందర్శించారు.
హరి తల్లిదండ్రులను, అతని సన్నిహితులను కలిశారు. తానా ప్రతి సంవత్సరం అనేక కేసులను పరిష్కరిస్తోందని తెలిపారు. ఉభయ తెలుగు రాష్ట్రాల ప్రజలకు సహాయం చేస్తుంటుందని చెప్పారు. కానీ ఈ కేసు ప్రత్యేకమైనది కావడంతో తాము అన్ని విధాలుగా చర్యలు చేపట్టినట్టు వివరించారు. అలాస్కాలో ముఖ్యంగా అక్టోబరు నుంచి ఏప్రిల్ వరకు వాతావరణ పరిస్థితులు అధ్వానంగా ఉంటాయని తెలిపారు.
అమెరికాలో ఆంధ్రప్రదేశ్ ప్రభుత్వ ప్రత్యేక ప్రతినిధిగా నియమితులైన కోమటి జయరాం సహాయంతో ఏపీ ప్రభుత్వం అమెరికా, అలాస్కా ప్రభుత్వానికి ఈ అన్వేషణలో సహాయపడమని సిఫార్సు లేఖలను జారీ చేసిందని చెప్పారు. విదేశాల్లో నివసిస్తున్న తమవారి కోసం, తల్లితండ్రులు, విద్యార్థులు తమ ప్రియమైన వ్యక్తిని ట్రాక్ చేయడంలో టెక్నాలజీని సద్వినియోగం చేసుకోవాలన్నారు, ఆపిల్ ప్రొడక్ట్ ఎయిర్ ట్యాగ్ స్పెషాలిటీ గురించి లోతుగా వివరించారు. హరి కరసాని ఆచూకీ లభించే వరకూ అలాస్కా ప్రభుత్వ కృషి ఆగదని చెప్పారు.
అమెరికాలో నివసిస్తున్న తమవారి పట్ల ఎక్కువ శ్రద్ధ వహించాలని ఆయన తల్లిదండ్రులను కోరారు. తల్లిదండ్రులందరూ తమ పిల్లలతో ప్రతిరోజూ మాట్లాడాలని సూచించారు. అమెరికాలో ఉండేవారు కూడా ఎంత బిజీగా ఉన్నప్పటికీ భారత్లోని తమ తల్లితండ్రులతో, బంధువులతో రోజూ మాట్లాడుతూనే ఉండాలని కోరారు. తానా చేస్తున్న సేవా కార్యక్రమాలను వివరిస్తూ... అమెరికాలో ఉన్నవారు ఏదైనా సలహా కావాల్సివస్తే 1-855-687-8262 లేదా 855-OUR-TANAకు కాల్ చేయాలని సూచించారు.
