Nora Fatehi Controversy: వెండితెరపై గ్లామర్ ఒలికించడం వేరు, అశ్లీలతను ప్రదర్శించడం వేరు. ఇప్పుడు ఇదే అంశం 'కేడీ: ద డెవిల్' సినిమాలోని 'సర్కే చునర్' పాట రూపంలో పెను దుమారం రేపుతోంది. ఈ వివాదం పార్లమెంటు గడప తొక్కి, ఏకంగా పాటపై నిషేధం విధించే స్థాయికి చేరడంతో, ఇప్పటివరకు మౌనంగా ఉన్న నోరా ఫతేహి ఎట్టకేలకు నోరు విప్పారు. అయితే, ఆమె ఇచ్చిన వివరణ ఇప్పుడు చిత్ర పరిశ్రమలో కొత్త చర్చకు తెరలేపింది. తనపై వస్తున్న విమర్శల నుంచి తప్పించుకోవడానికి ఆమె ఏకంగా దర్శకుడినే టార్గెట్ చేయడం గమనార్హం.
నోరా ఫతేహి వాదన ప్రకారం.. ఆమె కేవలం కన్నడ వెర్షన్ కోసం మాత్రమే సంతకం చేశారు. కానీ, మేకర్స్ ఆమెకు తెలియకుండానే హిందీలో అత్యంత అసభ్యకరమైన పదజాలంతో పాటను విడుదల చేశారట. "హిందీ వెర్షన్లో నా అనుమతి లేకుండానే నా ఇమేజ్ను వాడుకున్నారు" అని ఆమె అనడం చూస్తుంటే, డబ్బింగ్ సినిమాల విషయంలో నటీనటులకు దర్శకులకు మధ్య ఉండాల్సిన కమ్యూనికేషన్ గ్యాప్ స్పష్టంగా కనిపిస్తోంది. కేవలం గ్లామర్ కోసమే తనను వాడుకుని, వివాదం రాగానే ఒంటరిని చేశారనేది నోరా ప్రధాన ఆరోపణ.
సాధారణంగా ఏదైనా వివాదం తలెత్తినప్పుడు అందరి దృష్టి గ్లామర్ డాల్గా ఉన్న నటిపైనే ఉంటుంది. దీనిని నోరా తీవ్రంగా ఖండించారు. "తప్పు చేసింది దర్శకుడు అయితే, నా క్యారెక్టర్ను ఎందుకు టార్గెట్ చేస్తున్నారు?" అని ఆమె ప్రశ్నించారు. ఈ రచ్చకు కారణమైన దర్శకుడు ప్రేమ్ ఫోటోలను వాడాలని, అప్పుడే వారికి బుద్ధి వస్తుందని ఆమె చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి. ఒక రకంగా చెప్పాలంటే, తప్పు చేసిన మేకర్స్ను వదిలేసి, తెరపై కనిపించే వారిని బలిపశువులను చేయవద్దని ఆమె గట్టిగానే హెచ్చరించారు.
ప్రజల నుంచి వస్తున్న తీవ్ర నిరసనలు, రాజకీయ నేతల హెచ్చరికల నేపథ్యంలో చిత్ర యూనిట్ ఇప్పటికే ఆ పాటను యూట్యూబ్ నుండి తొలగించింది. ఈ విజయాన్ని నోరా తన ఖాతాలో వేసుకునే ప్రయత్నం చేశారు. ప్రజల ఒత్తిడి వల్లే ఈ మార్పు సాధ్యమైందని, అశ్లీలతను తాను ఎప్పటికీ ప్రోత్సహించనని ఆమె స్పష్టం చేశారు. అయితే, షూటింగ్ సమయంలోనే ఆ పాట తీరుపై ఆమెకు అభ్యంతరాలు ఉన్నాయా? లేదా వివాదం ముదిరాకే ఆమె స్పందిస్తున్నారా? అన్నది ఇప్పుడు మిలియన్ డాలర్ల ప్రశ్న.
ఈ వివాదం కేవలం ఒక నటికి లేదా ఒక సినిమాకు సంబంధించింది మాత్రమే కాదు. పాన్ ఇండియా సినిమాల పేరుతో భాషా పరిమితులు దాటి అశ్లీలతను జొప్పించడం ఎంత ప్రమాదకరమో ఈ ఘటన నిరూపించింది. లిరిక్ రైటర్ రకీబ్ ఆలం సైతం దర్శకుడి ఒత్తిడి వల్లే బూతులు రాయాల్సి వచ్చిందని ఒప్పుకోవడం చూస్తుంటే, క్రియేటివ్ ఫ్రీడమ్ పేరుతో మేకర్స్ హద్దులు దాటుతున్నారని స్పష్టమవుతోంది. భవిష్యత్తులో ఇలాంటి సంఘటనలు పునరావృతం కాకుండా ఉండాలంటే, సెన్సార్ బోర్డుతో పాటు నటీనటులు కూడా కథాంశంపై మరింత అప్రమత్తంగా ఉండాల్సిన అవసరం ఉంది.
