తగ్గుతున్న విమానయాన భారం..
ప్రధాన విమానాశ్రయాల్లో రుసుముల కోత…
విమాన టికెట్ల ధరలు తగ్గే ఛాన్స్…
కేంద్రం మార్క్ నిర్ణయంతో ప్రయాణికులకు ఊరట…
Aviation India: దేశంలోని విమాన ప్రయాణికులకు కేంద్ర ప్రభుత్వం తీపి కబురు అందించింది. విమాన ప్రయాణాన్ని సామాన్యులకు మరింత చేరువ చేయడంతో పాటు, విమానయాన రంగంపై భారాన్ని తగ్గించే లక్ష్యంతో ప్రధాన విమానాశ్రయాల్లో కొన్ని రకాల చార్జీలను 25 శాతం వరకు తగ్గించాలని కేంద్రం ఆదేశాలు జారీ చేసింది. అంతర్జాతీయ ప్రమాణాలకు అనుగుణంగా విమానాశ్రయ నిర్వహణ ఖర్చులను క్రమబద్ధీకరించడంలో భాగంగా ఈ నిర్ణయం తీసుకున్నట్లు పౌర విమానయాన మంత్రిత్వ శాఖ వర్గాలు వెల్లడించాయి.
ప్రధానంగా మెట్రో నగరాల్లోని విమానాశ్రయాల్లో విమాన సంస్థలు చెల్లించే ల్యాండింగ్, పార్కింగ్ మరియు ఇతర సాంకేతిక రుసుములపై ఈ తగ్గింపు వర్తించనుంది. ఈ నిర్ణయం వల్ల విమానయాన సంస్థల నిర్వహణ వ్యయం గణనీయంగా తగ్గే అవకాశం ఉంది. ఆ ప్రయోజనాన్ని ప్రయాణికులకు బదిలీ చేయడం ద్వారా విమాన టికెట్ల ధరలు కూడా తగ్గే అవకాశం ఉందని విశ్లేషకులు భావిస్తున్నారు. విమానయాన రంగం కోవిడ్ తదుపరి కాలంలో వేగంగా పుంజుకుంటున్న తరుణంలో ప్రభుత్వ తీసుకున్న ఈ నిర్ణయం ఎంతో ప్రాధాన్యత సంతరించుకుంది.
విమానాశ్రయాల అభివృద్ధి సంస్థ (AAI) మరియు ప్రైవేట్ భాగస్వామ్యంతో నడిచే విమానాశ్రయాలన్నింటికీ ఈ నూతన మార్గదర్శకాలు వర్తించనున్నాయి. పౌర విమానయాన రంగంలో పోటీని పెంచడం మరియు విమానాశ్రయాలను గ్లోబల్ హబ్స్గా తీర్చిదిద్దే వ్యూహంలో భాగంగా ఈ తగ్గింపును అమలు చేస్తున్నారు. తక్షణమే ఈ ఆదేశాలను అమలు చేయాలని, దీనికి సంబంధించి తీసుకున్న చర్యలపై నివేదిక సమర్పించాలని విమానాశ్రయాల యాజమాన్యాలకు కేంద్రం దిశానిర్దేశం చేసింది.
