ప్రముఖ ఆటోమొబైల్ దిగ్గజం మహీంద్రా అండ్ మహీంద్రా (M&M) 2026 సంవత్సరాన్ని అమ్మకాల పరంగా ఘనంగా ప్రారంభించింది. 2026 జనవరి నెలలో ఎగుమతులతో కలిపి మొత్తం 1,04,309 వాహనాలను విక్రయించినట్లు కంపెనీ అధికారికంగా వెల్లడించింది. గతేడాది జనవరిలో నమోదైన అమ్మకాలతో పోలిస్తే ఇది 24 శాతం వృద్ధి కావడం విశేషం. మార్కెట్లో డిమాండ్ పెరుగుతుండటం, కొత్త మోడళ్లకు వస్తున్న స్పందన కంపెనీకి బలమైన ప్రారంభాన్ని అందించింది.
వివరాల్లోకి వెళ్తే, ఎస్యూవీ (SUV) సెగ్మెంట్లో మహీంద్రా తన ఆధిపత్యాన్ని కొనసాగిస్తోంది. దేశీయ మార్కెట్లో ఎస్యూవీ అమ్మకాలు 25 శాతం వృద్ధితో 63,510 యూనిట్లకు చేరాయి. వినియోగదారుల అభిరుచులకు అనుగుణంగా డిజైన్, టెక్నాలజీ, సేఫ్టీ ఫీచర్లతో వచ్చిన వాహనాలు ఈ వృద్ధికి ప్రధాన కారణంగా నిలిచాయి. అదే సమయంలో, వాణిజ్య వాహనాల అమ్మకాలు కూడా 22 శాతం పెరిగి 27,656 యూనిట్లుగా నమోదయ్యాయి. ఎగుమతుల పరంగా కూడా కంపెనీ మంచి ప్రదర్శన కనబరిచింది. జనవరిలో 3,577 వాహనాలను ఎగుమతి చేయగా, ఇది గతేడాదితో పోలిస్తే 5 శాతం అధికం.
ఈ అమ్మకాలపై స్పందించిన మహీంద్రా ఆటోమోటివ్ డివిజన్ సీఈఓ నళినీకాంత్ గొల్లగుంట, “గత ఏడాది సాధించిన వృద్ధి ఊపును కొనసాగిస్తూ 2026ను బలంగా ప్రారంభించాం” అని తెలిపారు. జనవరి 14న విడుదల చేసిన XUV 7XO, XEV 9S మోడళ్లకు మార్కెట్ నుంచి అద్భుత స్పందన లభించిందన్నారు. కేవలం 4 గంటల్లోనే రూ.20,500 కోట్ల విలువైన 93,689 బుకింగ్స్ రావడం ఒక రికార్డ్ అని పేర్కొన్నారు. ఇది బ్రాండ్పై వినియోగదారుల విశ్వాసానికి నిదర్శనమని స్పష్టం చేశారు.
ఇతర విభాగాల్లోనూ మహీంద్రా మెరుగైన పనితీరును కొనసాగిస్తోంది. త్రీ-వీలర్ అమ్మకాలు 28 శాతం పెరిగి 9,566 యూనిట్లకు చేరాయి. అలాగే, తేలికపాటి వాణిజ్య వాహనాల (LCV) అమ్మకాలు 23 శాతం వృద్ధిని నమోదు చేశాయి. ఇప్పటికే డిసెంబర్ 2025లో రికార్డు స్థాయి అమ్మకాలు సాధించిన మహీంద్రా, 2026లోనూ అదే జోరును కొనసాగిస్తోంది. ఈ గణాంకాలన్నీ తమ SUV-కేంద్రిత వ్యూహం విజయవంతమైందని, కస్టమర్లలో మహీంద్రాపై విశ్వాసం మరింత పెరిగిందని కంపెనీ పేర్కొంది.
