ఆంధ్రప్రదేశ్‌ను విదేశీ పెట్టుబడుల కేంద్రంగా మార్చే దిశగా ముఖ్యమంత్రి చంద్రబాబు నాయుడు మరొక కీలక అడుగు వేశారు. తాజాగా సింగపూర్ నగరంలో భారత హైకమిషనర్ శిల్పక్ అంబులేతో సీఎం సమావేశమయ్యారు. ఈ సందర్భంగా రాష్ట్రంలో ఉన్న పెట్టుబడి అవకాశాలు, అనుకూల పాలసీల గురించి వివరిస్తూ, సింగపూర్‌తో వ్యాపార సంబంధాలను మరింత బలోపేతం చేయాలన్న ఉద్దేశాన్ని వ్యక్తం చేశారు.
‘‘ఇండియాకు విదేశీ పెట్టుబడులు రావాలి. వాటికి గేట్వే రాష్ట్రంగా ఆంధ్రప్రదేశ్ పనిచేస్తుంది’’ అని సీఎం స్పష్టం చేశారు. ప్రత్యేకంగా సింగపూర్ పెట్టుబడులు ఆకర్షించేందుకు అనుకూల వాతావరణాన్ని రాష్ట్రంలో తాము సృష్టిస్తున్నామని తెలిపారు. రాయలసీమ ప్రాంతాన్ని పరిశ్రమల అభివృద్ధికి ప్రధాన కేంద్రంగా తీర్చిదిద్దుతున్నామని పేర్కొన్నారు.
రాయలసీమలో ఏరోస్పేస్, ఆటోమొబైల్, ఎలక్ట్రానిక్స్, డిఫెన్స్ రంగాలకు అనుకూల మౌలిక వసతులు ఉన్నాయని తెలిపారు. ఇప్పటికే ఈ ప్రాంతంలో పరిశ్రమల కోసం అవసరమైన భూములు, నైపుణ్య శక్తి, ఎంసీఏ మాదిరి అనేక మద్దతు విధానాలను సిద్ధం చేసినట్లు చెప్పారు.
ఇక గ్రీన్ ఎనర్జీ రంగంలో 160 గిగావాట్ల విద్యుత్ ఉత్పత్తి లక్ష్యంగా రాష్ట్రం ముందుకెళ్తుందని పేర్కొన్నారు. ఇదే సమయంలో అమరావతిలో క్వాంటం వ్యాలీ ఏర్పాటు చేస్తున్నామని, ఇది భవిష్యత్తులో ఆంధ్రప్రదేశ్‌కు గ్లోబల్ టెక్నాలజీ హబ్‌గా మారేందుకు దోహదం చేస్తుందని తెలిపారు.
చంద్రబాబు ఈ సమావేశంలో అభివృద్ధి లక్ష్యాలు, వృద్ధికి అనుగుణంగా తీసుకుంటున్న చర్యల గురించి వివరించారు. రాష్ట్రాన్ని పెట్టుబడులకు అత్యంత ఆకర్షణీయ గమ్యంగా తీర్చిదిద్దేందుకు ప్రభుత్వం కట్టుదిట్టమైన వ్యూహాలతో ముందుకు సాగుతోందని ఆయన తెలిపారు.
