Petrol saving tips: పశ్చిమ ఆసియాలో పెరుగుతున్న ఉద్రిక్తతలు, ప్రపంచవ్యాప్తంగా నెలకొన్న చమురు సంక్షోభం నేపథ్యంలో దేశ ఇంధన భద్రతపై ప్రధాని నరేంద్ర మోదీ స్పందించారు. గతంలో కరోనా సమయంలో ఎదుర్కొన్న సవాళ్లను గుర్తు చేస్తూ, ప్రస్తుత పరిస్థితుల్లో ప్రజలంతా అప్రమత్తంగా ఉండాలని ఆయన పిలుపునిచ్చారు. అనవసరపు పుకార్లను నమ్మవద్దని, ఇంధన పొదుపు విషయంలో జాగ్రత్తగా ఉండాలని సూచించారు. మన పొరుగు దేశాలైన శ్రీలంక, బాంగ్లాదేశ్ వంటి చోట్ల ఇప్పటికే విద్యుత్ కోతలు, పని దినాల తగ్గింపు వంటి చర్యలు చేపట్టిన నేపథ్యంలో, భారతీయులు కూడా తమ డ్రైవింగ్ అలవాట్లను మార్చుకోవడం ద్వారా పెట్రోల్ ఖర్చులను తగ్గించుకోవచ్చని నిపుణులు చెబుతున్నారు.
మనం డ్రైవ్ చేసే విధానం కొద్దిగా మార్చుకుంటే కార్లు, బైక్ల మైలేజీని గణనీయంగా పెంచుకోవచ్చు. వాహనాన్ని ఒక్కసారిగా వేగంగా పోనివ్వడం లేదా సడన్ బ్రేకులు వేయడం వల్ల ఇంజిన్పై ఒత్తిడి పడి ఎక్కువ ఇంధనం ఖర్చవుతుంది. అలా కాకుండా, నిలకడైన వేగంతో ప్రయాణించడం ఉత్తమం. ముఖ్యంగా సిటీ ట్రాఫిక్లో ముందు వెళ్తున్న వాహనాలను గమనిస్తూ, అనవసరంగా రేస్ చేయకుండా డ్రైవ్ చేస్తే పెట్రోల్ ఆదా అవుతుంది. ట్రాఫిక్ సిగ్నల్స్ వద్ద నిరీక్షణ సమయం ఎక్కువగా ఉన్నప్పుడు ఇంజిన్ ఆఫ్ చేయడం వల్ల అనవసరంగా ఇంధనం వృథా కాకుండా చూసుకోవచ్చు.
వాహనం కండిషన్ కూడా మైలేజీని నేరుగా ప్రభావితం చేస్తుంది. టైర్లలో గాలి తక్కువగా ఉంటే రోడ్డుపై ఘర్షణ పెరిగి ఇంజిన్ ఎక్కువ కష్టపడాల్సి వస్తుంది. దీనివల్ల మైలేజీ పడిపోతుంది. అందుకే క్రమం తప్పకుండా టైర్ ప్రెషర్ చెక్ చేయించుకోవాలి. అలాగే ఎయిర్ ఫిల్టర్లు శుభ్రంగా ఉంచుకోవడం, సరైన సమయంలో ఇంజిన్ ఆయిల్ మార్చడం వంటి చిన్న చిన్న పనుల వల్ల వాహనం పనితీరు మెరుగుపడుతుంది. సర్వీసింగ్ సరిగ్గా ఉంటే తక్కువ పెట్రోల్తో ఎక్కువ దూరం ప్రయాణించే అవకాశం ఉంటుంది.
చాలామంది తమ కార్లలో అనవసరమైన సామాన్లను వేసుకుని తిరుగుతుంటారు. బూట్ స్పేస్లో అనవసర బరువు పెరిగితే అది మైలేజీని తగ్గిస్తుంది. కాబట్టి కారులో అదనపు బరువు లేకుండా చూసుకోవడం మంచిది. అలాగే బయటకు వెళ్ళేటప్పుడు పనులన్నింటినీ ఒకేసారి ప్లాన్ చేసుకుంటే, పదేపదే వాహనాన్ని తీయాల్సిన అవసరం ఉండదు. తద్వారా ఇంధనంతో పాటు సమయం కూడా ఆదా అవుతుంది. పీక్ అవర్స్ (ట్రాఫిక్ ఎక్కువగా ఉన్న సమయం)లో ప్రయాణాలను వీలైనంత వరకు తగ్గించుకోవడం కూడా ఒక మంచి పద్ధతి.
ప్రపంచ పరిస్థితులు ఎలా ఉన్నా, ఒక బాధ్యతాయుతమైన పౌరుడిగా మన చేతుల్లో ఉన్న ఆదా మార్గాలను పాటించడం అవసరం. డ్రైవింగ్ అలవాట్లలో చిన్న మార్పులు చేసుకోవడం వల్ల నెలకు అయ్యే పెట్రోల్ ఖర్చును మనం సులభంగా తగ్గించుకోవచ్చు. ఇంధన పొదుపు కేవలం మన జేబుకే కాదు, దేశ ఆర్థిక వ్యవస్థకు కూడా ఎంతో మేలు చేస్తుంది. కాబట్టి సంక్షోభం వచ్చాక బాధపడటం కంటే, ఇప్పుడే అప్రమత్తంగా ఉండి పొదుపు మంత్రం పాటించడం శ్రేయస్కరం.
