వారణాసిలో జరిగిన కార్యక్రమంలో పీఎం కిసాన్ సమ్మాన్ నిధి నిధులను విడుదల చేసిన అనంతరం ప్రధానమంత్రి నరేంద్ర మోదీ ప్రసంగించారు. తన ప్రసంగంలో ఆయన ఇటీవల జరిగిన కొన్ని ఘటనలను ప్రస్తావించారు. 'ఆపరేషన్ సిందూర్' తర్వాత తాను మొదటిసారి కాశీకి వచ్చానని చెప్పారు.
పహల్గాంలో ఉగ్రవాదులు 26 మంది అమాయకులను కిరాతకంగా చంపేశారని, ఆ దాడిలో మహిళలు తమ సిందూరం కోల్పోయారని, వారి ఆక్రందనలు తనను కలచివేశాయని అన్నారు. ఆపరేషన్ సిందూర్‌తో పహల్గాం ఉగ్రదాడికి ప్రతీకారం తీర్చుకున్నామని, ఇది మన సైన్యం పరాక్రమానికి ప్రతీక అని మోదీ పేర్కొన్నారు.
రైతులకు లబ్ధి చేకూరుస్తున్న ప్రభుత్వం.. అనంతరం, రైతు సంక్షేమం గురించి ప్రసంగిస్తూ, కాంగ్రెస్ మరియు సమాజ్‌వాదీ పార్టీ నేతలు అసత్యాలతో ప్రజలను పక్కదారి పట్టించాలని చూస్తున్నారని ఆరోపించారు. తమ ప్రభుత్వ పథకాలతో రైతులకు అత్యంత ప్రయోజనం చేకూరుస్తున్నామని, రైతుల కోసం రూ.21 వేల కోట్లు నిధులు విడుదల చేశామని చెప్పారు.
రైతులను ఆదుకునేందుకు తమ ప్రభుత్వం అనేక పథకాలు తీసుకొచ్చిందని, రైతుల సంక్షేమం కోసం అహర్నిశలు పనిచేస్తున్నామని స్పష్టం చేశారు. గత ప్రభుత్వాలు రైతులకు ఎన్నో హామీలు ఇచ్చి ఒక్కటీ అమలు చేయలేదని, కానీ తాము ఇచ్చిన హామీల కంటే ఎక్కువే ఇస్తున్నామని అన్నారు. తమ ప్రభుత్వ దృఢ సంకల్పానికి పీఎం కిసాన్ సమ్మాన్ నిధి పథకమే నిదర్శనమని చెప్పారు.
దుష్ప్రచారాలను నమ్మవద్దు.. సమాజ్‌వాదీ పార్టీ, కాంగ్రెస్ నేతలు చేసే అసత్య ప్రచారాలను నమ్మవద్దని మోదీ ప్రజలను కోరారు. ఎన్డీయే ప్రభుత్వం అందిస్తున్న సంక్షేమాన్ని చూసి ఓర్వలేకే వారు దుష్ప్రచారం చేస్తున్నారని విమర్శించారు.
ఇప్పటి వరకు ఆపకుండా రైతుల ఖాతాల్లో పీఎం కిసాన్ సమ్మాన్ నిధి డబ్బులు జమచేస్తున్నామని, ఈ పథకం కింద ఇప్పటి వరకు రైతుల ఖాతాల్లో రూ.3.75 లక్షల కోట్లు జమ చేశామని తెలిపారు. ఒక్క కాశీలోని రైతుల ఖాతాలకే రూ.900 కోట్లు నిధులు విడుదల చేశామని ప్రధానమంత్రి మోదీ వివరించారు.
19వ విడత డబ్బు ఖాతాలో జమయ్యిందా? తెలుసుకోండిలా..
ముందుగా పీఎం కిసాన్ అధికారిక వెబ్సైట్ https://pmkisan gov.in/ కి వెళ్లాలి.
కుడి వైపున కనిపిస్తున్న ఆప్షన్లలో బెనిఫిషియరీ స్టేటస్ ఆప్షన్ ఉంటుంది.
సెలక్ట్ చేసుకున్న తర్వాత ఖాతా నెంబరును ఎంటర్ చేస్తే ఓటీపీ వస్తుంది. దాన్ని ఎంటర్ చేసిన తర్వాత 'గెట్ డేటా' పై క్లిక్ చేయాలి.
స్టేటస్ స్క్రీన్పై కనిపిస్తుంది. ఒకవేళ మీరు పీఎం కిసాన్కు రిజిస్టర్ చేసుకొని, ఈ-కేవైసీ పూర్తిచేసి ఉంటే ఖాతాలోకి డబ్బు జమవుతుంది.
అలాగే లబ్ధిదారుల జాబితాలో పేరు ఉందో.. లేదో.. కూడా చెక్ చేసుకోవచ్చు.
బెనిఫిషియరీ స్టేటస్ కింద బెనిఫిషియరీ లిస్ట్ ఆప్షన్ కనిపిస్తుంది.
ఈ ఆప్షన్పై క్లిక్ చేస్తే మరొక పేజీకి రీడైరెక్ట్ అవుతుంది.
ఇక్కడ లబ్ధిదారుడి రాష్ట్రం, జిల్లా, ఉప జిల్లా, బ్లాక్, గ్రామాలను ఎంచుకొని 'గెట్ రిపోర్ట్'పై క్లిక్ చేస్తే లబ్ధిదారుల జాబితా కనిపిస్తుంది.
పీఎం కిసాన్ హెల్ప్ లైన్ నెంబరు 155261 / 011-24300606 కు కాల్ చేసి కూడా సమాచారం తెలుసుకోవచ్చు.
