జాతీయ రహదారులపై ప్రయాణించే వాహనదారులకు కేంద్ర ప్రభుత్వం ఒక ముఖ్యమైన అప్డేట్ ఇచ్చింది. సాధారణంగా పండుగలు లేదా సెలవు దినాల్లో టోల్ ప్లాజాల వద్ద కిలోమీటర్ల మేర ట్రాఫిక్ జామ్ అవ్వడం మనం చూస్తుంటాం. దీనికి ప్రధాన కారణం ఫాస్టాగ్ ఉన్నప్పటికీ, చాలా మంది ఇంకా నగదు (Cash) చెల్లించి టోల్ దాటడానికి ప్రయత్నించడమే. ఈ సమస్యకు శాశ్వత పరిష్కారం చూపిస్తూ, కేంద్ర రోడ్డు రవాణా మరియు రహదారుల మంత్రిత్వ శాఖ కీలక నిర్ణయం తీసుకుంది.
దీనికి సంబంధించిన పూర్తి వివరాలు మరియు ప్రయాణీకులు తీసుకోవాల్సిన జాగ్రత్తలు ఇక్కడ ఉన్నాయి. కేంద్ర రోడ్డు రవాణా శాఖ కార్యదర్శి ఉమాశంకర్ వెల్లడించిన వివరాల ప్రకారం, ఏప్రిల్ 1 నుంచి దేశవ్యాప్తంగా అన్ని టోల్ ప్లాజాల వద్ద నగదు చెల్లింపులను పూర్తిగా నిలిపివేయనున్నారు. హైవే టోలింగ్ వ్యవస్థను పూర్తిగా డిజిటల్ మయం చేయడమే లక్ష్యంగా ఈ నిర్ణయం తీసుకున్నారు.
ఇకపై టోల్ ప్లాజా దాటాలంటే వాహనదారుడి దగ్గర ఫాస్టాగ్ (FASTag) ఉండాలి లేదా అక్కడికక్కడే యూపీఐ (UPI) ద్వారా చెల్లింపు చేయాలి. ఈ రెండు కాకుండా నగదు ఇస్తామంటే సిబ్బంది అంగీకరించరు.
ఎందుకీ కఠిన నిర్ణయం?
చాలా మంది వాహనదారులు ఫాస్టాగ్ తమ కారుకు ఉన్నప్పటికీ, అందులో బ్యాలెన్స్ లేకపోవడమో లేదా ఇతర కారణాల వల్ల నగదు చెల్లించేందుకే మొగ్గు చూపుతున్నారు. ఒక్కరు నగదు చెల్లించాలన్నా సిబ్బందికి చిల్లర ఇవ్వడం, రశీదు ఇవ్వడానికి సమయం పడుతుంది. ఇది వెనుక ఉన్న వందలాది వాహనాలు నిలిచిపోవడానికి కారణమవుతోంది. డిజిటల్ చెల్లింపుల వల్ల టోల్ వసూళ్లలో పారదర్శకత పెరుగుతుంది. ఫాస్టాగ్ ద్వారా వాహనం ఆపకుండానే టోల్ వసూలు అవుతుంది, దీనివల్ల ఇంధనం మరియు సమయం రెండూ ఆదా అవుతాయి.
వాహనదారులు తీసుకోవాల్సిన జాగ్రత్తలు ఏమిటి.?
కొత్త రూల్స్ అమలులోకి వచ్చేలోపు వాహనదారులు ఈ క్రింది విషయాలను గమనించాలి:
మీ వాహనానికి ఉన్న ఫాస్టాగ్ యాక్టివ్గా ఉందో లేదో ఇప్పుడే సరిచూసుకోండి.
ప్రయాణానికి ముందే మీ ఫాస్టాగ్ వాలెట్లో తగినంత నగదు ఉండేలా చూసుకోండి. బ్యాలెన్స్ లేకపోతే టోల్ గేట్ వద్ద ఇబ్బందులు ఎదురవుతాయి.
మీ ఫాస్టాగ్ కేవైసీ అప్డేట్ అయ్యిందో లేదో చూసుకోండి, లేదంటే అది బ్లాక్ అయ్యే అవకాశం ఉంది.
కేంద్ర ప్రభుత్వం తీసుకున్న ఈ నిర్ణయం వల్ల భవిష్యత్తులో టోల్ ప్లాజాల వద్ద రద్దీ ఉండదని అధికారులు ఆశిస్తున్నారు. డిజిటల్ చెల్లింపులు అలవాటు చేసుకోవడం ద్వారా మన ప్రయాణాన్ని మరింత సాఫీగా మరియు సురక్షితంగా మార్చుకోవచ్చు. కాబట్టి ఏప్రిల్ 1 కంటే ముందే మీ ఫాస్టాగ్ను సిద్ధం చేసుకోండి!
