భారత ప్రభుత్వం చరిత్రలో తొలిసారి రూ.108 విలువ గల ప్రత్యేక నాణెం విడుదల చేయబోతోంది. శ్రీ సత్య ప్రమోద తీర్థ స్వామీజీ 108వ జయంతి సందర్భంగా ఈ అరుదైన వెండి నాణెం విడుదల కానుంది. ఆర్థిక మంత్రిత్వ శాఖ గెజిట్ నోటిఫికేషన్ ద్వారా దీన్ని అధికారికంగా ధృవీకరించింది. ఆధ్యాత్మిక పరంపరను గుర్తుచేస్తూ విడుదలవుతున్న ఈ నాణెం భక్తులు, సేకరణకారులు కోసం ప్రత్యేకమైన స్మారక చిహ్నంగా నిలవనుంది.
ప్రముఖ నాణేల పరిశోధకులు సుధీర్ లుణావత్ చెప్పిన ప్రకారం, ఇది ప్రపంచంలోనే తొలిసారిగా విడుదలవుతున్న రూ.108 విలువ గల నాణెం. ముంబయిలోని ఇండియా మింట్లో ఈ నాణెం తయారీ జరుగుతోంది. 40 గ్రాముల బరువుతో, 99.9 శాతం శుద్ధ వెండితో దీనిని రూపొందించారు. ఆధునిక భారతీయ నాణేల చరిత్రలో ఇది ఒక ప్రత్యేక ఘట్టంగా నిలిచే అవకాశం ఉంది.
నాణెం రూపకల్పనలో కూడా విశిష్టతలు ఉన్నాయి. ముందు భాగంలో అశోక స్తంభంపై సింహ ముద్ర, “సత్యమేవ జయతే” లిపి, ఎడమవైపు “భారత్” (దేవనాగరి), కుడివైపు “INDIA” (ఇంగ్లీష్) ఉంటాయి. దిగువన రూపాయి గుర్తు ₹108 చెక్కబడింది. వెనుక భాగంలో శ్రీ సత్య ప్రమోద తీర్థ స్వామీజీ చిత్రపటం ఉండగా, పైభాగంలో హిందీలో, కింద భాగంలో ఇంగ్లీషులో ఆయన 108వ జయంతి శాసనం ఉంటుంది. “శ్రీ ఉత్తరాది మఠ” పదాలతో పాటు 2025 సంవత్సరం కూడా చెక్కబడనుంది.
శ్రీ సత్య ప్రమోద తీర్థ స్వామీజీ 1917 ఆగస్టు 21న జన్మించారు. ఆయన ఉత్తరాది మఠ 41వ పీఠాధిపతిగా సేవలు అందించారు. ద్వైత వేదాంతాన్ని ప్రచారం చేయడంలో, ధర్మగ్రంథాల పరిరక్షణలో, సాదాసీదా జీవనశైలిలో ఆయన విశేష కృషి చేశారు. అందుకే ఆయన భక్తుల హృదయాలలో చిరస్థాయిగా నిలిచారు.
ఈ ప్రత్యేక నాణెం ఆగస్టు 21న హైదరాబాదులో అధికారికంగా విడుదల కానుంది. ఇది కేవలం గౌరవ సూచక నాణెం మాత్రమే కాకుండా, భారతదేశ ఆధ్యాత్మిక సంప్రదాయానికి ఒక గుర్తింపుగా, స్మారక నాణేల చరిత్రలో ఓ విశిష్ట ఘట్టంగా నిలిచే అవకాశం ఉంది.
