లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) దేశవ్యాప్తంగా విస్తృతంగా ఖాళీలు భర్తీ చేయబోతోంది. తాజాగా అసిస్టెంట్ అడ్మినిస్ట్రేటివ్ ఆఫీసర్ (AAO) పోస్టుల కోసం నోటిఫికేషన్ విడుదల చేసింది. మొత్తం 841 పోస్టులు ఈ నియామక ప్రకటన కింద భర్తీ కానున్నాయి. ఇప్పటికే ఆన్లైన్ దరఖాస్తు ప్రక్రియ ప్రారంభమైందీ, దాని గడువు సెప్టెంబర్ 8, 2025 వరకు మాత్రమే అందుబాటులో ఉంటుంది.
ఈ పోస్టులకు దరఖాస్తు చేసుకోవడానికి అభ్యర్థులు గుర్తింపు పొందిన విశ్వవిద్యాలయం నుంచి బ్యాచిలర్ డిగ్రీలో ఉత్తీర్ణత సాధించి ఉండాలి. వయోపరిమితి 2025 ఆగస్టు 1 నాటికి 21 నుంచి 30 ఏళ్ల మధ్యగా నిర్ణయించారు. రిజర్వేషన్ కింద ఎస్సీ, ఎస్టీ అభ్యర్థులకు 5 ఏళ్లు, ఓబీసీ వారికి 3 ఏళ్లు, పీడబ్ల్యూబీడీ అభ్యర్థులకు 10 నుంచి 15 ఏళ్ల వరకు వయోపరిమితి సడలింపు వర్తిస్తుంది. ఫీజు పరంగా జనరల్ అభ్యర్థులు రూ.700, ఎస్సీ, ఎస్టీ, పీడబ్ల్యూబీడీ అభ్యర్థులు మాత్రం రూ.85 మాత్రమే చెల్లించాలి.
ఎంపిక ప్రక్రియలో ప్రిలిమినరీ పరీక్ష, మెయిన్స్ పరీక్ష, ఇంటర్వ్యూ, మెడికల్ ఎగ్జామినేషన్ ఉంటాయి. ప్రిలిమినరీ పరీక్ష అక్టోబర్ 3, 2025న జరగనుంది. అందులో ఉత్తీర్ణత సాధించిన వారు నవంబర్ 8, 2025న జరిగే మెయిన్స్ పరీక్షకు అర్హత సాధిస్తారు. అనంతరం ఇంటర్వ్యూ, మెడికల్ టెస్టుల ఆధారంగా తుది ఎంపిక ఉంటుంది.
ఎంపికైన వారికి మంచి వేతనం అందనుంది. నెలకు రూ.88,635 నుంచి రూ.1,69,025 వరకు జీతం లభిస్తుంది. కాబట్టి ఉద్యోగ ఆసక్తి ఉన్న వారు గడువు దగ్గరలోనే ఉన్నందున వెంటనే ఆన్లైన్లో దరఖాస్తు పూర్తి చేయాలని సూచిస్తున్నారు. ఇది డిగ్రీ అర్హతతో ప్రభుత్వ రంగంలో స్థిరమైన కెరీర్ కోసం ఒక గొప్ప అవకాశం అని నిపుణులు అభిప్రాయపడుతున్నారు.
