ఆంధ్రప్రదేశ్ రాష్ట్రంలోని పేద కుటుంబాలకు శుభవార్త. ప్రధాని గ్రామీణ ఆవాస్ యోజన (PMAY-G) కింద ఇళ్లు కట్టుకునే అవకాశాన్ని మరోసారి కల్పిస్తూ రాష్ట్ర ప్రభుత్వం ముఖ్య నిర్ణయం తీసుకుంది. గతంలో సర్వేలో గుర్తించినా, పథకం వివరాలు తెలియక చాలామంది లబ్ధిదారులు దరఖాస్తు చేయలేకపోయారు. ఈ అంశాన్ని అధికారులు ముఖ్యమంత్రి చంద్రబాబు నాయుడు దృష్టికి తీసుకెళ్లడంతో ఆయన తక్షణమే కేంద్ర ప్రభుత్వాన్ని సంప్రదించారు. ఫలితంగా కేంద్రం సానుకూలంగా స్పందించి పీఎంఏవై పథకం కింద లబ్ధిదారుల గుర్తింపు గడువును నవంబర్ 5 వరకు పొడిగించింది. ఈ కొత్త అవకాశం ద్వారా ఇప్పటికీ ఇళ్లు పొందని అర్హులైన పేద కుటుంబాలు దరఖాస్తు చేసుకునే వీలు కలిగింది.
ఈ ఏడాది జూలై వరకు గృహనిర్మాణశాఖ ఆధ్వర్యంలో పీఎంఏవై అర్బన్ 2.0, గ్రామీణ్ 2.0 పథకాల కింద లబ్ధిదారుల ఎంపిక కోసం రాష్ట్రవ్యాప్తంగా సర్వే చేపట్టారు. 2024–2029 మధ్యకాలంలో గృహనిర్మాణ సహాయం అందుకునే వారిని గుర్తించడానికి ఈ సర్వే ముఖ్య పాత్ర పోషించింది. అయితే చాలామంది సాంకేతిక అవగాహన లేక లేదా పత్రాల లోపంతో నమోదు కాకపోవడంతో, ఆ అవకాశాన్ని కోల్పోయారు. ఇప్పుడు సీఎం జోక్యంతో మరోసారి అవకాశం లభించడంతో వారు ఆనందం వ్యక్తం చేస్తున్నారు. అధికారులు ఈ సారి ఎవరూ తప్పిపోకుండా దరఖాస్తు చేసుకోవాలని సూచిస్తున్నారు.
పీఎంఏవై అర్బన్-2.0 పథకం కింద పట్టణ ప్రాంతాల్లో అర్హులైన లబ్ధిదారులకు రూ.2.50 లక్షల వరకు ఆర్థిక సహాయం అందనుంది. గ్రామీణ ప్రాంతాల్లో ఉన్న వారికి రూ.1.80 లక్షల వరకు సాయం అందుతుంది. రాష్ట్ర ప్రభుత్వం గతంలో అర్బన్ డెవలప్మెంట్ అథారిటీ (UDA) పరిధిలో ఉన్నవారికీ సమాన సాయం ఇవ్వాలని కోరినా, కేంద్ర ఆదేశాల ప్రకారం రూ.2.50 లక్షల సాయం కేవలం మున్సిపాలిటీల పరిధిలో ఉన్నవారికే వర్తిస్తుంది. ఈ క్రమంలో గతంలో నమోదు చేసుకున్నవారిని ఇప్పుడు ప్రత్యేక యాప్ ద్వారా మళ్లీ నమోదు చేసే ప్రక్రియను అధికారులు చేపట్టారు.
అర్హులైన పేదలు తమ సమీప గృహనిర్మాణశాఖ కార్యాలయాల్లో నవంబర్ 5 లోపు దరఖాస్తు చేసుకోవాలని అధికారులు సూచిస్తున్నారు. సొంత స్థలం ఉన్నవారు ఇల్లు కట్టుకోవడానికి ఈ పథకం కింద సాయం పొందవచ్చు. దరఖాస్తు సమయంలో స్థలం పత్రాలు, ఆధార్, రేషన్ కార్డు, ఓటర్ ఐడి, పాన్, బ్యాంక్ పాస్బుక్, పాస్పోర్ట్ సైజు ఫోటోలు సమర్పించాలి. ఈ గడువు అనంతరం దరఖాస్తులు స్వీకరించరని అధికారులు హెచ్చరించారు. కాబట్టి అర్హులైన లబ్ధిదారులు ఈ సదవకాశాన్ని వినియోగించుకోవాలని పిలుపునిచ్చారు.
