- Ambati News: బెయిల్ వచ్చినా మళ్ళీ అరెస్ట్.. పీటీ వారెంట్తో పోలీసుల షాక్!
- సత్తెనపల్లి రాజకీయాల్లో సెగలు…
YSR Congress Party News: వైఎస్సార్ కాంగ్రెస్ పార్టీ సీనియర్ నాయకుడు మాజీ మంత్రి అంబటి రాంబాబు (Ambati Rambabu) ఇబ్బందులు ఇప్పట్లో తీరేలా కనిపించడం లేదు. రాజమహేంద్రవరం కేంద్ర కారాగారంలో ఉన్న ఆయనను సత్తెనపల్లి పోలీసులు పీటీ వారెంట్పై అదుపులోకి తీసుకున్నారు. గతంలో నమోదైన అక్రమ వసూళ్ల కేసులో భాగంగా విచారణ నిమిత్తం భారీ భద్రత నడుమ ఆయనను గుంటూరుకు తరలిస్తున్నారు.
సంక్రాంతి లక్కీ డ్రా స్కామ్.. అసలేం జరిగింది?
2023లో సత్తెనపల్లిలో నిర్వహించిన సంక్రాంతి సంబరాల సందర్భంగా అంబటి రాంబాబు మంత్రి హోదాలో ఉండి అక్రమ వసూళ్లకు పాల్పడ్డారన్నది ప్రధాన ఆరోపణ. లక్కీ డ్రా పేరుతో భారీ ఎత్తున నిధులు వసూలు చేశారని, ఆ నిధుల వినియోగంలో అక్రమాలు జరిగాయని అప్పట్లో కేసు నమోదైంది. ఈ కేసులో లోతైన విచారణ జరిపేందుకు పోలీసులు అంబటిని కస్టడీలోకి తీసుకున్నారు. ఈ రోజు మధ్యాహ్నం ఆయనను గుంటూరు కోర్టులో హాజరుపరిచే అవకాశం ఉంది. కోర్టు రిమాండ్ విధిస్తే అంబటి మరికొన్ని రోజులు జైలులోనే గడపాల్సి ఉంటుంది.
బెయిల్ వచ్చినా తప్పని కష్టాలు
వాస్తవానికి పోలీసులపై దౌర్జన్యం చేసినట్లు నమోదైన మరో కేసులో అంబటి రాంబాబుకు నిన్నే బెయిల్ మంజూరైంది. ఆ కేసులో ఊరట లభించిందని సంతోషించే లోపే, పోలీసులు పాత కేసును తెరపైకి తెచ్చి పీటీ వారెంట్ సమర్పించారు. దీంతో రాజమహేంద్రవరం జైలు నుంచి విడుదల కావాల్సిన అంబటి, నేరుగా పోలీసుల వాహనంలో గుంటూరు బాట పట్టాల్సి వచ్చింది.
సత్తెనపల్లి రాజకీయాల్లో వేడి
అంబటి రాంబాబు తరలింపు వార్తతో ఉమ్మడి గుంటూరు (Guntur) జిల్లా రాజకీయాల్లో ఒక్కసారిగా వేడి పెరిగింది. పోలీసుల చర్యను వైఎస్సార్సీపీ నాయకులు తప్పుపడుతుండగా, చట్టం తన పని తాను చేసుకుపోతుందని కూటమి నేతలు పేర్కొంటున్నారు. అక్రమ వసూళ్ల కేసులో బలమైన సాక్ష్యాధారాలు ఉన్నాయని, అందుకే పోలీసులు పకడ్బందీగా ముందుకు వెళ్తున్నారని సమాచారం. మధ్యాహ్నం కోర్టు ఇచ్చే తీర్పుపై అంబటి రాజకీయ భవిష్యత్తు మరియు తదుపరి పరిణామాలు ఆధారపడి ఉన్నాయి.
