ఉక్రెయిన్ యుద్ధం ప్రపంచ ఆర్థిక వ్యవస్థపై తీవ్ర ప్రభావం చూపింది. ముఖ్యంగా ఎనర్జీ మార్కెట్లలో కలకలం రేపింది. యూరప్ దేశాలు రష్యా నుంచి గ్యాస్, ఆయిల్ దిగుమతులను తగ్గించుకోవడం వల్ల ఇంధన ధరలు పెరిగాయి. ఈ పరిస్థితుల్లో అమెరికా, రష్యా మధ్య కొత్త చర్చలు మొదలైనట్లు సమాచారం బయటకు వచ్చింది. రష్యా అధ్యక్షుడు వ్లాదిమిర్ పుతిన్, అమెరికా అధ్యక్షుడు డొనాల్డ్ ట్రంప్ ఉక్రెయిన్ శాంతి చర్చల కోసం ఈ నెల 16న సమావేశమైన విషయం తెలిసిందే. ఈ సమావేశంలో యుద్ధం ఆగే మార్గాలకే కాకుండా, ఇరు దేశాల మధ్య ఎనర్జీ డీల్స్ పైనా చర్చలు జరిగినట్లు తాజాగా వెల్లడించింది.
ఈ నివేదిక ప్రకారం, అమెరికా రష్యాపై విధించిన ఆంక్షలను కొంతవరకు ఎత్తివేయడానికి సిద్ధంగా ఉందని, దానికి బదులుగా రష్యా ఉక్రెయిన్పై దాడులను ఆపాలని పుతిన్కి స్పష్టమైన సందేశం ఇచ్చిందని చెబుతున్నారు. ఆంక్షల సడలింపుతో పాటు అమెరికా పెట్టుబడులకు రష్యా తలుపులు తెరవాలని కూడా ప్రతిపాదించినట్లు సమాచారం. ముఖ్యంగా ఆయిల్, గ్యాస్ రంగాల్లో ఇరు దేశాల సహకారం మళ్లీ మొదలవుతుందనే అంచనాలు వ్యక్తమవుతున్నాయి.
ఈ నేపథ్యంలో అమెరికా టాప్ ఆయిల్ కంపెనీ Exxon Mobil రష్యాలో తిరిగి ఎంట్రీ ఇవ్వబోతోందనే వార్త ప్రాధాన్యత సంతరించుకుంది. రష్యాలో ఎక్సాన్ కంపెనీకి గతంలో పెద్ద పెట్టుబడులు ఉన్నాయి. కానీ 2022లో ఉక్రెయిన్ యుద్ధం ప్రారంభమైన తర్వాత, పాశ్చాత్య దేశాల ఒత్తిడి వల్ల ఎక్సాన్ రష్యా నుంచి తన కార్యకలాపాలను పూర్తిగా ఉపసంహరించుకుంది. ఇప్పుడు అమెరికా-రష్యా మధ్య కొత్త డీల్స్ జరిగితే, మళ్లీ అక్కడ కార్యకలాపాలు మొదలు పెట్టే అవకాశం ఉంది.
మరో ముఖ్యమైన అంశం ట్రేడ్ రీలాంచ్. రష్యా-అమెరికా మధ్య ట్రేడింగ్ గత రెండు సంవత్సరాలుగా దాదాపు నిలిచిపోయింది. ఉక్రెయిన్ యుద్ధం, ఆంక్షలు, జియోపాలిటికల్ టెన్షన్స్ వల్ల వాణిజ్యం పూర్తిగా దెబ్బతిన్నది. కానీ ఇప్పుడు శాంతి చర్చలతో పాటు వాణిజ్య సంబంధాలు పునరుద్ధరించాలనే ఆలోచన ఇరువైపులా ఉన్నట్లు సమాచారం. ఇది జరిగితే అంతర్జాతీయ ఆర్థిక వ్యవస్థకు ఊపిరి పోసే అవకాశం ఉందని నిపుణులు భావిస్తున్నారు.
అయితే ఈ డీల్స్కు గ్రీన్ సిగ్నల్ ఇవ్వడం అంత సులభం కాదని కూడా అంచనా. రష్యా ఉక్రెయిన్లో ఆక్రమించిన భూభాగాలను వదిలేయకపోతే ఆంక్షలను ఎత్తివేయకూడదని అనేక నేతలు స్పష్టంగా చెబుతున్నారు. మరోవైపు, యూరప్ దేశాలు కూడా అమెరికా ఈ ఒప్పందంపై ముందుకు వెళ్తుందా అనే అంశాన్ని జాగ్రత్తగా గమనిస్తున్నాయి. ఎందుకంటే, యూరప్ దేశాలు రష్యాపై ఆయిల్, గ్యాస్ ఆంక్షలు విధించాయి. అమెరికా, రష్యా మధ్య డీల్స్ జరిగితే, యూరప్లో ఎనర్జీ రాజకీయాలు మళ్లీ మారిపోవచ్చు.
ఇక చైనా అంశం కూడా ఈ చర్చల్లో కీలకంగా మారవచ్చు. గత రెండేళ్లలో రష్యా తన ఆయిల్, గ్యాస్ ఎగుమతులను చైనాకే ఎక్కువగా మళ్లించింది. అమెరికా మళ్లీ రష్యాతో ఎనర్జీ రంగంలో చొరవ చూపితే, రష్యా-చైనా మధ్య పెరుగుతున్న ఎనర్జీ ఆధారిత సంబంధాలు కొంత వరకు తగ్గే అవకాశం ఉంది.
నిపుణుల అభిప్రాయం ప్రకారం, ఈ ఎనర్జీ డీల్స్ కేవలం ఆర్థిక ప్రయోజనాల కోసం మాత్రమే కాకుండా, యుద్ధానికి శాంతియుత పరిష్కారం కనుగొనడానికి కూడా ఒక వ్యూహాత్మక అడుగు కావచ్చని చెబుతున్నారు. ఎందుకంటే రష్యా ఆర్థికంగా బలహీనపడితేనే శాంతి చర్చలకు ముందుకు వస్తుంది. అదే సమయంలో అమెరికా కూడా చమురు ధరలు నియంత్రణలో ఉంచుకోవడానికి రష్యా సహకారం కోరుకుంటోంది.
మొత్తం మీద, అమెరికా-రష్యా ఎనర్జీ డీల్స్పై జరుగుతున్న ఈ చర్చలు ప్రపంచవ్యాప్తంగా పెద్ద చర్చనీయాంశంగా మారాయి. ఉక్రెయిన్ యుద్ధం ముగిసే దిశగా ఇవి ఒక మొదటి అడుగుగా భావించవచ్చు. కానీ ఈ ఒప్పందాలు నిజంగా ఫలిస్తాయా? లేక కేవలం రాజకీయ స్థాయిలోనే పరిమితమవుతాయా? అనేది రాబోయే నెలల్లో స్పష్టతకు వస్తుంది.
