2026 ఏప్రిల్ 30 నుండి అమల్లోకి కొత్త నిబంధనలు..
పేరెంట్ వీసాల్లో కీలక మార్పులు..
విదేశాలకు వెళ్లి కుటుంబ సభ్యులతో కలవాలనుకునే వారికి కీలకమైన సమాచారం. న్యూజిలాండ్ ప్రభుత్వం పలు వీసా కేటగిరీలలో ఆదాయం, స్పాన్సర్షిప్ ప్రమాణాలను పెంచుతున్నట్లు ప్రకటించింది. ఈ కొత్త నిబంధనలు 2026 ఏప్రిల్ 30 నుంచి అమల్లోకి రానున్నాయి. ముఖ్యంగా పేరెంట్ వీసా కోసం దరఖాస్తు చేసుకునే వారికి ఈ మార్పులు నేరుగా ప్రభావం చూపనున్నాయి.
ఇమిగ్రేషన్ అధికారుల ప్రకారం, ఈ మార్పులు దేశంలోని వేతనాలు, జీవన వ్యయం, మరియు సంక్షేమ పథకాల ఆధారంగా ప్రతి సంవత్సరం జరిగే సాధారణ సవరణల్లో భాగంగా తీసుకొచ్చినవే.
పేరెంట్ కేటగిరీ రెసిడెంట్ వీసా, పేరెంట్ బూస్ట్ విజిటర్ వీసా కోసం స్పాన్సర్ చేయాలంటే అవసరమైన కనీస ఆదాయం పెరుగుతుంది. ముఖ్యంగా స్పాన్సర్ చేసే తల్లిదండ్రుల సంఖ్య ఆధారంగా ఆదాయం మరింత ఎక్కువగా ఉండాలి.
పేరెంట్ బూస్ట్ విజిటర్ వీసా కోసం స్పాన్సర్ ఆదాయం (ఏప్రిల్ 30, 2026 నుండి):
తల్లి లేదా తండ్రి ఒకరికి: NZD $72,800 (సుమారు రూ. 36.5 లక్షలు)
ఇద్దరికి: NZD $109,200 (రూ. 54.7 లక్షలు)
ముగ్గురికి: NZD $145,600 (రూ. 73 లక్షలు)
నలుగురికి: NZD $182,000 (రూ. 91.2 లక్షలు)
ఐదుగురికి: NZD $218,400 (రూ. 1.09 కోట్లు)
ఆరుగురికి: NZD $254,800 (రూ. 1.27 కోట్లు)
స్పాన్సర్ గత మూడు ఆర్థిక సంవత్సరాల్లో కనీసం రెండు సంవత్సరాలు ఈ ఆదాయ ప్రమాణాన్ని చేరుకోవాలి.
పేరెంట్ బూస్ట్ విజిటర్ వీసా కింద దరఖాస్తు చేసుకునే వారు తమ ఖర్చులను తాము భరించేందుకు కూడా అవకాశం ఉంది. అయితే దీనికి సంబంధించిన ఆదాయం, సేవింగ్స్ ప్రమాణాలు కూడా పెరుగుతాయి.
వ్యక్తిగత ఆదాయం:
ఒక్కరికి: NZD $33,663.24 (సుమారు రూ. 16.9 లక్షలు)
భాగస్వామితో కలిపి: NZD $51,182.56 (రూ. 25.6 లక్షలు)
సేవింగ్స్ (బ్యాంక్లో నిధులు):
ఒక్కరికి: NZD $170,000 (రూ. 85 లక్షలు)
భాగస్వామితో: NZD $260,000 (రూ. 1.3 కోట్లు)
ఈ లెక్కలు ఐదేళ్ల కాలానికి సరిపడే విధంగా ఉండాలని అధికారులు స్పష్టం చేశారు.
పేరెంట్ కేటగిరీ రెసిడెంట్ వీసా కోసం దరఖాస్తు చేసే వారి స్పాన్సర్లు, గత మూడు సంవత్సరాల్లో ఎంపికకు ముందు రెండు సంవత్సరాలలో నిర్దేశించిన ఆదాయం ఉండాలి. ఇప్పటికే దరఖాస్తు చేసిన వారికి ఈ కొత్త నియమాలు వర్తించవు.
పసిఫిక్ యాక్సెస్ కేటగిరీ, సమోవన్ కోటా వీసాలకు కూడా ఆదాయ ప్రమాణాలు పెంచారు. పిల్లలతో దరఖాస్తు చేసే వారికి కనీస ఆదాయం NZD $54,133.04 నుంచి NZD $55,404.96కి పెరిగింది. అయితే ఈ మార్పులు భారతీయులకు వర్తించవని అధికారులు తెలిపారు.
ఎవరికీ ప్రభావం?
పేరెంట్ వీసా కోసం కొత్తగా దరఖాస్తు చేసుకునేవారు
స్పాన్సర్ ద్వారా తల్లిదండ్రులను తీసుకెళ్లాలనుకునేవారు
2026 ఏప్రిల్ 30 తర్వాత అప్లై చేసే వారు
మొత్తంగా చూస్తే,న్యూజిలెండ్ ప్రభుత్వం తీసుకొచ్చిన ఈ నిర్ణయం వలస విధానాన్ని మరింత క్రమబద్ధంగా మార్చే దిశగా ఒక అడుగు. అయితే, తల్లిదండ్రులను విదేశాలకు తీసుకెళ్లాలనుకునే కుటుంబాలకు ఇది ఆర్థికంగా కొంత భారంగా మారే అవకాశం ఉంది.
