విదేశాల నుంచి బంగారం తెస్తే టాక్స్ జీరో..! కొత్త నిబంధనలు ఇవే..!

దశాబ్ద కాలం నాటి పాత నిబంధనలను మారుస్తూ, కేంద్ర పరోక్ష పన్నులు, కస్టమ్స్ బోర్డు (CBIC) కొత్తగా బ్యాగేజీ నిబంధనలు-2026' ను అమల్లోకి తెచ్చింది. ఫిబ్రవరి 2, 2026 అర్ధరాత్రి నుంచి ఈ కొత్త రూల్స్ అమలులోకి వచ్చాయి. 

బంగారంపై 'విలువ' పరిమితి రద్దు: ఒక పెద్ద ఊరట

గతంలో విదేశాల నుంచి వచ్చే మహిళలు 40 గ్రాములు, పురుషులు 20 గ్రాముల వరకు బంగారాన్ని తెచ్చుకునే వీలుండేది. అయితే, దీనిపై ఒక విలువ పరిమితి (మహిళలకు రూ. లక్ష, పురుషులకు రూ. 50 వేలు) ఉండేది. ప్రస్తుతం బంగారం ధరలు విపరీతంగా పెరగడం వల్ల ఆ పరిమితి దాటిపోవడం, ఎయిర్‌పోర్టుల్లో కస్టమ్స్ అధికారులతో వాగ్వివాదాలు జరగడం మనం చూస్తుంటాం.

ఇప్పుడు కేంద్రం ఈ విలువ పరిమితిని పూర్తిగా తొలగించింది. అంటే, మీరు నిర్ణీత బరువు లోపు ఎంత విలువైన ఆభరణాలు తెచ్చినా ఒక్క రూపాయి కూడా కస్టమ్స్ సుంకం చెల్లించాల్సిన అవసరం లేదు.

ఎవరు ఎంత బంగారం తీసుకురావచ్చు?

కొత్త నిబంధనల ప్రకారం బరువు పరిమితులు ఇలా ఉన్నాయి:

• మహిళలు: 40 గ్రాముల వరకు బంగారు ఆభరణాలు తీసుకురావచ్చు. దీనికి విలువతో సంబంధం లేదు.

• పురుషులు: 20 గ్రాముల వరకు బంగారు ఆభరణాలు తీసుకురావచ్చు. దీనికి కూడా విలువతో సంబంధం లేదు.

• పిల్లలు (15 ఏళ్ల లోపు): ఇది ఒక గొప్ప మార్పు. 15 ఏళ్ల లోపు పిల్లలకు కూడా 40 గ్రాముల వరకు ఆభరణాలు సుంకం లేకుండా తెచ్చుకునే వెసులుబాటు కల్పించారు.

ముఖ్య గమనిక: ఈ మినహాయింపు కేవలం ఆభరణాలకు (Jewellery) మాత్రమే వర్తిస్తుంది. మీరు బంగారు బిస్కెట్లు లేదా కడ్డీలు (Bars) తెస్తే కచ్చితంగా నిబంధనల ప్రకారం సుంకం చెల్లించాల్సిందే.

డ్యూటీ ఫ్రీ ఐటమ్స్ లిమిట్ పెంపు

బంగారంతో పాటు ఇతర వస్తువుల విషయంలోనూ ప్రభుత్వం ఉదారంగా వ్యవహరించింది.

• సాధారణ వస్తువులు: సాధారణంగా విదేశాల నుంచి తెచ్చే గిఫ్ట్‌లు లేదా ఇతర వస్తువుల (Duty-free allowance) పరిమితిని రూ. 50,000 నుంచి రూ. 75,000కు పెంచారు.

• ల్యాప్‌టాప్/నోట్‌ప్యాడ్: 18 ఏళ్లు దాటిన ప్రయాణికులు తమతో పాటు అదనంగా ఒక కొత్త ల్యాప్‌టాప్‌ను సుంకం లేకుండా తీసుకురావచ్చు. ఇది విద్యార్థులకు, సాఫ్ట్‌వేర్ ఉద్యోగులకు ఎంతో మేలు చేస్తుంది.

మద్యం మరియు సిగరెట్ల నిబంధనలు

మద్యం మరియు సిగరెట్ల విషయంలో మాత్రం పాత నిబంధనలే కొనసాగుతున్నాయి.

• మద్యం: 2 లీటర్ల వరకు అనుమతి ఉంది.

• సిగరెట్లు: 100 సిగరెట్ల వరకు ఎటువంటి సుంకం లేకుండా తీసుకురావచ్చు.

ప్రయాణికులకు కలిగే ప్రయోజనం ఏమిటి?

ఈ కొత్త రూల్స్ వల్ల ఎయిర్‌పోర్టుల్లో కస్టమ్స్ తనిఖీల సమయంలో ప్రయాణికులకు ఎదురయ్యే ఇబ్బందులు తగ్గుతాయి. ముఖ్యంగా ధరల పెరుగుదల వల్ల గతంలో తక్కువ బరువు ఉన్నా ఎక్కువ విలువ ఉందని పన్ను కట్టమనే వారు. ఇప్పుడు ఆ టెన్షన్ లేదు. మీరు నిర్ణీత బరువులోపు నగలు తెచ్చుకుంటే ధైర్యంగా ఇంటికి చేరుకోవచ్చు.