Vijay Speech: చీకటి రాజకీయాలు చేయను.. ఏదున్నా నేరుగానే.. తన స్టైల్‌లో స్పష్టం చేసిన కొత్త సీఎం!

• రాష్ట్ర ఆర్థిక పరిస్థితిపై త్వరలో శ్వేతపత్రం విడుదల చేస్తామన్న సీఎం..
   
• Politics: ప్రభుత్వంలో ఒకటే పవర్ సెంటర్ ఉంటుందని హామీ..

Vijay Speech: తమిళనాడు ముఖ్యమంత్రిగా బాధ్యతలు స్వీకరించిన అనంతరం సి. జోసెఫ్ విజయ్ చేసిన తొలి ప్రసంగం రాష్ట్రవ్యాప్తంగా పెను సంచలనం సృష్టించింది. తమిళనాడులో నిజమైన లౌకికవాదం మరియు సామాజిక న్యాయంతో కూడిన ఒక కొత్త శకం ప్రారంభమైందని ఆయన ధీమా వ్యక్తం చేశారు. తన గెలుపులో కీలక పాత్ర పోషించిన యువతను ఉద్దేశించి మాట్లాడుతూ, ఈ "విజయ్ మామ" మీకు ఎల్లప్పుడూ అండగా ఉంటాడని, యువతే తన ప్రాణమని ఉద్వేగభరితంగా వ్యాఖ్యానించారు. తాను కేవలం ఒక పాలకుడిని మాత్రమే కాదని, ప్రతి ఇంట్లో ఒక అన్నలా, తమ్ముడిలా ఉంటూ కుటుంబ సభ్యుడిగా బాధ్యతలు నిర్వహిస్తానని ప్రజలకు హామీ ఇచ్చారు. తనను ముఖ్యమంత్రి పీఠంపై కూర్చోబెట్టిన యావత్ తమిళ ప్రజలకు ఎప్పటికీ రుణపడి ఉంటానని ఆయన కృతజ్ఞతలు తెలిపారు.

రాజకీయాల్లో పారదర్శకతకు పెద్దపీట వేస్తానని స్పష్టం చేసిన విజయ్, ఎవరికీ తెలియకుండా చీకటి రాజకీయాలు చేసే ప్రసక్తి లేదని, ఏ విషయమైనా ప్రజలతో నేరుగా చర్చిస్తానని ప్రకటించారు. హిందూ, ముస్లిం, క్రిస్టియన్ ఇలా అన్ని మతాల సమ్మేళనమే తన రూపమని పేర్కొంటూ లౌకికవాదానికి కట్టుబడి ఉంటానని చాటిచెప్పారు. పార్టీ కార్యకర్తల కృషితోనే తాను ఈ స్థాయికి చేరుకున్నానని గుర్తిస్తూ, పాలనలోని మెళకువలు నేర్చుకోవడానికి తనకు కొంత సమయం ఇవ్వాలని ప్రజలను కోరారు. అలాగే తన ప్రభుత్వంలో అధికార వికేంద్రీకరణ కాకుండా ఒకే పవర్ సెంటర్ ఉంటుందని, తద్వారా నిర్ణయాలు వేగంగా జరుగుతాయని హామీ ఇచ్చారు. ముఖ్యంగా రాష్ట్రంలో మహిళల భద్రతను కాపాడటమే తమ ప్రభుత్వ ప్రధాన లక్ష్యమని ఆయన ఉద్ఘాటించారు.

రాష్ట్ర భవిష్యత్తుపై స్పష్టమైన ప్రణాళికను ప్రకటిస్తూ, ప్రస్తుత ఆర్థిక పరిస్థితిపై త్వరలోనే శ్వేతపత్రం విడుదల చేస్తామని విజయ్ వెల్లడించారు. ఒక సాధారణ కుటుంబం నుంచి వచ్చిన తనకు ఆకలి, పేదరికం అంటే ఏమిటో బాగా తెలుసునని, అందుకే దేవదూతలా కాకుండా ఒక సామాన్యుడిగానే ప్రజల సమస్యలను పరిష్కరిస్తానని చెప్పారు. సాధ్యం కాని హామీలు ఇచ్చి ప్రజలను మభ్యపెట్టబోనని, ఏది అమలు చేయడం సాధ్యమో అదే చేస్తానని తన ప్రసంగంలో స్పష్టం చేశారు. రాజకీయాల్లోకి రావాలని తనను ప్రేమతో పిలిచిన ప్రజల నమ్మకాన్ని వమ్ము చేయబోనని ఆయన పునరుద్ఘాటించారు.