ప్రపంచ ఆర్థిక వ్యవస్థలో కీలక పాత్ర పోషించే అరుదైన ఖనిజాల సరఫరాపై చైనా చేస్తున్న చర్యలు గ్లోబల్ దృష్టిని ఆకర్షిస్తున్నాయి. ఈ ఖనిజాలు ఆధునిక సాంకేతికతకు, ముఖ్యంగా ఎలక్ట్రిక్ వాహనాలు, మిసైల్ సిస్టమ్స్, స్మార్ట్‌ఫోన్లు, ఉపగ్రహాలు వంటి రంగాలకు మూలస్థంభాలుగా నిలుస్తాయి. ఇటీవల చైనా ప్రభుత్వం ఈ అరుదైన ఖనిజాల ఎగుమతిపై కఠిన నియంత్రణలు విధించడం అంతర్జాతీయ వాణిజ్య వ్యవస్థకు పెద్ద సవాలుగా మారింది. ఈ నేపథ్యంలో అమెరికా తీవ్రంగా స్పందించింది.
అమెరికా ఆర్థిక మంత్రి స్కాట్ బెసెంట్ ఫాక్స్ న్యూస్‌కి ఇచ్చిన ఇంటర్వ్యూలో మాట్లాడుతూ, చైనా ఉద్దేశపూర్వకంగా ప్రపంచ దేశాలపై ఆర్థిక ఆధిపత్యం సాధించడానికి ప్రయత్నిస్తోందని ఆరోపించారు. చైనాలో లభించే ఈ విలువైన ఖనిజాల ఎగుమతికి ప్రస్తుతం ప్రభుత్వ అనుమతి తప్పనిసరి చేస్తున్నారని చెప్పారు. దీంతో గ్లోబల్ సరఫరా శ్రేణి దెబ్బతింటుందని, ప్రపంచ పరిశ్రమలకు తీవ్రమైన ఇబ్బందులు తలెత్తే అవకాశం ఉందని హెచ్చరించారు. ఆయన మాటల్లో — “ఇది కేవలం వ్యాపార నిర్ణయం కాదు, ప్రపంచ ఆర్థిక వ్యవస్థపై బీజింగ్ విధిస్తున్న ఆర్థిక యుద్ధం,” అన్నారు.
స్కాట్ బెసెంట్ మాట్లాడుతూ, అమెరికా ఈ పరిస్థితిని సహించబోదని స్పష్టం చేశారు. బీజింగ్ దూకుడుకు ప్రతిస్పందనగా అమెరికా తన మిత్రదేశాలతో కలసి వ్యూహాత్మక చర్యలు చేపడతామని తెలిపారు. ముఖ్యంగా భారత్ ఈ సవాళ్లను ఎదుర్కోవడంలో కీలక భాగస్వామిగా ఉండాలని ఆయన ఆశాభావం వ్యక్తం చేశారు. “చైనాను ఎదుర్కోవాలంటే భారత్ మద్దతు అవసరం,” అని ఆయన స్పష్టం చేశారు. ఈ వ్యాఖ్యలు భారత్–అమెరికా సంబంధాల కొత్త దిశకు సంకేతాలుగా మారాయి.
ఇక మరోవైపు, ఇటీవల రష్యా నుంచి చమురు దిగుమతుల అంశంలో భారత్‌పై అమెరికా భారీ పన్నులు విధించింది. అయినప్పటికీ, చైనా వ్యూహాలను ఎదుర్కోవడంలో మాత్రం అమెరికా భారత్ సహకారం కోరడం అంతర్జాతీయ వర్గాల్లో చర్చనీయాంశమైంది. నిపుణుల అభిప్రాయం ప్రకారం, ఇది ఆసియా-పసిఫిక్ ప్రాంతంలో శక్తి సమతుల్యతను ప్రభావితం చేయగల పరిణామంగా భావిస్తున్నారు. ప్రపంచ ఆర్థిక వ్యవస్థలో చైనా ఆధిపత్యాన్ని తగ్గించాలంటే భారత్‌తో భాగస్వామ్యం తప్పనిసరని అమెరికా గ్రహించినట్లే కనిపిస్తోంది.
