ముస్సోరీ వేదికగా అంగరంగ వైభవంగా వేడుక
హాజరైన క్రికెట్ స్టార్లు
విశ్వవిజేత కావడం కోసమే పెళ్లి వాయిదా
Kuldeep Yadav Wedding: టీమ్ ఇండియా స్టార్ స్పిన్నర్, 'చైనామన్' బౌలర్ కుల్దీప్ యాదవ్ ఒక ఇంటివాడయ్యాడు. తన చిన్ననాటి స్నేహితురాలు వంశిక చద్దాతో కలిసి శనివారం ముస్సోరీలోని అందమైన పర్వత శ్రేణుల మధ్య కొత్త జీవితాన్ని ప్రారంభించాడు. 2026 టీ20 ప్రపంచకప్లో భారత్ ఘన విజయం సాధించిన ఉత్సాహంలో ఉన్న కుల్దీప్, ఆ విజయం తర్వాత జరిగిన ఈ వివాహ వేడుకతో డబుల్ సెలబ్రేషన్లో మునిగిపోయాడు.
ఉత్తరాఖండ్లోని ప్రసిద్ధ పర్యాటక ప్రాంతమైన ముస్సోరీలో ఉన్న 'వెల్కమ్హోటల్ ది సావోయ్'లో ఈ వివాహ వేడుక జరిగింది. ఈ వేడుక కోసం హోటల్ను ప్రత్యేకంగా ముస్తాబు చేశారు. శనివారం జరిగిన ప్రధాన వివాహ ఘట్టానికి కుల్దీప్ కుటుంబ సభ్యులతో పాటు సన్నిహిత మిత్రులు హాజరయ్యారు. సోషల్ మీడియాలో వైరల్ అవుతున్న వీడియోల్లో, బాణసంచా వెలుగుల మధ్య కుల్దీప్, వంశిక చేతులు పట్టుకుని నడుస్తున్న దృశ్యాలు అభిమానులను కట్టిపడేస్తున్నాయి.
ఈ పెళ్లి వేడుకకు టీమ్ ఇండియా యువ ఆటగాళ్లు తిలక్ వర్మ, రింకూ సింగ్తో పాటు మాజీ క్రికెటర్ సురేష్ రైనా, స్పిన్ జోడి యుజ్వేంద్ర చాహల్ కూడా హాజరై సందడి చేశారు. "నా తమ్ముడు కొత్త జీవితం ప్రారంభించడం చాలా సంతోషంగా ఉంది" అంటూ చాహల్ ఎక్స్ వేదికగా శుభాకాంక్షలు తెలిపారు. అంతకుముందు శుక్రవారం రాత్రి జరిగిన సంగీత్ వేడుకలో క్రికెటర్లు డ్యాన్స్లతో దుమ్మురేపారు.
వాస్తవానికి కుల్దీప్, వంశికల వివాహం 2025 నవంబర్లోనే జరగాల్సి ఉంది. అయితే, 2026 టీ20 ప్రపంచకప్పై దృష్టి పెట్టాలని, దేశానికి ట్రోఫీ అందించాలనే లక్ష్యంతో కుల్దీప్ తన వివాహాన్ని వాయిదా వేసుకున్నట్లు సమాచారం. అనుకున్నట్లుగానే టీమ్ ఇండియా ఈ ఏడాది మార్చి 8న న్యూజిలాండ్ను ఓడించి ప్రపంచకప్ను కైవసం చేసుకుంది. ఈ విజయం తర్వాత కుల్దీప్ తన వ్యక్తిగత జీవితంపై దృష్టి సారించి పెళ్లి పీటలెక్కాడు.
కుల్దీప్, వంశిక ఇద్దరిదీ ఉత్తరప్రదేశ్లోని కాన్పూర్ నగరం. కేవలం 3 కిలోమీటర్ల దూరంలో ఉండే వీరిద్దరూ చిన్ననాటి నుండి మంచి స్నేహితులు. వంశిక ప్రస్తుతం ఎల్ఐసీ (LIC)లో ఉద్యోగిగా పనిచేస్తున్నారు. గత ఏడాది లక్నోలో వీరిద్దరి నిశ్చితార్థం అత్యంత గోప్యంగా జరిగింది. గత వారం కుల్దీప్ తండ్రి రామ సింగ్ యాదవ్, యూపీ ముఖ్యమంత్రి యోగి ఆదిత్యనాథ్ను కలిసి పెళ్లి పత్రికను అందించిన ఫోటోలు కూడా నెట్టింట వైరల్ అయ్యాయి. ప్రస్తుతం క్రికెట్ నుంచి విరామం తీసుకున్న కుల్దీప్, త్వరలోనే ప్రారంభం కానున్న ఐపీఎల్ 2026 సీజన్ కోసం మైదానంలోకి దిగనున్నాడు. కొత్త జంటకు నెటిజన్లు, క్రికెట్ అభిమానులు సోషల్ మీడియా వేదిక ద్వారా శుభాకాంక్షలు తెలుపుతున్నారు.
