ఆంధ్రప్రదేశ్‌లో ఈ సంవత్సరం ఖరీఫ్‌ సీజన్‌ రైతులపై తీవ్ర ప్రభావం చూపింది. తగినంత వర్షపాతం లేకపోవడంతో పంటలు ఎండిపోయి విస్తారమైన భూములు పాడుబడ్డాయి. ఈ నేపథ్యంలో రాష్ట్ర ప్రభుత్వం తాజా సమీక్ష అనంతరం మూడు జిల్లాల్లో 37 మండలాలను కరవు ప్రభావిత మండలాలుగా ప్రకటించింది. శ్రీసత్యసాయి, అన్నమయ్య, ప్రకాశం జిల్లాల్లో పంట నష్టాలు అధికంగా నమోదవడంతో ఈ నిర్ణయం తీసుకుంది. ప్రభుత్వం ఈ మండలాల్లో పరిస్థితులను అంచనా వేసేందుకు అధికారులు ఇప్పటికే ఫీల్డ్‌ స్థాయిలో పరిశీలనలు నిర్వహించినట్లు తెలిపింది.
శ్రీసత్యసాయి జిల్లా అత్యధికంగా కరువు బారిన పడింది. మొత్తం 25 మండలాల్లో కరవు పరిస్థితులు నెలకొనగా, వీటిలో 12 మండలాలను తీవ్రమైన కరవు ప్రాంతాలుగా గుర్తించారు. హిందూపురం, మడకశిర, ముదిగుబ్బ, అగలి, ఆమడగూరు, రామగిరి, గాండ్లపెంట, ఎన్‌పీకుంట, ఓడీచెరువు, రోళ్ల, తలుపుల, తనకల్‌ మండలాల్లో తీవ్ర కరవు ఉందని ప్రభుత్వం పేర్కొంది. అలాగే బత్తపల్లి, ధర్మవరం, కదిరి, పుట్టపర్తి, లేపాక్షి, గుదిబండ వంటి మండలాల్లో మధ్యస్థ కరవు పరిస్థితులు ఉన్నాయని వివరించింది. ఈ ప్రాంతాల్లో రైతులు విత్తిన పంటలు వర్షాభావంతో ఎండిపోవడం వల్ల భారీ నష్టం వాటిల్లిందని అంచనా.
అదే విధంగా, అన్నమయ్య జిల్లాలో తొమ్మిది మండలాలు — కురబలకోట, మదనపల్లె, నిమ్మనపల్లె, గాలివీడు, లక్కిరెడ్డిపల్లి, రామాపురం, వీరబల్లె, రామసముద్రం, వాల్మీకిపురం — మధ్యస్థ కరవు మండలాలుగా గుర్తించారు. అలాగే ప్రకాశం జిల్లాలోని కొండపి, పొన్నలూరు, జరుగుమల్లి మండలాలు కూడా కరవు ప్రభావిత మండలాలుగా ప్రకటించబడ్డాయి. ప్రభుత్వం పేర్కొన్న ఈ ప్రాంతాల్లో వర్షపాతం సాధారణ స్థాయికంటే చాలా తక్కువగా ఉండటమే కరవు ప్రధాన కారణమని అధికారులు వెల్లడించారు. పశువుల ఆహారం కొరత, తాగునీటి సమస్యలు కూడా ఈ ప్రాంతాల్లో పెరుగుతున్నాయి.
రాష్ట్ర ప్రభుత్వం రైతుల సమస్యలను గుర్తించి త్వరలో రిలీఫ్‌ చర్యలు చేపట్టే అవకాశం ఉంది. కరవు మండలాల గుర్తింపు అనంతరం ఇన్‌పుట్‌ సబ్సిడీలు, బోర్లు, తాగునీటి ట్యాంకర్లు, పశువుల ఆహారం పంపిణీ వంటి చర్యలు చేపట్టనున్నట్లు అధికార వర్గాలు సూచిస్తున్నాయి. మరోవైపు, పంట బీమా, రైతు భరోసా వంటి పథకాల కింద రైతులకు సహాయం అందించేలా వ్యవసాయ శాఖ ప్రణాళిక సిద్ధం చేస్తోంది. అయితే గత ఏడాదితో పోలిస్తే ఈసారి కరువు తీవ్రత కొంత మేర తగ్గినట్లు అధికారులు పేర్కొన్నారు. ప్రభుత్వం సమయానికి స్పందిస్తే రైతులకు ఉపశమనం లభిస్తుందని నిపుణులు అభిప్రాయపడుతున్నారు.
