రుచి మరియు వేడిని కాపాడే సంప్రదాయం.
భోజనంలో గౌరవానికి చిహ్నం.
చిన్న ముక్కలను పట్టుకునేందుకు సులభమైన సాధనం.
ఒక్కొక్క దేశం ఒక్కొక్క సాంప్రదాయాన్ని అలమరుచుకొని ఉంటుంది. అంతెందుకండోయ్ తినే ఆహారంలో కూడా విభినమైన శైలిలో ఉన్నాయి. చైనీస్ భోజనం పద్ధతి చూస్తే చాలామందికి ఒక డౌట్ వస్తుంది. ఏంటబ్బా వీరు ఎప్పుడు సన్నని కర్రలతోనే తింటారా అని సందేహం మనకు కూడా కలుగుతూ ఉంటుంది. దాని వెనుకున్న రహస్యాలను తెలుసుకుందామా మరి.
చైనీస్ భోజన పద్ధతి చూస్తే చాలామందికి కొంచెం ఆశ్చర్యంగా అనిపిస్తూ ఉంటుంది. ముందుగా కనిపించే విషయం పింగాణి బౌల్స్, చిన్న కప్పులు, చేతుల్లో రెండు సన్నని కర్రలు. ఇవన్నీ చూసి ఇలా ఎందుకు తింటారు? అనే ప్రశ్న సహజంగా వస్తుంది. చైనీస్ వాళ్లు చేతులతో గానీ, ఫోర్క్–స్పూన్లతో గానీ కాకుండా చాప్స్టిక్స్తో తినడం కేవలం అలవాటు కాదు దాని వెనుక శతాబ్దాలుగా ఏర్పడిన జీవనశైలి, సంస్కృతి, ఆహార తత్వం దాగి ఉంది.
చైనీస్ వంటకాల్లో కూరగాయలు, మాంసం, నూడుల్స్ అన్నీ ముందే చిన్న చిన్న ముక్కలుగా కట్ చేసి వండుతారు. అలా వండిన ఆహారాన్ని మళ్లీ ప్లేట్లో కట్ చేయాల్సిన అవసరం ఉండదు. అందుకే కత్తి లేదా ఫోర్క్ అవసరం లేకుండా, చిన్న ముక్కలను సులభంగా పట్టుకునే చాప్స్టిక్స్ ప్రాచుర్యంలోకి వచ్చాయి. ఇది తినడాన్ని వేగంగా, సౌకర్యంగా మార్చింది.
భోజనంలో పోర్సలిన్ లేదా పింగాణి పాత్రలకు ప్రత్యేక స్థానం ఉంది. ఇవి వేడిని ఎక్కువసేపు నిలుపుకుంటాయి. సూప్లు, నూడుల్స్ లాంటి ఆహారం చివరి ముక్క వరకూ వేడిగానే ఉంటుంది. అంతేకాదు, పింగాణి పాత్రలు వాసన లేదా రుచిని పట్టిపెట్టవు. ఒకే బౌల్లో వేర్వేరు వంటకాలు తిన్నా రుచి మారదు. అందుకే ఈ పాత్రలు చైనీస్ డైనింగ్లో ప్రధానంగా మారాయి.
వారి సంప్రదాయంలో ఒక్కొక్కరికి వేర్వేరు ప్లేట్లు కాకుండా, మధ్యలో పెద్ద డిష్లు పెట్టి అందరూ షేర్ చేసుకుని తినడం సాధారణం. అలాంటి సందర్భాల్లో చేతులతో తినడం అనారోగ్యకరం, అసభ్యంగా భావిస్తారు. చాప్స్టిక్స్ వాడటం వల్ల పరిశుభ్రత కాపాడబడుతుంది, ఇతరుల పట్ల గౌరవం చూపించినట్టు భావిస్తారు.
భారతదేశంలో చేతులతో తినడం ఎంత సహజమో, చైనాలో చాప్స్టిక్స్తో తినడం అంతే సహజం. ఇది తెలివితేటల విషయం కాదు, అలవాట్ల విషయం. ప్రతి దేశం తన ఆహారానికి, జీవనశైలికి అనుగుణంగా పద్ధతులు రూపొందించుకుంది. చైనీస్ డైనింగ్ విధానం కూడా అలాంటి ఒక సాంస్కృతిక పరిణామమే. అందుకే అది విచిత్రంగా కాకుండా అర్థవంతంగా చూడాల్సిన విషయం.
