గ్యాస్ వినియోగదారులారా జాగ్రత్త…
కోనసీమ గ్యాస్ ఏజెన్సీలపై చర్యలకు డిమాండ్…
ఓటీపీ ఇచ్చే ముందు ఈ వార్త తప్పక చదవండి…
Gas Agency: కోనసీమ జిల్లాలో గ్యాస్ వినియోగదారులను విస్మయానికి గురిచేస్తున్న ఒక వింత మోసం వెలుగులోకి వచ్చింది. సాధారణంగా మనం గ్యాస్ సిలిండర్ బుక్ చేసినప్పుడు, అది ఇంటికి డెలివరీ అయిన తర్వాతే మన మొబైల్కు వచ్చే ఓటీపీని (OTP) డెలివరీ బాయ్కు చెబుతుంటాం. కానీ, ఇక్కడ మాత్రం సిలిండర్ చేతికి అందకుండానే, వినియోగదారుల ఫోన్లకు ఓటీపీలు రావడం, ఆ వెంటనే గ్యాస్ డెలివరీ అయిపోయినట్లు మెసేజ్లు రావడం కలకలం రేపుతోంది. అమలాపురం పరిసర ప్రాంతాల్లో ఇలాంటి ఘటనలు పదేపదే జరుగుతుండటంతో బాధితులు లబోదిబోమంటున్నారు.
ఈ వ్యవహారం వెనుక గ్యాస్ ఏజెన్సీ సిబ్బంది హస్తం ఉందనే అనుమానాలు బలంగా వ్యక్తమవుతున్నాయి. సిలిండర్ బుక్ చేసిన కొద్దిసేపటికే డెలివరీ బాయ్స్ లేదా ఏజెన్సీ ప్రతినిధులు వినియోగదారులకు ఫోన్ చేసి, సర్వర్ సమస్య ఉందనో లేదా వెరిఫికేషన్ కోసమనో నమ్మబలికి ఓటీపీ అడుగుతున్నారు. అమాయక ప్రజలు వారు అడిగిందే తడవుగా ఓటీపీ చెప్పేస్తున్నారు. తీరా ఓటీపీ చెప్పిన తర్వాత గంటలు గడిచినా సిలిండర్ రాకపోగా, మీ సిలిండర్ విజయవంతంగా డెలివరీ చేయబడింది అనే సందేశం ఫోన్లోకి వస్తోంది. దీంతో వినియోగదారులు ఏజెన్సీల చుట్టూ తిరగాల్సి వస్తోంది.
నిజానికి ఇలా ఓటీపీలు తీసుకుని సిలిండర్లు ఇవ్వకపోవడం వెనుక పెద్ద దోపిడీ దాగి ఉంది. సబ్సిడీపై వచ్చే గృహ వినియోగ సిలిండర్లను రికార్డుల్లో డెలివరీ అయినట్లు చూపించి, వాటిని బ్లాక్ మార్కెట్లో హోటళ్లకు లేదా వాణిజ్య అవసరాలకు ఎక్కువ ధరకు విక్రయిస్తున్నట్లు తెలుస్తోంది. దీనివల్ల సామాన్య మధ్యతరగతి ప్రజలు తమకు రావాల్సిన గ్యాస్ కోటాను కోల్పోవడమే కాకుండా, చెల్లించిన డబ్బుకు ప్రతిఫలం పొందలేకపోతున్నారు. కోనసీమ జిల్లాలోని పలు మండలాల్లో ఈ దందా మూడు పువ్వులు ఆరు కాయలుగా సాగుతోందని స్థానికులు ఆవేదన వ్యక్తం చేస్తున్నారు.
ఈ సమస్యపై విసిగిపోయిన కొందరు బాధితులు తాజాగా అధికారులకు ఫిర్యాదు చేశారు. తమకు సిలిండర్ రాకుండానే డెలివరీ అయినట్లు ఎలా చూపిస్తారని ప్రశ్నిస్తూ ఆధారాలతో సహా గ్యాస్ అథారిటీ మరియు స్థానిక రెవెన్యూ అధికారుల దృష్టికి తీసుకెళ్లారు. ఓటీపీ ద్వారా జరిగే ఈ మోసాలను అరికట్టాలని, బాధ్యులైన ఏజెన్సీలపై కఠిన చర్యలు తీసుకోవాలని వారు డిమాండ్ చేస్తున్నారు. అధికారులు స్పందించి విచారణ చేపడితే ఈ గ్యాస్ మాఫియా వెనుక ఉన్న అసలు సూత్రధారులు బయటపడే అవకాశం ఉంది.
