- North America: సీక్రెట్ సర్వీస్ ఏజెంట్పై నిందితుడే కాల్పులు జరిపాడన్న అధికారులు..
- పటిష్ఠమైన భద్రతతో దాడిని నిమిషాల్లో అడ్డుకున్నామన్న సీక్రెట్ సర్వీస్..
Donald Trump: అమెరికా అధ్యక్షుడు డొనాల్డ్ ట్రంప్పై జరిగిన హత్యాప్రయత్నం కేసులో యూఎస్ ఫెడరల్ ప్రాసిక్యూటర్లు గురువారం ఒక కీలకమైన వీడియోను విడుదల చేయడంతో ఈ ఉదంతం మరో మలుపు తిరిగింది. ఏప్రిల్ 25న వాషింగ్టన్ డీసీలో జరిగిన వైట్హౌస్ కరస్పాండెంట్స్ డిన్నర్ కార్యక్రమంలో ఈ ఘటన చోటుచేసుకుంది. ఈ వీడియోలో నిందితుడు కోల్ థామస్ అలెన్ అత్యంత వేగంగా సెన్సార్ గేట్ల గుండా పరిగెత్తుకుంటూ వచ్చి, భద్రతా విధుల్లో ఉన్న పోలీస్ అధికారిపై కాల్పులకు తెగబడటం స్పష్టంగా కనిపిస్తోంది. ఈ దృశ్యాలు అప్పట్లో నెలకొన్న భీతావహ పరిస్థితిని కళ్లకు కడుతున్నాయి.
ఈ దాడి సమయంలో ఒక సీక్రెట్ సర్వీస్ అధికారి తూటా గాయానికి గురవ్వడం తీవ్ర చర్చకు దారితీసింది. అది నిందితుడి కాల్పుల వల్ల జరిగిందా లేక పొరపాటున తోటి సిబ్బంది జరిపిన 'ఫ్రెండ్లీ ఫైర్' వల్ల జరిగిందా అన్న అనుమానాలు వ్యక్తమయ్యాయి. అయితే, వాషింగ్టన్ యూఎస్ అటార్నీ జీనైన్ పిర్రో ఈ వీడియోను విడుదల చేస్తూ ఆ సందేహాలకు తెరదించారు. అధ్యక్షుడిని లక్ష్యంగా చేసుకునే క్రమంలో నిందితుడు అలెన్ నేరుగా అధికారిపై కాల్పులు జరిపినట్లు ఆధారాలు ఉన్నాయని, ఇందులో భద్రతా సిబ్బంది పొరపాటేమీ లేదని ఆమె వివరించారు. కాలిఫోర్నియాకు చెందిన 31 ఏళ్ల అలెన్, వృత్తిరీత్యా పార్ట్-టైమ్ ట్యూటర్ అయినప్పటికీ, ట్రంప్ ప్రభుత్వంపై వ్యతిరేకతతో ఈ దుశ్చర్యకు పాల్పడినట్లు ప్రాథమికంగా గుర్తించారు.
ప్రస్తుతం జైలు శిక్ష అనుభవిస్తున్న అలెన్, తనపై నమోదైన హత్యాయత్నం మరియు ఆయుధాల చట్టం కింద విచారణను ఎదుర్కొంటున్నాడు. ఈ కేసులో నేరం రుజువైతే అతనికి జీవిత ఖైదు పడే అవకాశం ఉందని న్యాయ నిపుణులు అభిప్రాయపడుతున్నారు. మరోవైపు, సీక్రెట్ సర్వీస్ డైరెక్టర్ సీన్ కరన్ మాట్లాడుతూ, ఆనాటి భద్రతా ఏర్పాట్లను సమర్థించారు. నిందితుడు ట్రంప్ ఉన్న వేదికకు 355 అడుగుల దూరంలో ఉన్నప్పుడే అత్యంత వేగంగా స్పందించి అతనిని అడ్డుకున్నామని, ఆ సమయంలో భద్రతా వలయం పటిష్టంగా ఉందని తెలిపారు. ఈ స్థాయి భద్రత ఉన్నప్పటికీ నిందితుడు అంత దూరం చొచ్చుకురావడం భద్రతా లోపమా లేక యాదృచ్ఛికమా అన్న చర్చ ఇప్పుడు అమెరికాలో మొదలైంది.
