ఆంధ్రప్రదేశ్ ప్రభుత్వం తాజాగా ఒక జీవో విడుదల చేస్తూ, రాష్ట్రంలోని ప్రభుత్వ పాఠశాలలపై కీలక నిబంధనలు విధించింది. ఈ జీవో ప్రకారం, ఇకపై ప్రభుత్వ స్కూళ్లలోకి రాజకీయ నాయకులు, ఇతర వ్యక్తులు అనుమతి లేకుండా ప్రవేశించకూడదని స్పష్టం చేసింది. అలాగే, స్కూల్ ఆవరణలో రాజకీయ పార్టీల బ్యానర్లు, పోస్టర్లు ఏర్పాటు చేయడం పూర్తిగా నిషేధించింది. విద్యార్థులపై రాజకీయ ప్రభావం ఉండకూడదనే ఉద్దేశంతో ఈ చర్యలు తీసుకున్నట్లు తెలియజేసింది.
ఇంకా, విద్యార్థులకు బహుమతులు ఇవ్వాలన్నా, స్కూళ్లకు విరాళాలు అందించాలన్నా ముందు సంబంధిత అధికారుల అనుమతి తీసుకోవాలని ప్రభుత్వం సూచించింది. తల్లిదండ్రులు మరియు పాఠశాల నిర్వహణ సంఘం (SMC) సభ్యులను మాత్రం ఈ నిబంధనల నుండి మినహాయించింది.
విద్యార్థుల ఫోటోలు ఎవరైనా తీసుకోవడం పూర్తిగా నిషేధించబడిందని పేర్కొంది. ఉపాధ్యాయులు లేదా విద్యార్థులను ఎవరైనా వ్యక్తిగతంగా కలవాలంటే, దానికి అనుమతి ఉండాలని, లేకపోతే అవకాశం లేదని స్పష్టం చేసింది. స్కూల్ సంబంధిత ఎలాంటి ఫిర్యాదులు ఉన్నా, అవి నేరుగా పాఠశాల యాజమాన్యానికి లేదా సంబంధిత విద్యా శాఖ అధికారులకు అందజేయాలని తెలిపింది.
ఈ జీవో ద్వారా విద్యా సంస్థల్లో నిష్పాక్షికత, విద్యార్థుల హక్కులు, భద్రత పరిరక్షించాలనే ప్రభుత్వ ఉద్దేశం స్పష్టంగా కనిపిస్తోంది. పాఠశాలల వాతావరణాన్ని రాజకీయ రహితంగా ఉంచేందుకు ఈ చర్యలు చాలా కీలకంగా భావిస్తున్నారు.
