పాకిస్థాన్లోని లాహోర్ నగరం శుక్రవారం రాత్రి రణరంగాన్ని తలపించింది. ఇజ్రాయెల్ చర్యలకు వ్యతిరేకంగా తెహ్రీక్-ఎ-లబ్బైక్ పాకిస్థాన్ (టీఎల్పీ) పార్టీ ఆధ్వర్యంలో చేపట్టిన భారీ ర్యాలీ హింసాత్మకంగా మారింది. పోలీసులు, నిరసనకారులు పరస్పరం ఎదురెదురుగా దాడులు చేసుకోవడంతో నగరమంతా ఉద్రిక్త వాతావరణం నెలకొంది. ఘర్షణల్లో ఒక పోలీస్ అధికారి ప్రాణాలు కోల్పోగా, పలు ప్రదర్శనకారులు కూడా తీవ్రంగా గాయపడ్డారు. అల్లర్ల కారణంగా లాహోర్లో జనజీవనం పూర్తిగా స్తంభించింది.
పాలస్తీనాకు మద్దతుగా, అమెరికా రాయబార కార్యాలయం వైపు లాంగ్ మార్చ్ నిర్వహించాలని టీఎల్పీ నిర్ణయించింది. వేలాదిమంది కార్యకర్తలు ఈ ప్రదర్శనలో పాల్గొన్నారు. లాహోర్ నగరంలో పోలీసులు రహదారులపై కంటైనర్లు, అడ్డంకులు ఏర్పాటు చేయగా, ఆందోళనకారులు వాటిని తొలగించడానికి ప్రయత్నించారు. ఈ క్రమంలో పరిస్థితి హఠాత్తుగా అదుపు తప్పి, రెండు వర్గాల మధ్య రాళ్లు, కర్రలు విసురుకుపోయాయి. పోలీసులు లాఠీ చార్జ్ చేసి, టియర్గ్యాస్ షెల్స్ వదిలారు. ఈ సమయంలో నిరసనకారులు కాల్పులు జరిపారని, అందులో ఒక అధికారి మృతిచెందినట్లు పంజాబ్ పోలీస్ చీఫ్ ఉస్మాన్ అన్వర్ తెలిపారు.
ఇదే సమయంలో టీఎల్పీ అధినేత సాద్ రిజ్వీ కూడా ఈ ఘర్షణల్లో గాయపడ్డారు. ఆయనకు తీవ్రమైన బుల్లెట్ గాయాలైనట్లు పార్టీ ప్రకటించింది. గాయపడే ముందు విడుదలైన వీడియోలో రిజ్వీ పోలీసులను కాల్పులు ఆపాలని కోరుతూ, చర్చలకు తాను సిద్ధంగా ఉన్నానని పేర్కొన్నారు. ఆ సమయంలో కూడా కాల్పుల శబ్దాలు వినిపించడంతో పరిస్థితి ఎంత విషమంగా ఉందో అర్థమైంది. పార్టీ మద్దతుదారుల మరణాలకు పోలీసులు కారణమని టీఎల్పీ ఆరోపిస్తుండగా, భద్రతా దళాలు మాత్రం ఆందోళనకారులే మొదట కాల్పులు జరిపారని వాదిస్తున్నాయి.
ఈ సంఘటనల నేపథ్యంలో లాహోర్ నగరంలో భయాందోళనలు నెలకొన్నాయి. పలు వాహనాలు, బైకులు దగ్ధమయ్యాయి. పోలీసులు ఇప్పటివరకు 100 మందికి పైగా ఆందోళనకారులను అరెస్టు చేశారు. పాకిస్థాన్ అంతర్గత వ్యవహారాల ఉప మంత్రి తలాల్ చౌదరి మాట్లాడుతూ, గాజా యుద్ధం ముగిసిన ఈ సమయంలో టీఎల్పీ హింసకు దిగడాన్ని ప్రభుత్వం తీవ్రంగా ఖండిస్తున్నట్లు తెలిపారు. శాంతి, చర్చల మార్గంలో సమస్యలను పరిష్కరించకుండా మతపరమైన హింసను రెచ్చగొట్టడం దేశానికి ముప్పని ఆయన హెచ్చరించారు.
