ఫుడ్ డెలివరీ రంగంలో అగ్రగామిగా నిలిచిన జొమాటో వినియోగదారుల ఆరోగ్యంపై ప్రత్యేక దృష్టి పెట్టింది. అందులో భాగంగా తాజాగా ‘హెల్తీమోడ్’ పేరుతో ఒక సరికొత్త ఫీచర్ను పరిచయం చేసింది. ఈ ఫీచర్ ద్వారా కస్టమర్లు ఆర్డర్ చేసే ముందు ఆహార పదార్థాల్లోని పోషక విలువలను తెలుసుకునే వీలు కల్పించనుంది. పోషకాహారంపై అవగాహన పెంచడం, వినియోగదారులు ఆరోగ్యకరమైన ఆహారాన్ని ఎంచుకునేలా చేయడం ఈ ప్రాజెక్ట్ ప్రధాన ఉద్దేశ్యంగా కంపెనీ తెలిపింది.
జొమాటో సీఈఓ దీపిందర్ గోయల్ ప్రకారం, హెల్తీమోడ్లో ప్రతి వంటకానికి ఒక స్కోర్ కేటాయించబడుతుంది. ఈ స్కోర్లో ప్రొటీన్లు, కాంప్లెక్స్ కార్బ్స్, ఫైబర్, మైక్రోన్యూట్రియెంట్స్ వంటి అంశాలను పరిగణనలోకి తీసుకుంటారు. స్కోర్ రేంజ్ లో నుంచి సూపర్ వరకు ఉంటుందని వెల్లడించారు. అంటే వినియోగదారులు ఆర్డర్ చేసే ఆహారం ఆరోగ్యపరంగా ఎంత ప్రయోజనకరమో ముందుగానే తెలుసుకోవచ్చు. దీని ద్వారా సరైన డైట్ ఫుడ్ ఎంపిక చేయడం సులభమవుతుందని ఆయన చెప్పారు.
హెల్తీమోడ్ ఫీచర్ను ప్రస్తుతం గురుగ్రామ్లో ట్రయల్ బేసిస్లో ప్రారంభించారని జొమాటో వెల్లడించింది. వినియోగదారుల స్పందన ఆధారంగా ఈ ఫీచర్ను దేశంలోని ఇతర ప్రధాన నగరాల్లో కూడా త్వరలోనే ప్రవేశపెట్టాలని కంపెనీ యోచిస్తోంది. దీని ద్వారా ఫుడ్ డెలివరీ అనుభవం కేవలం రుచికరమైన ఆహారం వరకే కాకుండా, ఆరోగ్యకరమైన ఆహారం వైపు కూడా దారి తీస్తుందని అధికారులు పేర్కొన్నారు.
జొమాటో ఎప్పటినుంచో ‘బెటర్ ఫుడ్ ఫర్ మోర్ పీపుల్’ అనే మిషన్తో ముందుకు సాగుతోందని సీఈఓ గోయల్ తెలిపారు. ఈ హెల్తీమోడ్ ఆ మిషన్కు మరింత దగ్గరగా తీసుకువెళ్తుందని ఆయన అన్నారు. వినియోగదారులు ఈ ఫీచర్పై సూచనలు, అభిప్రాయాలు తెలియజేయాలని కోరారు. దీని ద్వారా లోపాలు సవరించి మరింత మెరుగైన హెల్తీమోడ్ వెర్షన్ను దేశవ్యాప్తంగా అందించనున్నట్లు చెప్పారు.
