అమెరికాలో టెక్, హెల్త్కేర్ రంగాల్లో నైపుణ్యం ఉన్న విదేశీ ఉద్యోగుల కోసం డిమాండ్ రోజురోజుకూ పెరుగుతోంది. ఈ క్రమంలో PERM ప్రాసెస్ (Permanent Labor Certification) అనే విధానం ద్వారా అమెరికా కంపెనీలు ఎక్కువగా ఉద్యోగులను నియమించుకుంటున్నాయి. ఇది అమెరికా Department of Labor (DOL) ఆధ్వర్యంలో నడుస్తుంది. దీని ఉద్దేశం ఏమిటంటే – విదేశీయులను ఉద్యోగంలోకి తీసుకోవడం వలన అమెరికా కార్మికుల వేతనాలు లేదా ఉద్యోగ అవకాశాలు దెబ్బతినకూడదు అని నిర్ధారించడం.
PERM ద్వారా గ్రీన్ కార్డ్కు దరఖాస్తు చేసుకోవడం H-1B వీసా హోల్డర్లకు ముఖ్యమైన దశ. ఒక అమెరికా కంపెనీ తమ ఉద్యోగిని శాశ్వతంగా నియమించుకోవాలని భావిస్తే, ముందుగా వారు DOL నుండి సర్టిఫికేషన్ తీసుకోవాలి. ఈ ప్రక్రియలో, ఆ ఉద్యోగానికి సరిపోయే అమెరికన్ అభ్యర్థులు లేరని నిర్ధారించాలి. అలాగే విదేశీయులు పనిచేయడం వలన స్థానికుల వేతనాలు లేదా వర్కింగ్ కండీషన్స్ దెబ్బతినకూడదనే షరతు ఉంటుంది.
PERM ప్రాసెస్లో ప్రధానంగా నాలుగు దశలు ఉంటాయి. మొదట, కంపెనీ ఫుల్టైమ్ ఉద్యోగం కోసం ఖచ్చితమైన బాధ్యతలు, అర్హతలు నిర్ణయించాలి. రెండవ దశలో, Prevailing Wage Determination (PWD) అనే సర్టిఫికెట్ను తీసుకోవాలి. మూడవ దశలో, స్థానిక అభ్యర్థులకు అవకాశం ఇవ్వడానికి పత్రికల్లో ఉద్యోగ ప్రకటనలు, నోటీసులు ఇవ్వాలి. చివరగా, FLAG సిస్టమ్ (Foreign Labor Application Gateway) ద్వారా ఆన్లైన్లో PERM అప్లికేషన్ సమర్పించాలి.
ప్రస్తుతం ఈ ప్రాసెస్లో ఆలస్యం, తిరస్కరణలు ఎక్కువగా ఎదురవుతున్నాయి. DOL 2024 మార్చిలో దాఖలు చేసిన కొన్ని అప్లికేషన్లు ఇంకా ప్రాసెస్ చేస్తోంది. దీంతో H-1B ఆరు సంవత్సరాల గడువు దగ్గరపడినవారికి సమస్యలు వస్తున్నాయి. వారి PERM అప్రూవల్ ఆలస్యమైతే, వీసా పొడిగింపుపై సమస్యలు తలెత్తుతాయి.
అయినా, అమెరికా కంపెనీలకు PERM చాలా అవసరం. ప్రత్యేకంగా AI, హెల్త్కేర్ రంగాల్లో నైపుణ్యం కలిగిన ఉద్యోగులు కొరతగా ఉండటంతో, ఈ ప్రాసెస్ ద్వారా వారిని నియమించుకోవడం తప్పనిసరి అవుతోంది. ప్రభుత్వం FLAG సిస్టమ్లో మార్పులు చేసి ఆలస్యాలు తగ్గించే ప్రయత్నం చేస్తోంది కానీ, దరఖాస్తుల సంఖ్య ఎక్కువ కావడంతో ఇంకా క్యూలు పెరుగుతున్నాయి. కనుక ఉద్యోగదారులు, అప్లికెంట్లు అధికారిక మార్గదర్శకాలను జాగ్రత్తగా అనుసరించడం మంచిది.
