మీరు రేపు (మంగళవారం) బ్యాంకులో ఏదైనా ముఖ్యమైన పని పెట్టుకున్నారా? అయితే మీ ప్లాన్ మార్చుకోవాల్సిందే. ఎందుకంటే దేశవ్యాప్తంగా ప్రభుత్వ రంగ బ్యాంకుల ఉద్యోగులు సమ్మెకు దిగుతున్నారు. ఆదివారం సాధారణ సెలవు, సోమవారం గణతంత్ర దినోత్సవం కావడంతో ఇప్పటికే రెండు రోజులు బ్యాంకులు పనిచేయలేదు. ఇప్పుడు మంగళవారం సమ్మె కావడంతో వరుసగా మూడు రోజులు బ్యాంకులు మూతపడనున్నాయి. దీనివల్ల సామాన్యులకు, వ్యాపారులకు ఆర్థిక లావాదేవీల పరంగా ఇబ్బందులు తప్పేలా లేవు. బ్యాంకుల సమ్మెకు గల కారణాలు, దీని ప్రభావం ఎలా ఉండబోతుందో ఇక్కడ వివరంగా తెలుసుకుందాం…
ఎందుకు ఈ సమ్మె? ప్రధాన డిమాండ్లు ఏమిటి?
యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) ఈ సమ్మెకు పిలుపునిచ్చింది. బ్యాంకు ఉద్యోగుల ప్రధాన డిమాండ్ ఏంటంటే.. వారానికి ఐదు రోజుల పనిదినాలను (5-Day Week) అమలు చేయడం. ప్రస్తుతం బ్యాంకులు నెలలో రెండో మరియు నాలుగో శనివారాలు మాత్రమే సెలవు ఇస్తున్నాయి. మిగిలిన శనివారాల్లో బ్యాంకులు పనిచేస్తున్నాయి. అన్ని శనివారాలను సెలవు దినాలుగా ప్రకటించాలని ఉద్యోగ సంఘాలు కోరుతున్నాయి. ఈ నెల 23న చీఫ్ లేబర్ కమిషనర్తో బ్యాంకు సంఘాలు జరిపిన చర్చలు ఫలించలేదు. ప్రభుత్వం నుంచి స్పష్టమైన హామీ రాకపోవడంతో సమ్మెకు వెళ్లక తప్పడం లేదని యూనియన్ నేతలు స్పష్టం చేశారు.
సామాన్యులపై సమ్మె ప్రభావం ఎలా ఉంటుంది?
ప్రభుత్వ రంగ బ్యాంకులైన ఎస్బీఐ (SBI), పంజాబ్ నేషనల్ బ్యాంక్ (PNB), బ్యాంక్ ఆఫ్ బరోడా వంటి సంస్థల్లో సేవలు పూర్తిగా నిలిచిపోనున్నాయి. బ్యాంకు బ్రాంచ్లలో నగదు డిపాజిట్ చేయడం లేదా విత్డ్రా చేయడం రేపు సాధ్యం కాదు. వరుస సెలవుల వల్ల చెక్కుల క్లియరెన్స్ ప్రక్రియ ఆలస్యమవుతుంది. దీనివల్ల వ్యాపారస్తులకు పేమెంట్లలో ఇబ్బందులు కలగవచ్చు. డిజిటల్ ట్రాన్సాక్షన్స్ (UPI) పనిచేసినప్పటికీ, వరుసగా మూడు రోజులు బ్యాంకులు మూసి ఉండటంతో ఏటీఎంలలో నగదు కొరత ఏర్పడే అవకాశం ఉంది.
ప్రైవేట్ బ్యాంకుల పరిస్థితి ఏమిటి?
ప్రభుత్వ బ్యాంకులు సమ్మెలో ఉన్నప్పటికీ, ప్రైవేట్ రంగ బ్యాంకులైన HDFC, ICICI, Axis వంటివి యథావిధిగా పనిచేస్తాయి. ఆయా బ్యాంకు ఉద్యోగులు ఈ సమ్మెలో పాల్గొనడం లేదు. కాబట్టి ప్రైవేట్ బ్యాంకు ఖాతాదారులు తమ పనులను పూర్తి చేసుకోవచ్చు. అలాగే ఇంటర్నెట్ బ్యాంకింగ్, మొబైల్ బ్యాంకింగ్ మరియు యూపీఐ (PhonePe, Google Pay) సేవలకు ఎలాంటి అంతరాయం ఉండదు.
బ్యాంకు ఉద్యోగుల డిమాండ్లపై ఇండియన్ బ్యాంక్స్ అసోసియేషన్ (IBA)తో గతంలోనే ఒప్పందం కుదిరినా, ప్రభుత్వం నుంచి అధికారిక గెజిట్ నోటిఫికేషన్ ఇంకా రాలేదు. అందుకే ఈ సమ్మె అనివార్యమైంది. రేపు బ్యాంకింగ్ సేవలు అందుబాటులో ఉండవు కాబట్టి, మీ అత్యవసర పనులను బుధవారం నాటికి వాయిదా వేసుకోవడం లేదా డిజిటల్ పద్ధతుల్లో పూర్తి చేసుకోవడం ఉత్తమం.
