భారత రైల్వే క్రీడాకారులకు మరోసారి మంచి అవకాశాన్ని కల్పించింది. ఉత్తర తూర్పు రైల్వే (North Eastern Railway) 2025–26 సంవత్సరానికి క్రీడా కోటా కింద ఉద్యోగాల నోటిఫికేషన్ విడుదల చేసింది. అథ్లెటిక్స్‌, రెజ్లింగ్‌, హ్యాండ్‌బాల్‌, ఫుట్‌బాల్‌, వెయిట్‌లిఫ్టింగ్‌, బాస్కెట్‌బాల్‌, బాక్సింగ్‌, క్రికెట్‌, వాలీబాల్‌, కబడ్డీ, హాకీ, స్విమ్మింగ్‌ వంటి క్రీడల్లో ప్రతిభ కనబరిచిన వారు ఈ ఉద్యోగాలకు దరఖాస్తు చేసుకోవచ్చు.
ఈ పోస్టులకు దరఖాస్తు చేసుకునే అభ్యర్థులు పోస్టు ఆధారంగా పదో తరగతి, ఇంటర్మీడియట్‌, ఐటీఐ లేదా డిగ్రీ అర్హత కలిగి ఉండాలి. అదనంగా, వారు రాష్ట్ర లేదా జాతీయ స్థాయిలో క్రీడా పోటీల్లో పాల్గొనడం లేదా పతకాలు సాధించి ఉండాలి. వయోపరిమితి 2026 జనవరి 1 నాటికి 18 నుంచి 25 సంవత్సరాల మధ్య ఉండాలి.
దరఖాస్తు ప్రక్రియ పూర్తిగా ఆన్లైన్ ద్వారా ఉంటుంది. అర్హులైన అభ్యర్థులు నవంబర్ 10, 2025లోపు దరఖాస్తు చేసుకోవాలి. ఫీజు కింద సాధారణ వర్గానికి రూ.500, ఎస్సీ, ఎస్టీ, ఈబీసీ, మైనారిటీలు, మహిళలు, దివ్యాంగులు, ఎక్స‍్‌ సర్వీస్‌మెన్‌ అభ్యర్థులు రూ.250 చెల్లించాలి.
ఈ ఉద్యోగాలకు రాతపరీక్ష ఉండదు. ఎంపిక విద్యార్హత, క్రీడా విజయాలు, గేమ్ స్కిల్, ఫిజికల్ ఫిట్‌నెస్‌, ట్రయల్స్‌ మరియు డాక్యుమెంట్ వెరిఫికేషన్ ఆధారంగా జరుగుతుంది. అభ్యర్థుల ప్రతిభను నిష్పక్షపాతంగా అంచనా వేసి తుది ఎంపిక చేస్తారు.
ఎంపికైన అభ్యర్థులకు ప్రభుత్వ నియమాల ప్రకారం జీతభత్యాలతోపాటు ఇతర అలవెన్స్‌లు లభిస్తాయి. రైల్వే శాఖ ఈ నియామకాన్ని క్రీడా ప్రతిభను గుర్తించి ప్రోత్సహించడానికి చేపట్టింది. ఇది యువ క్రీడాకారులకు దేశ సేవ చేసే అద్భుతమైన అవకాశం అని చెప్పవచ్చు.
