- నటుడు విజయ్ తన ఎమ్మెల్యేలను అదుపులో ఉంచుకోవాలని హితవు..
- Politics: ఇస్లాం, క్రైస్తవంపై మాట్లాడితే ఈ నేతలు సహిస్తారా? అని సూటి ప్రశ్న..
Khushbu Sundar: తమిళనాడు రాజకీయాల్లో 'సనాతన ధర్మం' అంశం మరోసారి తీవ్ర దుమారం రేపుతోంది. సనాతన ధర్మాన్ని పూర్తిగా నిర్మూలించాలంటూ అధికార డీఎంకే నేత ఉదయనిధి స్టాలిన్ మరియు ఇటీవల రాజకీయాల్లోకి వచ్చిన ప్రముఖ నటుడు విజయ్ నేతృత్వంలోని తమిళగ వెట్రి కళగం (టీవీకే) పార్టీ ఎమ్మెల్యే వి.ఎస్. ముస్తఫా చేసిన వివాదాస్పద వ్యాఖ్యలపై బీజేపీ జాతీయ నాయకురాలు, నటి ఖుష్బూ సుందర్ తీవ్రస్థాయిలో ధ్వజమెత్తారు. కేవలం మైనారిటీ ఓట్ల బుజ్జగింపు రాజకీయాల కోసమే హిందూ మతాన్ని, మెజారిటీ ప్రజల మనోభావాలను కించపరచడం ఇక్కడి నాయకులకు ఒక ఫ్యాషన్గా మారిందని ఆమె మండిపడ్డారు. శనివారం సోషల్ మీడియా వేదికగా స్పందించిన ఖుష్బూ, డీఎంకే నేతల ద్వంద్వ వైఖరిని సూటిగా ప్రశ్నిస్తూ.. తాను పుట్టుకతో ఒక ముస్లింనని, ఒకవేళ తాను ఇస్లాం లేదా క్రైస్తవ మతంలోని కొన్ని పద్ధతులు బాగోలేవని, వాటిని నిర్మూలించాలని వ్యాఖ్యానిస్తే ఈ నాయకులు అంగీకరిస్తారా అని నిలదీశారు. ఇతర మతాలకు వ్యతిరేకంగా ఎవరైనా చిన్న మాట మాట్లాడినా ముఖ్యమంత్రి చూస్తూ ఊరుకోరని, కానీ హిందూ మతాన్ని లక్ష్యంగా చేసుకోవడం మాత్రం ఇక్కడ నిరంతరం కొనసాగుతోందని ఆమె ఘాటుగా విమర్శించారు.
ఈ వివాదంలో ఉదయనిధి స్టాలిన్ను వ్యక్తిగతంగా లక్ష్యంగా చేసుకున్న ఖుష్బూ, ఆయన కుటుంబ పద్ధతులను ప్రస్తావిస్తూ కౌంటర్ ఇచ్చారు. సనాతన ధర్మంపై అంతగా ద్వేషం ఉన్న ఉదయనిధి, ముందుగా తన ఇంట్లోని మహిళలను నియంత్రించాలని హితవు పలికారు. ఆయన తల్లి, అత్తలు మరియు మాజీ మహిళా సహచరులు నుదుటన పెద్ద బొట్టు పెట్టుకుని నిత్యం హిందూ దేవాలయాలను సందర్శిస్తుంటారని గుర్తుచేసిన ఆమె, వారిని గుడులకు వెళ్లొద్దని, తాము హిందువులం కాదని ప్రకటించుకోమని చెప్పే ధైర్యం ఉదయనిధికి ఉందా అని సవాల్ విసిరారు. సొంత ఇంట్లోనే సనాతన ధర్మాన్ని ఆచరిస్తున్నప్పుడు, బయటకు వచ్చి సమాజంలో ద్వేషం నూరపడం సరికాదనే రీతిలో ఆమె తన అభిప్రాయాన్ని వ్యక్తపరిచారు.
ఇదే క్రమంలో ముఖ్యమంత్రిగా బాధ్యతలు చేపట్టిన నటుడు విజయ్ను ఉద్దేశిస్తూ ఖుష్బూ కొన్ని కీలక వ్యాఖ్యలు చేశారు. కొత్తగా గెలిచిన ఉత్సాహంలో ఆయన పార్టీ ఎమ్మెల్యేలు మతాల మధ్య చిచ్చు పెట్టేలా మాట్లాడుతున్నారని, తక్షణమే వారి నోళ్లకు తాళం వేయాలని విజయ్కు సూచించారు. సనాతన ధర్మం ఎప్పుడూ సర్వమత సమానత్వాన్ని, లోక కల్యాణాన్నే కోరుకుంటుందని, పదవిలోకి రాగానే ఇలాంటి మతపరమైన విభజన తీసుకురావడం మంచి పద్ధతి కాదని పేర్కొన్నారు. మీ రాజకీయాలు డీఎంకే దయాదాక్షిణ్యాలపై ఆధారపడి సాగుతున్నాయని మాకు తెలుసని, కానీ ప్రజలు మీ నుంచి విభజన రాజకీయాలు కాకుండా మెరుగైన పాలనను కోరుకుంటున్నారని ఆమె స్పష్టం చేశారు. ఖుష్బూ చేసిన ఈ ఘాటు వ్యాఖ్యలతో తమిళనాట సనాతన ధర్మం చుట్టూ తిరుగుతున్న రాజకీయ పోరు మరింత వేడెక్కింది.
