Politics- మాయమైన భూములు.. ఫోర్జరీ సంతకాల వెనుక ఉన్న ఆ 'పెద్దల' హస్తం…
₹10 కోట్ల ఆస్తి మాయం: ద్వారంపూడి ఇలాకాలో ఏం జరిగింది…
పది వేల లంచం ఇచ్చినా కదలని ఫైళ్లు…
Prajavedhika: మంగళగిరిలోని తెలుగుదేశం పార్టీ కేంద్ర కార్యాలయంలో నిర్వహించిన ప్రజా ఫిర్యాదుల స్వీకరణ కార్యక్రమంలో రాష్ట్రవ్యాప్తంగా వివిధ ప్రాంతాల నుండి వచ్చిన బాధితులు తమ ఆవేదనను వెళ్లగక్కారు. ప్రధానంగా గత ప్రభుత్వ హయాంలో రాజకీయ అండదండలతో జరిగిన భూ కబ్జాలు, అధికారుల నిర్లక్ష్యంపై మంత్రి వాసంశెట్టి సుభాష్ మరియు ఎమ్మెల్సీ బీ.టీ. నాయుడులకు అర్జీలు సమర్పించారు. సామాన్యుల భూములను నకిలీ పత్రాలతో ఆక్రమించడం, రీ-సర్వే పేరుతో రికార్డులను తారుమారు చేయడం వంటి అంశాలు ఈ వినతుల్లో ప్రధానంగా వెలుగులోకి వచ్చాయి.
ముఖ్యంగా కాకినాడలో సుమారు ₹10 కోట్ల విలువైన వారసత్వ ఆస్తిని మాజీ ఎమ్మెల్యే ద్వారంపూడి చంద్రశేఖర్ రెడ్డి ప్రోత్సాహంతో వైసీపీ నేతలు కబ్జా చేశారని వెంకటరమణ అనే బాధితుడు ఫిర్యాదు చేశారు. ఫోర్జరీ సంతకాలు, తప్పుడు మరణ ధృవీకరణ పత్రాలు సృష్టించి అక్కడ అక్రమంగా అపార్ట్మెంట్లు నిర్మిస్తున్నారని ఆవేదన వ్యక్తం చేశారు. అలాగే సత్యసాయి జిల్లాలో వైసీపీ ఎంపీటీసీ ఒకరు తన భూమికి కనీసం దారి లేకుండా ఆక్రమించుకున్నారని, దీనిపై కలెక్టర్, ఎస్పీలకు ఫిర్యాదు చేసినా స్థానిక అధికారులు పట్టించుకోలేదని మరో బాధితుడు మొరపెట్టుకున్నారు.
నంద్యాల జిల్లాకు చెందిన ఒక రైతు తన భూమిని కాపాడుకునే క్రమంలో ఎదుర్కొన్న ఇబ్బందులు అందరినీ కలిచివేసాయి. గ్రామానికి చెందిన వైసీపీ సర్పంచ్ తన భూమిని ఆశించి, కావాలనే వంక (వాగు) నీటిని తన ఇంటి మీదకు మళ్లించారని, దీనివల్ల నివసించే పరిస్థితి లేదని బాధితుడు ఆరోపించారు. సర్వే కోసం సర్వేయర్కు ₹10 వేలు లంచం ఇచ్చినా ఫలితం లేదని ఫిర్యాదు చేశారు. కర్నూలు జిల్లా కల్లూరులో కూడా 7 ఎకరాల భూమిని నకిలీ డాక్యుమెంట్లతో ఆక్రమించుకుని, తమకు ప్రాణహాని తలపెడుతున్నారని మహమ్మద్ ఖాన్ అనే వ్యక్తి విన్నవించారు.
అధికారుల నిర్లక్ష్యం వల్ల నిరక్షరాస్యులు ఎలా మోసపోతున్నారో బత్తలపల్లికి చెందిన మారెక్క ఉదంతం స్పష్టం చేస్తోంది. అగ్నిప్రమాదంలో సర్వస్వం కోల్పోయిన ఆమెకు సహాయం చేస్తామని నమ్మించి, అప్పటి రెవెన్యూ అధికారులు ఆమె సంతకాలను ఆసరాగా తీసుకుని తనకున్న భూమిని వేరే వ్యక్తి పేరున ఆన్లైన్ చేశారని ఫిర్యాదులో పేర్కొన్నారు. అలాగే రీ-సర్వే లోపాల వల్ల పట్టా భూములు ప్రభుత్వ భూములుగా మారుతున్నాయని, రికార్డుల్లో పేర్లు మాయమవుతున్నాయని పలువురు మహిళలు కన్నీరుమున్నీరయ్యారు.
బాధితుల గోడు విన్న మంత్రి వాసంశెట్టి సుభాష్ స్పందిస్తూ, ప్రజా సమస్యల పరిష్కారమే ఈ ప్రభుత్వ ధ్యేయమని స్పష్టం చేశారు. భూ కబ్జాలు, అక్రమ రిజిస్ట్రేషన్లపై విచారణ జరిపి దోషులపై కఠిన చర్యలు తీసుకుంటామని భరోసా ఇచ్చారు. అర్జీదారుల సమస్యలను ఆయా జిల్లాల అధికారుల దృష్టికి తీసుకెళ్లి, బాధితులకు త్వరితగతిన న్యాయం జరిగేలా చూస్తామని హామీ ఇచ్చారు. కేవలం భూ వివాదాలే కాకుండా పింఛన్లు, రేషన్ కార్డులు మరియు ఉద్యోగాల కోసం వచ్చిన అర్జీలను కూడా పరిశీలించి తగిన చర్యలు తీసుకుంటామని వెల్లడించారు.
