టీడీపీ కార్యకర్తలతో పసుపుమయమైన బ్రిస్బేన్ నగరం..
ఆత్మీయ కలయిక.. ఉత్సాహభరిత వేడుక.. నాయకుడి విజన్ పై ప్రశంసలు..
బ్రిస్బేన్: ఆస్ట్రేలియాలోని క్వీన్స్లాండ్ రాష్ట్రం, బ్రిస్బేన్ నగరం పసుపుమయమైంది. ఆంధ్రప్రదేశ్ ముఖ్యమంత్రి, తెలుగుదేశం పార్టీ అధినేత నారా చంద్రబాబు నాయుడు (CBN) గారి పుట్టినరోజును పురస్కరించుకుని, అక్కడి టీడీపీ అభిమానులు అత్యంత ఉత్సాహంగా వేడుకలను నిర్వహించారు. మాతృభూమికి దూరంగా ఉన్నా, తమ ప్రియతమ నాయకుడిపై ఉన్న గౌరవాన్ని, ప్రేమని ఈ వేడుకల ద్వారా చాటుకున్నారు.
బ్రిస్బేన్ నగరంలో జరిగిన ఈ కార్యక్రమంలో తెలుగువారందరూ ఒకచోట చేరి చంద్రబాబు నాయుడు గారికి పుట్టినరోజు శుభాకాంక్షలు తెలియజేశారు. "హ్యాపీ బర్త్ డే చంద్రన్న" అంటూ చేసిన నినాదాలతో ఆ ప్రాంతం మారుమోగింది. ఈ సందర్భంగా కేక్ కట్ చేసి ఒకరికొకరు మిఠాయిలు తినిపించుకుంటూ పండుగలా జరుపుకున్నారు.
ఈ వేడుకల్లో పలువురు ప్రవాసాంధ్రులు మరియు టీడీపీ మద్దతుదారులు క్రియాశీలకంగా పాల్గొన్నారు. కార్యక్రమంలో పాల్గొన్న వారిలో గుడురు రామకృష్ణ, చలసాని రవి, నాగేష్ బోడపాటి, గౌతమ్ మంచికలపూడి, మణి మెద్దల, తరుణ్ వరాహ, రవి గద్దిపాటి, రాజేష్ కనికాటి, ఉమాదేవి గుడురు, హారిక కోనేరు, మనోజ్ వేముల, విద్యాధర్ రెడ్డి పొత్తా, గురురాజ్ అనేగొంది తదితరులు పాల్గొన్నారు, వీరితో పాటు పెద్ద సంఖ్యలో ఇతర టీడీపీ మద్దతుదారులు, ప్రవాస తెలుగు కుటుంబాలు పాల్గొని ఈ కార్యక్రమాన్ని విజయవంతం చేశారు.
ఈ సందర్భంగా మాట్లాడిన అభిమానులు, చంద్రబాబు నాయుడు గారి అభివృద్ధి విజన్ మరియు ఆయన చేసిన సేవలను గుర్తుచేసుకున్నారు. ఆంధ్రప్రదేశ్ మళ్ళీ అభివృద్ధి పథంలో పడాలంటే ఆయన నాయకత్వం ఎంతో అవసరమని వారు అభిప్రాయపడ్డారు. పరాయి దేశంలో ఉన్నా మన సంస్కృతిని, మన నాయకుడిపై ఉన్న అభిమానాన్ని ఇలా పంచుకోవడం తమకు ఎంతో సంతోషాన్ని ఇచ్చిందని వారు పేర్కొన్నారు.
