రైలు ప్రయాణికులకు శుభవార్త... ఆ సూపర్ ఫాస్ట్, ఎక్స్‌ప్రెస్ రైళ్లు ఇకపై అక్కడా ఆగుతాయి!

శ్రీకాకుళం - బెంగళూరు ప్రయాణం ఇక సులభం…

ఇచ్ఛాపురంలో ఆగనున్న మరో 4 కొత్త రైళ్లు…

వలస కార్మికులకు వరం..

శ్రీకాకుళం జిల్లాలోని ఇచ్ఛాపురం, సోంపేట మరియు బారువ రైల్వే స్టేషన్లలో ప్రయాణికుల సౌకర్యార్థం రైల్వే శాఖ పలు కీలక రైళ్లకు కొత్తగా స్టాపింగ్ సౌకర్యం కల్పించింది. స్థానిక ప్రజాప్రతినిధుల వినతులు మరియు ప్రయాణికుల రద్దీని దృష్టిలో ఉంచుకుని ఈ నిర్ణయం తీసుకున్నారు. దీనివల్ల ఉత్తరాంధ్ర ప్రయాణికులకు, ముఖ్యంగా సుదూర ప్రాంతాలకు వెళ్లే వారికి ఎంతో ప్రయోజనం చేకూరనుంది.

ఇచ్ఛాపురం రైల్వే స్టేషన్‌లో ఇప్పటికే 19 రైళ్లు ఆగుతుండగా, తాజాగా మరో 4 కొత్త రైళ్లకు హాల్ట్ ఇచ్చారు. ఇందులో అమృత్‌భారత్ (రాధికాపూర్ - బెంగళూరు), న్యూ జల్పాయ్‌గురి - నాగర్‌కోయిల్ అమృత్‌భారత్ వీక్లీ, న్యూ జల్పాయ్‌గురి - తిరుచ్చిరాపల్లి అమృత్‌భారత్ వీక్లీ మరియు అహ్మదాబాద్ - పూరి ఎక్స్‌ప్రెస్‌లు ఉన్నాయి. వలస వెళ్లే మత్స్యకారులకు మరియు వ్యాపారులకు ఈ రైళ్లు ఎంతో ఉపయోగపడతాయి.

సోంపేట రైల్వే స్టేషన్‌లో కూడా మూడు కొత్త అమృత్‌భారత్ రైళ్లకు స్టాపింగ్ సౌకర్యం కల్పించారు. గతంలో ఇక్కడ మంగుళూరు వివేక్ ఎక్స్‌ప్రెస్, గరీబ్ రథ్ వంటి రైళ్లు మాత్రమే ఆగేవి. ఇప్పుడు బెంగళూరు మరియు తమిళనాడు వైపు వెళ్లే సూపర్ ఫాస్ట్ రైళ్లు కూడా ఆగడంతో స్థానికులు హర్షం వ్యక్తం చేస్తున్నారు.

చిన్న రైల్వే స్టేషన్ అయిన బారువలో సాధారణంగా ప్యాసింజర్ రైళ్లు మాత్రమే ఆగుతాయి. కానీ తాజాగా, భువనేశ్వర్ - విశాఖపట్నం ఇంటర్‌సిటీ సూపర్ ఫాస్ట్ ఎక్స్‌ప్రెస్‌కు ఇక్కడ హాల్టింగ్ ఇవ్వడం విశేషం. దీనివల్ల బారువ పరిసర ప్రాంతాల ప్రజలు విశాఖపట్నం లేదా ఒడిశా వైపు సులభంగా ప్రయాణించే అవకాశం కలిగింది.

ఈ కొత్త స్టాపింగ్‌లు ప్రయోగాత్మకంగా (Experimental Halts) ప్రారంభమయ్యాయి. ప్రయాణికుల ఆదరణ మరియు టికెట్ విక్రయాల ఆధారంగా ఈ స్టాపింగ్‌లను శాశ్వతం చేసే అవకాశం ఉంది. శ్రీకాకుళం జిల్లాలోనే కాకుండా ఆంధ్రప్రదేశ్‌లోని మరికొన్ని చిన్న స్టేషన్లలో కూడా ప్రముఖ రైళ్లకు హాల్టింగ్ ఇచ్చే దిశగా రైల్వే శాఖ కసరత్తు చేస్తోంది.