ఆంధ్రప్రదేశ్ ప్రభుత్వం డ్వాక్రా మహిళలకు మరో శుభవార్త అందించింది. మహిళలకు ఆర్థిక భరోసా కల్పించి, స్వయం ఉపాధిని పెంపొందించడానికి పలు కీలక నిర్ణయాలు తీసుకుంది. రాష్ట్రంలో ఆహార శుద్ధి పరిశ్రమలు పెట్టాలనుకునే వారికి ప్రోత్సాహకాలను అందించేందుకు ముందుకొచ్చింది. ముఖ్యంగా పచ్చళ్ళు, పిండివంటలు, పశువుల దాణా వంటి పరిశ్రమలకు ప్రత్యేక రాయితీలు ఇవ్వాలని నిర్ణయించింది. ఈ చర్యల వల్ల గ్రామీణ ప్రాంతాల్లో చిన్న పరిశ్రమలు విస్తరించి, మహిళలు వ్యాపారంలో ముందుకు సాగే అవకాశాలు పెరుగుతాయి.
సూక్ష్మ ఆహార శుద్ధి పరిశ్రమల ఏర్పాటుకు ప్రభుత్వం ప్రత్యేక సహాయం అందిస్తోంది. కేవలం 10 శాతం పెట్టుబడి పెడితే మిగతా మొత్తాన్ని ప్రభుత్వం ఋణంగా ఇస్తుంది. అదనంగా, ప్రధానమంత్రి సూక్ష్మ ఆహార శుద్ధి పరిశ్రమల క్రమబద్ధీకరణ పథకం కింద 35 శాతం వరకు రాయితీని అందిస్తుంది. ఈ పథకం ద్వారా గరిష్టంగా 10 లక్షల వరకు సబ్సిడీ పొందవచ్చు. దీంతో, తక్కువ పెట్టుబడితో ఎక్కువ స్థాయిలో పరిశ్రమలు ప్రారంభించే అవకాశం లభిస్తుంది.
డ్వాక్రా మహిళలకు రుణాలపై ప్రత్యేక రాయితీలు కల్పించబడ్డాయి. వారు రుణం తీసుకుని 35% సబ్సిడీతో తమ పరిశ్రమలను విస్తరించుకునే వీలుంటుంది. ప్రభుత్వం మహిళలను వ్యాపారంలోకి ప్రోత్సహిస్తూ, ఈ అవకాశాన్ని సద్వినియోగం చేసుకోవాలని సూచిస్తోంది. రాష్ట్రంలో 5 లక్షల లోపు పెట్టుబడితో పచ్చళ్ళు, పొడులు, చిప్స్, కేకులు, అప్పడాలు, ఇడ్లీ, దోశ పిండులు, ఫ్లేవర్డ్ మిల్క్ వంటి యూనిట్లు ప్రారంభించవచ్చు.
ఇక 5 నుంచి 10 లక్షల పెట్టుబడితో నూనెలు, కెచప్, సాస్, జెల్లీ, పప్పు మిల్లులు వంటి యూనిట్లు ఏర్పాటు చేయవచ్చు. మరికొంచెం ఎక్కువ పెట్టుబడిగా 10 నుంచి 20 లక్షల మధ్య పెట్టేవారు పన్నీర్, జామ్, చీజ్, చాక్లెట్స్, పశువుల దాణా, కాఫీ ప్రాసెసింగ్ యూనిట్లు వంటి పరిశ్రమలు ప్రారంభించవచ్చు. ఇలా వివిధ స్థాయిల్లో పెట్టుబడులు పెట్టి మహిళలు తమ వ్యాపారాలను విస్తరించుకునే అవకాశం ఉంటుంది.
ఈ పథకాలకు దరఖాస్తు చేయాలనుకునేవారు http://pmfmeap.org/ వెబ్సైట్ ద్వారా వివరాలు సమర్పించాలి. అవసరమైతే జిల్లా లేదా మండల అధికారులను సంప్రదించి సమాచారం పొందవచ్చు. కేంద్ర, రాష్ట్ర ప్రభుత్వాలు తీసుకొచ్చిన ఈ పథకాలు మహిళలకు, ముఖ్యంగా డ్వాక్రా మహిళలకు ఆర్థిక స్వయం సమృద్ధి సాధించడానికి ఎంతో ఉపయోగకరంగా నిలుస్తాయి.
