అమరావతి ప్రాంతంలో రైల్వే లైన్ కోసం భూసేకరణ చేపట్టే ప్రక్రియ మొదలైంది. ఇందుకు సంబంధించి అధికారాలు నోటిఫికేషన్ జారీ చేశారు. అయితే, ఈ ప్రక్రియపై కొప్పురావూరు ప్రాంతానికి చెందిన కొంతమంది రైతులు అభ్యంతరాలు వ్యక్తం చేశారు. వారు తమ ధ్రువీకరణ పత్రాలతో గుంటూరులోని జాయింట్ కలెక్టర్ ఎదుట హాజరై, తమ అభ్యంతరాలను అధికారులకు తెలియజేశారు. అధికారులు ఈ అభ్యంతరాలను అధికారికంగా నమోదు చేశారు.
ఈ సందర్భంగా అమరావతి రైతులు మీడియాతో మాట్లాడారు. రైల్వే లైన్ నిర్మాణానికి భూములు ఇవ్వడానికి తాము సిద్ధమే అని స్పష్టం చేశారు. కానీ, ఎంత నష్టపరిహారం (Compensation) ఇవ్వనున్నారో, భూములు ఇచ్చిన వారికి రిటర్నబుల్ ప్లాట్స్ ఎక్కడ ఇస్తారు అనే వివరాలను ప్రభుత్వం స్పష్టంగా ప్రకటించాలి అని డిమాండ్ చేశారు.
కొన్ని ప్రాంతాల్లో డబుల్ రిజిస్ట్రేషన్‌లు జరిగాయని ఆరోపిస్తూ, న్యాయపరమైన సమస్యలు ఉన్న చోట నిజమైన భూ యజమానిని గుర్తించి మాత్రమే భూములు తీసుకోవాలని సూచించారు. జాయింట్ కలెక్టర్ తమ సమస్యలను పరిష్కరిస్తారని ఆశిస్తున్నామని తెలిపారు. అలాగే, రాష్ట్ర ప్రభుత్వం రైతులకు అనుకూలంగా నిర్ణయం తీసుకుంటుందని విశ్వాసం వ్యక్తం చేశారు.
