ఆంధ్రప్రదేశ్ ఉపముఖ్యమంత్రి పవన్ కళ్యాణ్ పుట్టపర్తి ప్రజలకు శుభవార్త చెప్పారు. భగవాన్ శ్రీ సత్యసాయి బాబా శత జయంతి వేడుకల సందర్బంగా, పుట్టపర్తిలో రహదారుల అభివృద్ధికి అదనంగా రూ.30 కోట్లు కేటాయించారు. ఈ నిధులను పంచాయతీ రాజ్ శాఖ ద్వారా విడుదల చేయాలని నిర్ణయం తీసుకున్నారు. భక్తుల రాకపోకలకు ఎటువంటి ఇబ్బంది లేకుండా ఉండాలని పవన్ కళ్యాణ్ అధికారులకు ఆదేశించారు.
శ్రీ సత్యసాయి సెంట్రల్ ట్రస్ట్ మేనేజింగ్ ట్రస్టీ రత్నాకర్ మరియు ఇతర సభ్యులు, పవన్ కళ్యాణ్‌ను అధికారికంగా శత జయంతి వేడుకలకు ఆహ్వానించారు. ఈ సందర్భంగా ఆయన, ప్రధాని నరేంద్ర మోదీతో కలిసి నవంబర్ 19న జరిగే వేడుకలకు హాజరవుతానని తెలిపారు. పుట్టపర్తి అభివృద్ధి కోసం ప్రభుత్వం అన్ని విధాలా కృషి చేస్తుందని చెప్పారు.
శత జయంతి వేడుకల నేపథ్యంలో పుట్టపర్తి నియోజకవర్గంలో మౌలిక వసతుల అభివృద్ధిపై పవన్ కళ్యాణ్ ప్రత్యేక దృష్టి పెట్టారు. రోడ్లు, పారిశుద్ధ్యం, విద్యుత్, నీటి సదుపాయాలపై కూడా సమగ్ర ప్రణాళికలు రూపొందిస్తున్నట్లు ఆయన తెలిపారు. ఈ ప్రాంతానికి ఐటీ పార్క్ ఏర్పాటుకు కూడా ప్రణాళికలు సిద్ధం అవుతున్నాయని సమాచారం. దీంతో ఆ ప్రాంత అభివృద్ధి దిశగా పెద్ద అడుగు పడనుంది.
అదేవిధంగా, సత్యసాయి ట్రస్టు సభ్యులు తెలంగాణ ముఖ్యమంత్రి రేవంత్ రెడ్డిని కూడా శత జయంతి వేడుకలకు ఆహ్వానించారు. హైదరాబాద్‌లో జరిగిన సమావేశంలో రేవంత్ రెడ్డి, సత్యసాయి ట్రస్టు చేస్తున్న సేవలను ప్రశంసించారు. ముఖ్యంగా తాగునీరు, విద్య, వైద్య రంగాల్లో ట్రస్టు అందిస్తున్న సేవలు ఎంతో అభినందనీయం అని పేర్కొన్నారు.
ఈ నిర్ణయం పుట్టపర్తి ప్రజల్లో ఆనందాన్ని రేపింది. రాబోయే నెలల్లో పుట్టపర్తి కొత్త రోడ్లతో మెరిసిపోనుంది. సత్యసాయి బాబా శత జయంతి వేడుకలు రాష్ట్రానికి ప్రతిష్ఠాత్మకమైనవిగా నిలవనున్నాయి. పవన్ కళ్యాణ్ తీసుకున్న ఈ నిర్ణయం ఆ ప్రాంత అభివృద్ధికి కొత్త ఊపుని తీసుకురానుంది.
