ప్రపంచవ్యాప్తంగా అత్యధికంగా ఉపయోగించే మెసేజింగ్ యాప్‌ వాట్సప్ మరోసారి వినియోగదారుల అనుభవాన్ని మారుస్తూ ముందుకు వస్తోంది. ఈసారి ‘క్రాస్ ప్లాట్ఫామ్ చాట్ ఫీచర్‌’ పేరుతో వినూత్న సదుపాయాన్ని ప్రవేశపెట్టేందుకు సిద్ధమైంది. దీని ద్వారా యూజర్లు ఇకపై ఇతర మెసేజింగ్ యాప్‌ల (టెలిగ్రామ్‌, సిగ్నల్, గూగుల్ మెసేజెస్‌ వంటి) నుండి వచ్చే సందేశాలను వాట్సప్‌లోనే నేరుగా చూడగలరు. అంతేకాక, వాట్సప్ నుంచే ఆ యాప్‌లకు మెసేజ్‌లు పంపే అవకాశం కూడా లభిస్తుంది. యూరోపియన్‌ యూనియన్‌ (EU) తీసుకొచ్చిన డిజిటల్‌ మార్కెట్స్‌ యాక్ట్‌ (DMA) నిబంధనల ప్రకారం మెటా సంస్థ ఈ మార్పులు చేపడుతోంది.
ఈ ఫీచర్‌ ప్రస్తుతం పరీక్షల దశలో ఉందని, 2026 నాటికి అధికారికంగా అందుబాటులోకి వచ్చే అవకాశం ఉందని వాబీటా ఇన్ఫో నివేదిక వెల్లడించింది. ఈ ఫీచర్‌ ద్వారా యూజర్లు ఇతర యాప్‌లకు ఫోటోలు, వీడియోలు, వాయిస్‌ నోట్స్‌, డాక్యుమెంట్లు వంటివి పంపగలరు. అయితే, వాట్సప్‌కి ప్రత్యేకమైన స్టేటస్‌ అప్‌డేట్లు, డిసప్పియరింగ్‌ మెసేజ్‌లు, స్టిక్కర్లు వంటి ఫీచర్లు మాత్రం థర్డ్‌ పార్టీ యాప్‌లకు వర్తించవు. ఈ మార్పు యూజర్ల మధ్య ప్లాట్ఫామ్ అవరోధాలను తొలగించి, మెసేజింగ్ ప్రపంచాన్ని ఒకే దారిలో కలపనున్నదని టెక్‌ నిపుణులు భావిస్తున్నారు.
ఈ క్రాస్ ప్లాట్ఫామ్ చాట్ ఫీచర్‌ వినియోగదారులకు పూర్తిగా ఐచ్చికం (Optional). దీన్ని యాక్టివేట్‌ చేయాలంటే యూజర్లు వాట్సప్ సెట్టింగ్స్‌లోని Account → Third-party chats అనే విభాగంలోకి వెళ్లి ఆ ఆప్షన్‌ ఆన్‌ చేసుకోవాలి. తర్వాత వినియోగదారులు తమ సందేశాలను “Combined Inbox” లేదా “Separate Inbox” రూపంలో చూడవచ్చు. Combined ఎంపికలో వాట్సప్ మరియు ఇతర యాప్‌ల మెసేజులు ఒకేచోట కనిపిస్తాయి. Separate ఎంపికలో థర్డ్‌ పార్టీ చాట్స్‌ ప్రత్యేక ఫోల్డర్‌లో భద్రంగా ఉంటాయి.
ఈ సౌకర్యం ముఖ్యంగా వ్యాపారులు, సోషల్ మీడియా మేనేజర్లు, మరియు బహుళ మెసేజింగ్ యాప్‌లను ఉపయోగించే యూజర్లకు ఎంతో ఉపయుక్తంగా మారనుంది. ఒకే ప్లాట్‌ఫామ్‌లో అన్ని మెసేజ్‌లను నిర్వహించడం ద్వారా సమయాన్ని ఆదా చేసుకోవచ్చు.
థర్డ్‌ పార్టీ యాప్‌లతో చాటింగ్‌ చేయడంలో కూడా వాట్సప్ తన ఎండ్‌-టు-ఎండ్‌ ఎన్‌క్రిప్షన్‌ భద్రతను కొనసాగిస్తుంది. అంటే, యూజర్‌ పంపిన లేదా స్వీకరించిన మెసేజ్‌లు మధ్యవర్తులచే చదవబడే ప్రమాదం ఉండదు. అయితే ప్రతి యాప్‌కి సొంత డేటా ప్రొటెక్షన్‌ విధానాలు ఉండవచ్చని వాట్సప్ స్పష్టంచేసింది. ఈ ఫీచర్‌ పూర్తిగా యూజర్‌ నియంత్రణలో ఉండటం వలన, ఎవరికి అవసరం లేని వారు దీన్ని డిసేబుల్‌ చేసుకోవచ్చు.
టెక్‌ నిపుణులు చెబుతున్నట్లుగా, ఇది మెసేజింగ్ ప్రపంచంలో పెద్ద పరివర్తనకు నాంది కానుంది. పలు యాప్‌ల మధ్య ఉన్న గోడలను తొలగించి, అన్ని ప్లాట్‌ఫామ్‌లను కలిపే దిశగా మెటా ముందడుగు వేసింది.
