హాల్ టికెట్ చూపిస్తే ఆర్టీసీ బస్సులో ఫ్రీ ప్రయాణం…
144 సెక్షన్ మధ్య ఇంటర్ వార్షిక పరీక్షలు…
ఎలక్ట్రానిక్ గ్యాడ్జెట్స్ పూర్తిగా నిషేధం..!
Inter Exams 2026: ఆంధ్రప్రదేశ్ (Andhra Pradesh)లో ఇంటర్మీడియట్ వార్షిక పరీక్షల నిర్వహణకు విద్యాశాఖ సమగ్ర ఏర్పాట్లు పూర్తి చేసింది. రాష్ట్రవ్యాప్తంగా సుమారు 10 లక్షల మంది విద్యార్థులు పరీక్షలకు హాజరుకానున్నారు. పరీక్షలు పారదర్శకంగా, ఎలాంటి అక్రమాలకు అవకాశం లేకుండా నిర్వహించేందుకు ప్రభుత్వం కఠిన నిబంధనలు అమలు చేస్తోంది. ప్రతి పరీక్షా కేంద్రంలో మౌలిక వసతులు సిద్ధం చేసి, అధికారులు ప్రత్యేక పర్యవేక్షణ చేపట్టాలని ఆదేశాలు జారీ చేశారు.
మాల్ప్రాక్టీస్ నివారణ కోసం ప్రతి గదిలో సీసీటీవీ కెమెరాలు ఏర్పాటు చేసి, వాటిని జిల్లా మరియు రాష్ట్ర స్థాయి కంట్రోల్ రూమ్లకు అనుసంధానించారు. మొబైల్ ఫోన్లు, స్మార్ట్ వాచ్లు వంటి ఎలక్ట్రానిక్ పరికరాలను కేంద్రాల్లోకి అనుమతించరు. పరీక్ష ప్రారంభమైన తర్వాత ఆలస్యంగా వచ్చే విద్యార్థులను అనుమతించబోమని స్పష్టం చేశారు. అందువల్ల విద్యార్థులు సమయానికి ముందే కేంద్రాలకు చేరుకోవాలని సూచించారు.
విద్యార్థుల రాకపోకలకు సౌకర్యంగా ఆర్టీసీ ప్రత్యేక బస్సులు నడుపుతోంది. హాల్ టికెట్ చూపిస్తే ఉచిత ప్రయాణ సదుపాయం కల్పించారు. పరీక్షా కేంద్రాల వద్ద 144 సెక్షన్ అమలు చేయడంతో పాటు సమీపంలోని జిరాక్స్ దుకాణాలను తాత్కాలికంగా మూసివేయాలని ఆదేశించారు. అత్యవసర సహాయం కోసం హెల్ప్లైన్ నంబర్లు కూడా అందుబాటులో ఉంచారు.
పరీక్షా నిర్వహణలో భాగంగా ఇన్విజిలేటర్లకు కూడా కఠిన మార్గదర్శకాలు జారీ చేశారు. ప్రశ్నపత్రాల రవాణా నుంచి జవాబు పత్రాల సేకరణ వరకు భద్రతా చర్యలు కట్టుదిట్టంగా అమలు చేస్తామని అధికారులు తెలిపారు. విద్యార్థులు ప్రశాంత వాతావరణంలో ఒత్తిడి లేకుండా పరీక్షలు రాయాలని, వారి భవిష్యత్తును దృష్టిలో ఉంచుకుని అన్ని జాగ్రత్తలు తీసుకున్నామని ప్రభుత్వం వెల్లడించింది.
