వంటింట్లో లెమన్ - లైమ్ వినియోగం…
పసుపు, ఆకుపచ్చ నిమ్మకాయల మధ్య అసలు తేడా ఏంటో తెలుసా?
విటమిన్ సి కోసం ఏ నిమ్మకాయ వాడాలి?
Lime Facts: నిమ్మకాయలు అనగానే మనందరికీ కేవలం పసుపు రంగులో ఉండే కాయలే గుర్తుకు వస్తాయి. కానీ మార్కెట్లో మనకు పసుపు రంగుతో పాటు ఆకుపచ్చ రంగులో ఉండే నిమ్మకాయలు కూడా కనిపిస్తుంటాయి. చాలామంది వీటిని కేవలం పచ్చివి, పండినవి అని అనుకుంటారు, కానీ వాస్తవానికి వీటి మధ్య చాలా తేడాలు ఉన్నాయి. పసుపు రంగులో ఉండే వాటిని 'లెమన్' (Lemon) అని, ఆకుపచ్చగా ఉండే చిన్న కాయలను 'లైమ్' (Lime) అని పిలుస్తారు. ఈ రెండూ కూడా సిట్రస్ జాతికి చెందినవే అయినప్పటికీ, వీటి రుచి, పరిమాణం మరియు పోషకాల విషయంలో స్పష్టమైన భేదాలు ఉంటాయి.
లెమన్ మరియు లైమ్ మధ్య ప్రధాన తేడా వాటి ఆకారం మరియు రంగులో కనిపిస్తుంది. లెమన్ కాయలు సాధారణంగా పరిమాణంలో పెద్దవిగా, కోడిగుడ్డు ఆకారంలో ఉండి ముదురు పసుపు రంగులో మెరుస్తుంటాయి. అదే లైమ్ కాయలు చిన్నవిగా, గుండ్రంగా ఉండి ముదురు ఆకుపచ్చ రంగులో ఉంటాయి. లెమన్స్ కొంచెం తియ్యటి పులుపును కలిగి ఉంటే, లైమ్స్ మాత్రం చాలా ఘాటైన పులుపును మరియు కొద్దిగా చేదు రుచిని కలిగి ఉంటాయి. అందుకే మనం వంటల్లో లేదా జ్యూసుల తయారీలో లెమన్ వాడితే, సలాడ్లు లేదా కాక్ టెయిల్స్ అలంకరణలో లైమ్స్ వాడుతుంటాం.
పోషక విలువల పరంగా చూస్తే ఈ రెండూ కూడా ఆరోగ్యానికి ఎంతో మేలు చేస్తాయి. రెండింటిలోనూ విటమిన్ సి సమృద్ధిగా ఉంటుంది. అయితే, లెమన్లో లైమ్ కంటే కొంచెం ఎక్కువ విటమిన్ సి మరియు పొటాషియం ఉంటుంది. లెమన్స్ మన శరీరంలోని రోగ నిరోధక శక్తిని పెంచడానికి మరియు చర్మ సౌందర్యానికి బాగా ఉపయోగపడతాయి. మరోవైపు లైమ్స్లో యాంటీ ఆక్సిడెంట్లు పుష్కలంగా ఉండి జీర్ణక్రియను మెరుగుపరచడంలో తోడ్పడతాయి. ఇవి రెండు కూడా బరువు తగ్గాలనుకునే వారికి మరియు శరీరంలోని వ్యర్థాలను బయటకు పంపాలనుకునే వారికి దివ్యౌషధంలా పనిచేస్తాయి.
వంటగదిలో వీటి వినియోగం కూడా భిన్నంగా ఉంటుంది. లెమన్ జ్యూస్ను ఎక్కువగా పానీయాల తయారీలో, స్వీట్లలో మరియు నాన్ వెజ్ వంటల్లో నీచు వాసన పోవడానికి ఉపయోగిస్తారు. లైమ్ జ్యూస్ను మాత్రం ఎక్కువగా థాయ్ లేదా మెక్సికన్ వంటల్లో, అలాగే పచ్చళ్ల తయారీలో ఉపయోగిస్తారు. లెమన్లోని పులుపు కొంచెం మెత్తగా ఉంటుంది, అదే లైమ్ లోని పులుపు నాలుకకు తగిలితే చురుకుమంటుంది. ఆహార పదార్థాల రుచిని పెంచడంలో ఈ రెండు తమదైన శైలిలో ప్రాధాన్యత కలిగి ఉంటాయి.
