చిత్తూరు జిల్లా ప్రజల చిరకాల కోరిక అయిన తిరుపతి-పాకాల-కాట్పాడి రైల్వే లైన్ డబ్లింగ్ పనులు త్వరలో మొదలుకానున్నాయి. రైల్వేశాఖ ఇటీవల నోటిఫికేషన్ జారీ చేయడంతో ఈ ప్రాజెక్ట్‌పై అధికారిక ప్రక్రియ వేగవంతమైంది. మొత్తం 104.39 కిలోమీటర్ల పొడవు గల ఈ రైల్వే లైన్‌ను డబుల్ చేయడానికి రూ.1,331.89 కోట్ల భారీ వ్యయం కేటాయించారు. డబ్లింగ్ పనులు పూర్తయితే ప్రయాణ సమయం సుమారు 24 నిమిషాలు తగ్గిపోతుందని అధికారులు తెలిపారు. ముఖ్యమంత్రి చంద్రబాబు నాయుడు ప్రత్యేకంగా చొరవ చూపడంతో ఈ పనులు వేగంగా ప్రారంభమవనున్నాయి.
ఈ రైల్వే లైన్‌కు సంబంధించి ఇప్పటికే కొన్ని దశల పనులు పూర్తయ్యాయి. తిరుపతి-పాకాల మధ్య సర్వే ముగిసింది, కానీ పాకాల-కాట్పాడి మార్గంపై ఇంకా తుది నిర్ణయం రావాల్సి ఉంది. తాజాగా చిత్తూరు జిల్లాతో పాటు తమిళనాడులోని వేలూరు జిల్లాలో భూసేకరణకు రైల్వేశాఖ నోటిఫికేషన్ ఇచ్చింది. రెవెన్యూ అధికారులు భూసేకరణ ప్రక్రియను వేగవంతం చేయాలని భావిస్తున్నారు. గతంలో కేంద్ర కేబినెట్ ఆమోదం తెలిపినా భూసేకరణలో ఆలస్యం జరిగింది. ఇప్పుడు నోటిఫికేషన్ జారీ కావడంతో పనులు త్వరలోనే ప్రారంభమవుతాయని అధికార వర్గాలు చెబుతున్నాయి.
ఈ లైన్ డబ్లింగ్ ప్రాజెక్ట్ పూర్తి అయితే రైళ్ల రద్దీ సమస్యకు పెద్ద ఎత్తున ఉపశమనం లభిస్తుంది. ప్రస్తుతం ఈ మార్గంలో రోజుకు 40కి పైగా రైళ్లు నడుస్తున్నాయి. ఒకే లైన్ ఉండటంతో ఎక్స్‌ప్రెస్ రైళ్లు వస్తే ప్యాసింజర్ రైళ్లు ఆగాల్సి వస్తోంది. చిత్తూరులో అనేక రైళ్లు నిలవకపోవడంతో ప్రయాణికులు తిరుపతి లేదా కాట్పాడి స్టేషన్లలో దిగాల్సి వస్తోంది. డబ్లింగ్ పనులు పూర్తి అయితే ఈ సమస్యలు తగ్గిపోవడంతో పాటు ప్రయాణికులకు సౌకర్యం పెరుగుతుంది. సమయపాలనతో రైళ్లు నడవడానికి వీలవుతుంది.
ఈ ప్రాజెక్ట్ చిత్తూరు, తిరుపతి జిల్లాల అభివృద్ధికి కీలకంగా మారనుంది. డబ్లింగ్ పూర్తయితే పర్యాటకంగా, పారిశ్రామికంగా ఈ ప్రాంతం మరింత పురోగతి సాధిస్తుంది. శ్రీసిటీ, రేణిగుంట, ఏర్పేడు ఇండస్ట్రియల్ క్లస్టర్లు, గూడూరు, సూళ్లూరుపేట పారిశ్రామికవాడలు రైల్వే సదుపాయాలతో మరింత బలోపేతం అవుతాయి. అదనంగా చిత్తూరు జిల్లా నుంచి గ్రానైట్, మామిడి వంటి ఉత్పత్తుల రవాణా సులభం కానుంది. ఇది రైతులకు, వ్యాపారులకు ఆర్థికంగా లాభదాయకం అవుతుందని అధికారులు అంచనా వేస్తున్నారు.
రైల్వేశాఖ ఆరు నుంచి ఎనిమిది నెలల్లో భూసేకరణ పూర్తి చేసి స్థలాన్ని అప్పగించాలని భావిస్తోంది. చిత్తూరు జిల్లాలో సర్వే వచ్చే ఏడాది మార్చి నాటికి పూర్తవుతుందని అంచనా. ఆ వెంటనే టెండర్లు పిలిచి డబ్లింగ్ పనులు మొదలు పెట్టనున్నారు. ముఖ్యమంత్రి చంద్రబాబు సొంత జిల్లా కావడంతో ఈ రైల్వే లైన్‌పై ప్రత్యేక దృష్టి పెట్టారు. కూటమి ప్రభుత్వం అధికారంలోకి వచ్చిన తర్వాత కేంద్రానికి ప్రత్యేక రిక్వెస్ట్ చేసి లైన్‌కు క్లియరెన్స్ తీసుకొచ్చారు. దీంతో చిత్తూరు జిల్లా ప్రజల చిరకాల స్వప్నం అయిన ఈ డబ్లింగ్ ప్రాజెక్ట్ సాకారం కాబోతోంది.
