భారత్–అమెరికా వాణిజ్య సంబంధాల్లో కొత్త చాప్టర్ మొదలుకానుందని అంతర్జాతీయ మీడియా వర్గాలు అంచనా వేస్తున్నాయి. అమెరికా అధ్యక్షుడు డొనాల్డ్ ట్రంప్ భారతదేశంపై విధించిన భారీ టారిఫ్ సుంకాలను తగ్గించే దిశగా చర్చలు వేగంగా సాగుతున్నాయని నివేదికలు వెల్లడిస్తున్నాయి. ప్రస్తుతం భారత్ నుంచి అమెరికాకు ఎగుమతి అవుతున్న పలు ఉత్పత్తులపై 50 శాతం వరకు సుంకాలు అమలులో ఉన్నాయి. రష్యా నుంచి చమురు దిగుమతుల కారణంగా ట్రంప్ ప్రభుత్వం అదనంగా 25 శాతం ప్రతీకార సుంకాలు విధించిన విషయం తెలిసిందే. అయితే, ఇరు దేశాల మధ్య వాణిజ్య ఒప్పందం కుదిరే అవకాశాలు కనిపిస్తున్న నేపథ్యంలో ఈ సుంకాలు 15 శాతం వరకు తగ్గే అవకాశం ఉందని అంతర్జాతీయ విశ్లేషకులు చెబుతున్నారు.
ఈ ఒప్పందంలో ప్రధానంగా రష్యా నుంచి భారత్ చేస్తున్న చమురు దిగుమతులే కీలక అంశంగా మారాయి. అమెరికా ఒత్తిడికి లోనై భారత్ రష్యా నుంచి చమురు దిగుమతులను దశలవారీగా తగ్గించేందుకు సిద్ధపడిందని సమాచారం. ప్రత్యామ్నాయంగా అమెరికా వ్యవసాయ ఉత్పత్తులను భారత మార్కెట్లోకి అనుమతించే అంశంపై చర్చలు సానుకూల దిశగా సాగుతున్నాయి. కేంద్ర ప్రధాన ఆర్థిక సలహాదారు వి. అనంత నాగేశ్వరన్ కూడా ఈ ఒప్పందం త్వరలో ఖరారవుతుందని, ఇరు దేశాల మధ్య సంతులిత వాణిజ్య సంబంధాలు ఏర్పడతాయని విశ్వాసం వ్యక్తం చేశారు.
ఇదిలా ఉంటే, అమెరికా అధ్యక్షుడు ట్రంప్ మాత్రం తమ వ్యవసాయ ఉత్పత్తులకు భారత మార్కెట్లో పెద్ద స్థాయిలో అవకాశాలు కల్పించాలని పట్టుబడుతున్నారు. అమెరికా రైతుల ఉత్పత్తులు — ముఖ్యంగా మొక్కజొన్న (Corn), సోయామీల్‌ (Soymeal) — భారత మార్కెట్లలోకి ప్రవేశించాలనే డిమాండ్‌పై ఆయన నిలబడ్డారు. ఈ అంశంపై ఇంతవరకు భారత్ స్పష్టమైన అంగీకారం తెలపకపోవడంతో చర్చలు కొన్ని దశలలో నిలిచిపోయాయి. అయితే తాజా చర్చల్లో ఇరు పక్షాలు కొంత సడలింపు చూపినట్లు తెలుస్తోంది. రష్యా చమురు దిగుమతుల తగ్గింపుతో పాటు అమెరికా ఉత్పత్తుల ఎగుమతిపై పరస్పర అర్థం చేసుకోవడమే ఈ ఒప్పందానికి దారితీస్తుందని నిపుణులు చెబుతున్నారు.
వాణిజ్య ఒప్పందం కుదిరితే, అమెరికా నుంచి మొక్కజొన్న, సోయామీల్‌ వంటి ఉత్పత్తులు భారత మార్కెట్లోకి వచ్చే అవకాశం ఉంది. అయితే, ఈ ఉత్పత్తులపై భారత్ 15 శాతం దిగుమతి సుంకం కొనసాగించే అవకాశం ఉందని వాణిజ్య వర్గాలు చెబుతున్నాయి. చైనా ఇప్పటికే అమెరికా వ్యవసాయ ఉత్పత్తుల దిగుమతులను తగ్గించుకున్న నేపథ్యంలో, ట్రంప్ ప్రభుత్వం తమ రైతుల ప్రయోజనాలను కాపాడే దిశగా భారత్ వంటి పెద్ద మార్కెట్లలో ప్రవేశం కోసం ప్రయత్నిస్తోంది. ఈ పరిణామాలతో భారత్–అమెరికా వాణిజ్య సంబంధాలు కొత్త దశలోకి అడుగుపెట్టనున్నాయనే అభిప్రాయం వ్యక్తమవుతోంది.
