- Technology: గూగుల్లో ప్రతిరోజూ బిలియన్ల కొద్దీ సెర్చ్లు.. ఈ కొత్త ఫీచర్ ద్వారా..
- ఈ విమర్శలపై గూగుల్ ప్రతినిధులు స్పందిస్తూ.. ప్రతి గంటకూ..
Google AI Overviews: గూగుల్ సెర్చ్ ఇంజిన్లో వస్తున్న 'AI ఓవర్వ్యూస్' ఫలితాలపై ప్రస్తుతం ప్రపంచవ్యాప్తంగా పెద్ద చర్చ జరుగుతోంది. మనం ఏదైనా విషయం గురించి గూగుల్లో వెతికినప్పుడు, పైన కనిపించే ఆర్టిఫిషియల్ ఇంటెలిజెన్స్ సమాధానాల్లో ప్రతి గంటకూ లక్షల కొద్దీ తప్పులు దొర్లుతున్నాయని తాజా నివేదికలు చెబుతున్నాయి. ఈ పరిణామం టెక్ ప్రపంచంలో సంచలనం సృష్టిస్తోంది.
ఆర్టిఫిషియల్ ఇంటెలిజెన్స్ రంగంలో గూగుల్ తీసుకొచ్చిన ఈ కొత్త ఫీచర్ ద్వారా వినియోగదారులకు నేరుగా జవాబులు లభిస్తాయి. అయితే ది న్యూయార్క్ టైమ్స్ చేసిన తాజా విశ్లేషణ ప్రకారం ఈ AI ఇచ్చే సమాధానాల్లో 90 శాతం వరకు కచ్చితత్వం ఉన్నప్పటికీ, మిగిలిన 10 శాతం సమాచారం తప్పుగా ఉంటోంది. గూగుల్లో ప్రతిరోజూ బిలియన్ల కొద్దీ సెర్చ్లు జరుగుతుంటాయి కాబట్టి, ఆ 10 శాతం తప్పులే దాదాపు గంటకు 5.7 కోట్ల తప్పుడు సమాధానాలకు దారితీస్తున్నాయని ఈ నివేదిక వెల్లడించింది.
ముఖ్యంగా జెమిని మోడల్ ఆధారంగా పనిచేసే ఈ సిస్టమ్, కొన్ని సందర్భాల్లో లేని విషయాలను ఉన్నట్లుగా భ్రమింపజేస్తోంది. గతంలో ఎయిర్ ఇండియా విమాన ప్రమాదానికి సంబంధించి గూగుల్ AI తప్పుడు సమాచారం ఇవ్వడంపై సోషల్ మీడియాలో పెద్ద ఎత్తున విమర్శలు వచ్చాయి. బోయింగ్ విమానానికి బదులు ఎయిర్బస్ అని చూపించడం వంటి పొరపాట్లు యూజర్లను అయోమయానికి గురిచేస్తున్నాయి.
ఈ విమర్శలపై గూగుల్ ప్రతినిధులు స్పందిస్తూ.. ఈ విశ్లేషణలో వాడిన పద్ధతులు సరిగ్గా లేవని కొట్టిపారేశారు. ఓపెన్ ఏఐ రూపొందించిన బెంచ్మార్క్ పరీక్షలను ఆధారంగా చేసుకుని ఈ నివేదిక ఇచ్చారని, అందులోనే కొన్ని లోపాలు ఉన్నాయని గూగుల్ వాదిస్తోంది. తమ సిస్టమ్స్ నిరంతరం మెరుగుపడుతున్నాయని, తప్పుడు సమాచారం రాకుండా జాగ్రత్తలు తీసుకుంటున్నామని సంస్థ పేర్కొంది.
సాధారణంగా మనం గూగుల్ను ఒక నమ్మదగ్గ సమాచార వనరుగా భావిస్తాము. కానీ AI నేరుగా సమాధానాలు ఇవ్వడం మొదలుపెట్టిన తర్వాత, ఆ సమాచార బాధ్యత కూడా గూగుల్ పైనే పడుతోంది. టెక్ నిపుణుల అభిప్రాయం ప్రకారం, AI ఇచ్చే సమాచారాన్ని కళ్లు మూసుకుని నమ్మకుండా, ఒకసారి క్రాస్ చెక్ చేసుకోవడం మంచిది. ముఖ్యంగా వార్తలు, గణాంకాల విషయంలో అప్రమత్తంగా ఉండాలని సూచిస్తున్నారు.
