ఆస్ట్రేలియాలో గత కొద్ది రోజులుగా ప్రకృతి తన కోపాన్ని చూపిస్తోంది. ముఖ్యంగా బ్రిస్బేన్‌ మరియు సౌత్‌ ఈస్ట్‌ క్వీన్స్‌ల్యాండ్‌ ప్రాంతాలు ఊహించని వాతావరణ మార్పులతో తీవ్ర ఇబ్బందులు ఎదుర్కొంటున్నాయి. భారీ వర్షాలు, ఉరుములు, మెరుపులతో పాటు వడగళ్ల వాన ఆ ప్రాంత ప్రజలకు గణనీయమైన నష్టం కలిగిస్తోంది.
ఇటీవల కురిసిన వడగళ్ల వానలో క్రికెట్‌ బంతి కంటే కూడా పెద్ద సైజులో వడగళ్ళు కురవడం సంచలనంగా మారింది. దాదాపు 9 సెం.మీ. సైజు ఉన్న వడగళ్ళు పడడంతో అనేక ఇళ్ల పైకప్పులు ధ్వంసమయ్యాయి, వాహనాల గ్లాస్ లు పగిలిపోయాయి, చెట్లు నేలకొరిగాయి. ఈ ఘటనలో కనీసం 9 మంది గాయపడినట్లు అధికారులు వెల్లడించారు.
ప్రజలు ఇబ్బందులు పడకుండా స్థానిక ప్రభుత్వం తక్షణ చర్యలు తీసుకుంది. ఎమర్జెన్సీ సేవలను యాక్టివ్‌ చేస్తూ రక్షణ బృందాలను పంపింది. భారీ గాలులు మరియు పిడుగుల కారణంగా విద్యుత్‌ సరఫరా నిలిచిపోయిన ప్రాంతాల్లో మరమ్మత్తు పనులు ప్రారంభమయ్యాయి. వాతావరణ శాఖ Very Dangerous Thunderstorm Warning జారీ చేస్తూ ప్రజలు ఇంట్లోనే ఉండాలని, వాహనాలను కవర్‌ ఉన్న ప్రదేశాల్లో ఉంచాలని సూచించింది. గాలి వేగం గంటకు 100 కిలోమీటర్ల వరకు నమోదవడంతో పలు ప్రాంతాల్లో విద్యుత్‌ తీగలు తెగిపోయాయి.
వాతావరణ నిపుణుల ప్రకారం, ఈ తీవ్రమైన తుపాను “సూపర్‌సెల్‌ స్టార్మ్‌”గా అభివృద్ధి చెందింది. వేడి గాలి మరియు అధిక తేమ కలిసి భారీ వడగళ్ల వానకు దారితీశాయి. మైసూర్‌, టువుంబా, ప్రాటెన్‌ ప్రాంతాలు ఎక్కువగా దెబ్బతిన్న ప్రాంతాలుగా గుర్తించారు.
గత వారం రోజులుగా క్వీన్స్‌ల్యాండ్‌లో వింత వాతావరణ పరిస్థితులు కనిపిస్తున్నాయని, రాబోయే రోజుల్లో మరల భారీ వర్షాలు, ఉరుములు, పిడుగులు పడే అవకాశం ఉందని వాతావరణ శాఖ హెచ్చరించింది. అధికారులు ప్రజలను అప్రమత్తంగా ఉండమని, అవసరమైతే సమీప సహాయ కేంద్రాలకు వెళ్లాలని సూచిస్తున్నారు.
ప్రస్తుతం ప్రభుత్వం మరియు అత్యవసర సిబ్బంది పరిస్థితిని సాధారణ స్థితికి తీసుకురావడానికి కృషి చేస్తున్నారు. ఈ వాతావరణ మార్పు ఆస్ట్రేలియా ప్రజలకు మరోసారి ప్రకృతి శక్తి ఎంత తీవ్రమైందో గుర్తు చేసింది.
