యూఎస్‌లో చదవాలని కలలు కనే భారతీయ విద్యార్థులకు వరుసగా షాక్‌లు తగులుతున్నాయి. వీసా ఇంటర్వ్యూలలో ఎలాంటి కారణం లేకుండానే వీసాలను తిరస్కరిస్తున్నారని పలువురు చెబుతున్నారు. తాజాగా ముంబైకి చెందిన ఒక విద్యార్థి కేవలం 40 సెకండ్లలోనే వీసా రిజెక్ట్ కావడంతో ఈ ఘటన దేశవ్యాప్తంగా చర్చనీయాంశమైంది.
ఇన్ఫర్మేషన్ టెక్నాలజీలో 9.15 CGPAతో డిగ్రీ పూర్తి చేసిన ఆ విద్యార్థి, ఉన్నత విద్య కోసం యూఎస్‌లోని టెంపుల్ యూనివర్సిటీలో అడ్మిషన్ పొందాడు. ముంబైలోని యూఎస్ కాన్సులేట్‌లో ఇంటర్వ్యూకు హాజరయ్యాడు. కాన్సులర్ అధికారి కేవలం రెండు ప్రశ్నలు మాత్రమే అడిగారు — “మీరు ఎప్పుడు డిగ్రీ పూర్తి చేశారు?” మరియు “ఏ యూనివర్సిటీలకు అప్లై చేశారు?”. అంతే, 40 సెకండ్లలోపే వీసాను రిజెక్ట్ చేశారు.
తర్వాత అధికారి విద్యార్థిని ఫింగర్‌ప్రింట్ స్కాన్ చేయమని చెప్పి తిరస్కరణ పత్రం అందించారు. ఆ స్లిప్‌లో “స్వదేశం (భారత్)తో బలమైన సంబంధాలు చూపలేకపోయారు” అని పేర్కొన్నారు. ఇది యూఎస్ వీసా చట్టంలోని సెక్షన్ 214(b) కింద సాధారణ కారణంగా చూపిస్తారు.
ఇటీవలి కాలంలో యూఎస్ వీసా కోసం ప్రయత్నిస్తున్న అనేకమంది విద్యార్థులు కూడా ఇలాంటి అనుభవాలను ఎదుర్కొంటున్నారు. ఇంటర్వ్యూలు కేవలం 30 నుంచి 40 సెకండ్లలో ముగిసిపోతున్నాయి. చదువు, కుటుంబం లేదా భవిష్యత్ ప్రణాళికల గురించి అడగకుండానే వీసాలను తిరస్కరిస్తున్నారని వారు చెబుతున్నారు. దీంతో చాలా మంది నిరాశ చెందుతున్నారు.
విద్యార్థుల సంఘాలు, విద్యా సలహాదారులు వీసా ఇంటర్వ్యూలలో పారదర్శకత ఉండాలని కోరుతున్నారు. యూఎస్ అధికారులు ప్రతి దరఖాస్తును వ్యక్తిగతంగా పరిశీలిస్తామని చెబుతున్నా, విద్యార్థులు తమ ఉద్దేశాన్ని వివరించుకునే అవకాశం ఇవ్వాలని కోరుతున్నారు. ఈ ఘటన యూఎస్‌లో చదవాలనుకునే వేలాది భారతీయ విద్యార్థులకు ఆందోళన కలిగిస్తోంది.
