- "24 గంటల ముందే రద్దు చేసుకుంటేనే 50% రిఫండ్": రైల్వే కొత్త నిబంధనల పూర్తి వివరాలు..
- Travel: దేశవ్యాప్తంగా దశలవారీగా కొత్త నిబంధనలు: ఏప్రిల్ 15 నాటికి పూర్తిస్థాయిలో అమలు..
Indian Railways: భారతీయ రైల్వే ప్రయాణికులకు నేటి నుంచి కొత్త నిబంధనలు అమల్లోకి వచ్చాయి. రైలు టికెట్ల రద్దు మరియు రిఫండ్ విధానంలో రైల్వే శాఖ కీలక మార్పులు చేస్తూ ఏప్రిల్ 1వ తేదీని ముహూర్తంగా నిర్ణయించింది. ఈ నూతన విధానం ప్రకారం, కన్ఫర్మ్ టికెట్ కలిగిన ప్రయాణికులు రైలు బయలుదేరడానికి 8 గంటల ముందుగా టికెట్ను రద్దు చేసుకుంటేనే రిఫండ్ పొందే అవకాశం ఉంటుంది. గతంలో ఈ గడువు 4 గంటలుగా ఉండగా, తాజా మార్పులతో ఆ సమయాన్ని 8 గంటలకు పెంచారు. అంటే, రైలు ప్రయాణానికి 8 గంటలలోపు టికెట్ రద్దు చేసుకుంటే ప్రయాణికులకు చెల్లించిన సొమ్ములో ఒక్క రూపాయి కూడా తిరిగి లభించదు.
ప్రయాణ సమయానికి 8 గంటల నుండి 24 గంటల మధ్యలో టికెట్ను రద్దు చేసినట్లయితే, టికెట్ ధరలో కేవలం 50 శాతం మాత్రమే రిఫండ్ రూపంలో అందుతుంది. ఒకవేళ 24 గంటల నుండి 72 గంటల ముందుగా రద్దు చేసుకుంటే, టికెట్ ధరలో 25 శాతం కోత విధించి మిగిలిన 75 శాతం మొత్తాన్ని ప్రయాణికులకు తిరిగి చెల్లిస్తారు. అయితే, ప్రయాణానికి 72 గంటల కంటే ముందే టికెట్ను రద్దు చేసుకునే వారికి ఉపశమనం కలిగిస్తూ, కేవలం సాధారణ రద్దు ఛార్జీలు మాత్రమే వసూలు చేయాలని రైల్వే శాఖ నిర్ణయించింది. ఈ నిబంధనల వల్ల ప్రయాణికులు తమ ప్రయాణ ప్రణాళికలను మరింత ముందుగానే ఖరారు చేసుకోవాల్సిన పరిస్థితి ఏర్పడింది.
ముఖ్యంగా టికెట్ ఏజెంట్లు మరియు దళారులు పెద్ద ఎత్తున టికెట్లను బ్లాక్ చేసి, చివరి నిమిషంలో రద్దు చేయడం వల్ల నిజమైన ప్రయాణికులకు జరుగుతున్న అన్యాయాన్ని అరికట్టేందుకే ఈ కఠిన నిర్ణయం తీసుకున్నట్లు రైల్వే అధికారులు వెల్లడించారు. ఈ విధానం ద్వారా చివరి నిమిషంలో బెర్తులు ఖాళీగా ఉండకుండా, అత్యవసరంగా ప్రయాణించాల్సిన వారికి లభ్యత పెరుగుతుందని వారు భావిస్తున్నారు. ఈ కొత్త రిఫండ్ నిబంధనలు ఏప్రిల్ 1 నుండి 15వ తేదీ వరకు దేశవ్యాప్తంగా దశలవారీగా అమలు కానున్నాయి. వేసవి ప్రయాణాల రద్దీ మొదలవుతున్న తరుణంలో, రైల్వే ప్రయాణికులు ఈ మార్పులను గమనించి తదనుగుణంగా వ్యవహరించాలని అధికారులు సూచిస్తున్నారు.
