న్యూజిలాండ్ ప్రభుత్వం అమలు చేస్తున్న “గోల్డెన్ వీసా” కు అనూహ్య స్పందన..
NZ$5 మిలియన్ పెట్టుబడితో రెసిడెన్సీ..
ప్రపంచవ్యాప్తంగా అనిశ్చిత పరిస్థితులు పెరుగుతున్న నేపథ్యంలో, విదేశీ పెట్టుబడిదారులు సురక్షితమైన, స్థిరమైన దేశాల వైపు మొగ్గుచూపుతున్నారు. ఈ క్రమంలో న్యూజిలాండ్ ప్రభుత్వం అమలు చేస్తున్న “గోల్డెన్ వీసా” కు అనూహ్య స్పందన లభిస్తోంది.
కొత్తగా సరళీకరించిన “యాక్టివ్ ఇన్వెస్టర్ ప్లస్ వీసా” (Active Investor Plus visa) కింద మార్చి 31 నాటికి 635 దరఖాస్తులు వచ్చాయి. ఇది పాత విధానంతో పోలిస్తే 500% కంటే ఎక్కువ పెరిగిందని అధికారులు తెలిపారు. గతంలో 2022 సెప్టెంబర్ నుంచి 2025 మార్చి వరకు కేవలం 115 దరఖాస్తులే వచ్చాయి.
ఈ వీసా ద్వారా కనీసం NZ$5 మిలియన్ పెట్టుబడి పెడితే రెసిడెన్సీకి మార్గం కల్పిస్తారు. వ్యాపారాలు లేదా ప్రభుత్వ అనుమతి పొందిన ఫండ్స్లో పెట్టుబడి పెట్టాలి. ముఖ్యంగా, ఈ వీసా కింద అర్హత సాధించిన తర్వాత NZ$5 మిలియన్ పైబడిన ఇళ్లను విదేశీయులు కొనుగోలు చేయడానికి కూడా అనుమతి ఉంటుంది—ఇది సాధారణంగా న్యూజిలాండ్లో విదేశీయులకు అందుబాటులో ఉండదు.
ఈ వీసా కోసం దరఖాస్తు చేసుకున్న వారిలో అమెరికా పౌరులు ముందంజలో ఉన్నారు. మొత్తం దరఖాస్తుల్లో దాదాపు మూడో వంతు అంటే 225 మంది అమెరికా నుండి వచ్చిన దరఖాస్తులు ఉన్నాయి. చైనా నుంచి 104, హాంకాంగ్ నుంచి 87, జర్మనీ నుంచి 46 దరఖాస్తులు వచ్చాయని అధికారులు వెల్లడించారు.
“ప్రజలు ఇప్పుడు భద్రత, స్థిరత్వం కోసం ప్రత్యామ్నాయాలను వెతుకుతున్నారు,” అని గ్రీనర్ పాస్చర్స్ న్యూజిలాండ్ సంస్థ ప్రతినిధి తెలిపారు. మంచి జీవన విధానం, రాజకీయ స్థిరత్వం, భద్రత—ఇవే ప్రధాన ఆకర్షణలు. 2019లో సెమీ-ఆటోమేటిక్ ఆయుధాలపై నిషేధం విధించిన తర్వాత దేశ భద్రతపై విశ్వాసం మరింత పెరిగింది.
ఈ వీసా ప్రాసెస్ సాధారణంగా నాలుగు నెలల వరకు పడుతుంది. దరఖాస్తుదారులు తమ ఆస్తుల మూలాలను నిరూపించాలి, ఆరోగ్య పరీక్షలు పూర్తి చేయాలి. ఆ తర్వాత ఆరు నెలల్లో పెట్టుబడి పెట్టాల్సి ఉంటుంది. కనీసం మూడు సంవత్సరాలు ఆ పెట్టుబడిని కొనసాగించాలి.
ఆశ్చర్యకరంగా, ఈ వీసా తీసుకునే వారిలో కేవలం 30% మాత్రమే శాశ్వతంగా అక్కడ నివసించాలని భావిస్తున్నారు. మిగిలిన వారు “ఒక సురక్షిత స్థలం”గా మాత్రమే చూస్తున్నారు. సంవత్సరంలో కొన్ని నెలలు మాత్రమే అక్కడ గడపాలని ప్లాన్ చేస్తున్నారు.
న్యూజిలాండ్లోని ఔక్లాండ్, క్వీన్స్ టౌన్ వంటి ప్రాంతాలు విదేశీ కొనుగోలుదారుల తొలి ఎంపికగా మారాయి. ముఖ్యంగా అమెరికా నుంచి రోజుకు 3-4 ఇళ్లపై విచారణలు వస్తున్నాయని రియల్ ఎస్టేట్ నిపుణులు చెబుతున్నారు.
అలాగే నెల్సన్, క్రైస్ట్ చర్చ్ వంటి ప్రాంతాల్లో NZ$5 మిలియన్తో అత్యుత్తమ ఇళ్లు కొనుగోలు చేసే అవకాశం ఉందని నిపుణులు సూచిస్తున్నారు.
డిమాండ్ పెరిగినా ఇప్పటివరకు ఇళ్ల ధరలపై పెద్దగా ప్రభావం కనిపించలేదు. ఆక్లాండ్లో సగటు ఇంటి ధర NZ$1.01 మిలియన్గా ఉంది. క్వీన్స్ టౌన్లో ఇది NZ$1.92 మిలియన్ వరకు ఉంది.
ఈ పెట్టుబడిదారులు కేవలం డబ్బు మాత్రమే కాకుండా, తమ నైపుణ్యాలు, అనుభవం, నెట్వర్క్లను కూడా తీసుకువస్తున్నారని నిపుణులు అంటున్నారు. స్థానిక వ్యాపారాలకు మద్దతు ఇచ్చి, సమాజంలో భాగస్వాములు అవుతున్నారని చెబుతున్నారు.
న్యూజిలాండ్ గోల్డెన్ వీసా పథకం పెట్టుబడిదారులకు ఆకర్షణీయమైన అవకాశంగా మారుతుండగా, దేశ ఆర్థికాభివృద్ధికి కూడా ఇది బలమైన పునాది వేస్తోంది. భవిష్యత్తులో ఈ డిమాండ్ మరింత పెరిగే అవకాశాలు కనిపిస్తున్నాయి.
