- "అదొక పిచ్చి ఆలోచన": మెక్డొనాల్డ్స్ ప్రచారంపై మనసు మార్చుకున్న డొనాల్డ్ ట్రంప్..
- NRI: వైట్హౌస్లో బర్గర్ల హంగామా: సొంత ప్రచార కార్యక్రమంపైనే ట్రంప్ అసహనం..
Donald Trump: అమెరికా అధ్యక్షుడు డొనాల్డ్ ట్రంప్ తన విలక్షణమైన ప్రచార శైలితో మరోసారి వార్తల్లో నిలిచారు. తాను ఎంతగానో ప్రచారం చేసిన "టిప్స్పై పన్ను రద్దు" (No Tax on Tips) విధానాన్ని ప్రజల్లోకి తీసుకెళ్లడానికి ఆయన ఓవల్ ఆఫీస్ వేదికగా నిర్వహించిన ఒక కార్యక్రమం ఇప్పుడు రాజకీయ చర్చకు దారితీసింది. ఈ విధానం అమల్లోకి వచ్చి ఏడాది పూర్తయిన సందర్భంగా, డోర్డాష్ డెలివరీ డ్రైవర్ ద్వారా మెక్డొనాల్డ్స్ బర్గర్లను నేరుగా వైట్హౌస్కే తెప్పించుకుని అందరినీ ఆశ్చర్యపరిచారు. ఈ ప్రచారంలో భాగంగా అర్కాన్సాస్కు చెందిన షారన్ సిమన్స్ అనే డెలివరీ డ్రైవర్ బర్గర్లను అందించగా, ట్రంప్ ఆమెకు 100 డాలర్ల టిప్ ఇచ్చి మీడియా ముందు హడావిడి చేశారు. ఈ పాలసీ వల్ల ఆమె ఏడాదికి 11,000 డాలర్లు ఆదా చేసుకుందని వైట్హౌస్ వర్గాలు అప్పట్లో గొప్పగా ప్రకటించాయి.
అయితే, ఈ హంగామా జరిగిన కొద్ది రోజులకే లాస్ వెగాస్లో జరిగిన ఒక ర్యాలీలో ట్రంప్ చేసిన వ్యాఖ్యలు సొంత పార్టీ నేతలను సైతం విస్మయానికి గురిచేశాయి. రాజకీయాల్లో కొన్నిసార్లు ఇష్టం లేకపోయినా కొన్ని పనులు చేయాల్సి వస్తుందని, కానీ ఓవల్ ఆఫీస్కు బర్గర్లను డెలివరీ చేయించుకోవడం తనకు చాలా "చీప్గా", ఇబ్బందికరంగా అనిపించిందని ఆయన ఓపెన్గా ఒప్పుకున్నారు. గతంలో తాను సేఫ్టీ జాకెట్ వేసుకుని చెత్త ట్రక్కు ఎక్కడం, బర్గర్ షాపులో ఫ్రైస్ వడ్డించడం వంటివి కూడా కొంచెం వింతగా ఉండేవని, కానీ ప్రచారం కోసం అవి తప్పలేదని వ్యాఖ్యానించారు. తన సొంత ప్రచార కార్యక్రమాలను తానే బహిరంగంగా విమర్శించుకోవడం ట్రంప్ మార్క్ రాజకీయాలకు అద్దం పడుతోంది.
ఈ మొత్తం వ్యవహారంలో డెలివరీ డ్రైవర్ షారన్ సిమన్స్ చుట్టూ చెలరేగిన వివాదం మరో మలుపు తిరిగింది. ఆమె గతంలో నెవాడా నివాసిగా సాక్ష్యం చెప్పి, ఇప్పుడు అర్కాన్సాస్ డ్రైవర్గా కనిపించడంతో ఆమె నిజమైన డ్రైవరా లేక వైట్హౌస్ ఏర్పాటు చేసిన నటినా అనే అనుమానాలు సోషల్ మీడియాలో వ్యక్తమయ్యాయి. దీనిపై డోర్డాష్ ప్రతినిధి జూలియన్ క్రౌలీ స్పందిస్తూ, అది పక్కాగా ప్లాన్ చేసిన కార్యక్రమమేనని, అయితే షారన్ నిజమైన డ్రైవరేనని స్పష్టం చేశారు. కేవలం ఒక ముఖ్యమైన పాలసీ ప్రయోజనాలను వివరించడానికే ఈ ప్రచార చిత్రాన్ని రూపొందించినట్లు ఆయన వివరణ ఇచ్చారు.
