సినిమా డిజిటల్ భవిష్యత్తుపై సందేహాలు..
ప్రెస్ మీట్లో ఈ వార్తలపై స్పందించిన నటుడు కౌశిక్..
తమిళ స్టార్ హీరో దళపతి విజయ్ నటిస్తున్న భారీ చిత్రం జన నాయగన్ విడుదలపై ఇంకా స్పష్టత రాకపోవడంతో అభిమానుల్లో ఆసక్తి మరింత పెరుగుతోంది. మొదటగా ఈ సినిమాను పొంగల్ సందర్భంగా జనవరి 9న విడుదల చేయాలని ప్లాన్ చేశారు. అయితే సెన్సార్ సర్టిఫికేట్ పొందడంలో ఎదురైన అడ్డంకుల కారణంగా విడుదల వాయిదా పడింది.
అప్పటి నుంచి కొత్త రిలీజ్ తేదీపై నిర్మాతలు ఎలాంటి ప్రకటన చేయకపోవడంతో పలు వదంతులు సోషల్ మీడియాలో చక్కర్లు కొట్టాయి. ముఖ్యంగా ఈ సినిమా ఓటీటీ డీల్ రద్దయిందనే వార్తలు వేగంగా వ్యాపించాయి. దీంతో సినిమా డిజిటల్ భవిష్యత్తుపై సందేహాలు వ్యక్తమయ్యాయి.
ఈ నేపథ్యంలో నటుడు కౌశిక్ ‘కాకి సర్కస్’ సిరీస్ ప్రెస్ మీట్లో ఈ వార్తలపై స్పందించారు. సినిమా రిలీజ్ డేట్ ఇంకా ఫిక్స్ కాలేదని, అందుకే ఓటీటీ డీల్ కూడా ఇంకా ఫైనల్ కాలేదని స్పష్టం చేశారు. థియేట్రికల్ రిలీజ్ తర్వాత సాధారణంగా ఉండే 8 వారాల గ్యాప్ పెద్ద సమస్య కాదని, సినిమా విడుదలకు దగ్గరలోనే ఓటీటీ ప్లాన్స్ను నిర్ణయిస్తామని తెలిపారు.
ఈ వివరణతో ఓటీటీ డీల్ రద్దయిందనే ప్రచారానికి బ్రేక్ పడింది. ఇక సినిమా ఆలస్యానికి ప్రధాన కారణం సెన్సార్ సమస్యలేనని తెలుస్తోంది. ఒక దశలో మార్చి 9న విడుదల చేయాలని భావించినా, సెన్సార్ బోర్డు సభ్యుల్లో ఒకరు అనారోగ్యానికి గురవడంతో మళ్లీ వాయిదా పడింది. అనంతరం సెన్సార్ బోర్డు సినిమా చూసినట్టు సమాచారం ఉన్నప్పటికీ, సర్టిఫికేట్ వివరాలు ఇంకా వెల్లడి కాలేదు.
అదేవిధంగా, రాబోయే తమిళనాడు అసెంబ్లీ ఎన్నికలు కూడా సినిమా విడుదలపై ప్రభావం చూపుతున్నాయని సినీ వర్గాలు చెబుతున్నాయి.
ఈ చిత్రానికి ప్రత్యేకమైన ప్రాధాన్యం కూడా ఉంది. ఎందుకంటే ఇది విజయ్ చివరి సినిమా కావొచ్చని భావిస్తున్నారు. ఆయన ఇకపై పూర్తిగా రాజకీయాలపై దృష్టి సారించనున్నట్లు ప్రచారం జరుగుతోంది. ఈ కారణంగా జన నాయకన్ పై అభిమానుల్లో భారీ అంచనాలు నెలకొన్నాయి.
హెచ్. వినోత్ దర్శకత్వంలో రూపొందుతున్న ఈ భారీ బడ్జెట్ చిత్రంలో బాబీ డియోల్, పూజా హెగ్డే, ప్రకాశ్ రాజ్, గౌతమ్ మీనన్, మమిత బైజు, ప్రియమణి వంటి ప్రముఖ నటీనటులు కీలక పాత్రల్లో నటిస్తున్నారు.
మొత్తానికి, విడుదల తేదీపై ఇంకా క్లారిటీ రాకపోయినా, ఈ సినిమా ఎప్పుడు థియేటర్లలోకి వస్తుందా అని అభిమానులు ఆసక్తిగా ఎదురుచూస్తున్నారు. త్వరలోనే అధికారిక ప్రకటన వచ్చే అవకాశముందని సినీ వర్గాలు ఆశాభావం వ్యక్తం చేస్తున్నాయి.
