పండుగల సీజన్‌ వచ్చిందంటే షాపింగ్ హడావిడి తప్పదు. ఆన్లైన్ మరియు ఆఫ్‌లైన్‌ మార్కెట్లలో భారీ తగ్గింపులు, బంపర్ ఆఫర్లు, క్యాష్‌బ్యాక్‌లతో వినియోగదారులు షాపింగ్‌లో మునిగిపోతారు. అయితే ఇదే సమయంలో స్కామర్లు కూడా చురుకుగా మారుతారు. ఆకర్షణీయమైన డిస్కౌంట్లు, ఉచిత గిఫ్ట్‌లు, ఫేక్‌ వెబ్‌సైట్‌లతో ప్రజలను మోసం చేయడం పెరుగుతుంది. ఈ నేపథ్యంలో నేషనల్ పేమెంట్స్ కార్పొరేషన్ ఆఫ్ ఇండియా (NPCI) ప్రజలకు కొన్ని కీలక సూచనలు జారీ చేసింది. ఈ చిట్కాలను పాటిస్తే మీ డబ్బు సురక్షితంగా ఉంటుంది.
మొదటగా — ఎల్లప్పుడూ అధికారిక యాప్‌లు, వెబ్‌సైట్‌లు ద్వారానే షాపింగ్ చేయాలని NPCI సూచించింది. మోసగాళ్లు ఎక్కువగా ప్రసిద్ధ బ్రాండ్‌లను పోలిన ఫేక్‌ వెబ్‌సైట్‌లు, లింక్‌లు తయారు చేస్తారు. వాటి ద్వారా మీ బ్యాంక్‌, UPI, లేదా కార్డ్‌ వివరాలు దొంగిలించే ప్రమాదం ఉంటుంది. కాబట్టి ప్రమోషనల్ ఇమెయిల్స్‌, SMSలు లేదా వాట్సాప్‌ లింక్‌ల ద్వారా కొనుగోళ్లు చేయకూడదు. తెలియని మూలాల నుండి ఫైళ్లను డౌన్‌లోడ్ చేయడం, లింక్‌లపై క్లిక్ చేయడం కూడా ప్రమాదకరం. అవి హానికరమైన సాఫ్ట్‌వేర్‌తో మీ ఫోన్‌ లేదా ల్యాప్‌టాప్‌ను హ్యాక్ చేసే అవకాశముంది.
రెండవది — ఎప్పుడూ ప్లాట్‌ఫామ్‌లోనే చెల్లింపులు చేయండి. చాలా స్కామ్‌లు బాహ్య UPI IDలకు లేదా థర్డ్‌పార్టీ లింక్‌లకు డబ్బు పంపమని ఒత్తిడి చేస్తాయి. ఇది పూర్తిగా మోసం చేసే పద్ధతి. ఆన్లైన్ చెక్అవుట్ పేజీ ద్వారా మాత్రమే చెల్లింపులు పూర్తి చేయాలి, విక్రేత వివరాలు సరైందో లేదో చెక్‌ చేయాలి. అలాగే ఉచిత వోచర్లు, క్యాష్‌బ్యాక్‌లు లేదా ఫ్రీ గిఫ్ట్‌లు పేరుతో OTPలు, ఖాతా వివరాలు లేదా చిన్న “ఫీజులు” అడిగే సందేశాలపై నమ్మకూడదు. నిజమైన ఆఫర్లు ఎప్పుడూ వ్యక్తిగత సమాచారం లేదా ముందస్తు చెల్లింపులు కోరవు.
చివరిగా — OTPలు, అత్యవసర కాల్స్‌, అకౌంట్‌ బ్లాక్ నోటీసులు వంటి మెసేజ్‌లను చూసి ఆందోళన చెందకండి. బ్యాంకులు లేదా చెల్లింపు యాప్‌లు ఎప్పుడూ OTPలను అడగవు. స్కామర్లు తరచుగా “మీ చెల్లింపు విఫలమైంది”, “ఖాతా బ్లాక్ అవుతోంది” అని చెబుతూ OTP అడుగుతారు. ఇలాంటి సందర్భాల్లో ఒక్క క్షణం ఆగి ధృవీకరించండి. నిజమైన ప్లాట్‌ఫామ్‌లు ఎప్పుడూ భయపెట్టే లేదా ఒత్తిడి చేసే పద్ధతులను ఉపయోగించవు. పండుగ సీజన్‌లో షాపింగ్ ఆనందం కంటే ముందుగా మీ డిజిటల్ భద్రతను ప్రాధాన్యం ఇవ్వండి — NPCI సూచనలతో మీ డబ్బు సేఫ్‌గా ఉంచుకోండి.
