దేశవ్యాప్తంగా నకిలీ విశ్వవిద్యాలయాలపై యూనివర్సిటీ గ్రాంట్స్ కమిషన్ (యూజీసీ) కఠిన చర్యలు ప్రారంభించింది. యూజీసీ చట్టం ప్రకారం గుర్తింపు లేకుండా యూనివర్సిటీ పేరుతో పనిచేస్తున్న 22 సంస్థల జాబితాను కమిషన్ తాజాగా విడుదల చేసింది. ఈ జాబితాలో రెండు ఆంధ్రప్రదేశ్ రాష్ట్రానికి చెందిన సంస్థలు కూడా ఉన్నాయి.
యూజీసీ తెలిపిన ప్రకారం, ఈ సంస్థలకు డిగ్రీలు ప్రదానం చేసే అధికారం లేదని స్పష్టం చేసింది. అంటే, ఈ విశ్వవిద్యాలయాల ద్వారా పొందిన సర్టిఫికెట్లు ఉద్యోగాలకో, ఉన్నత విద్యకో ఉపయోగపడవని యూజీసీ హెచ్చరించింది. ఈ చర్య దిల్లీలోని కోట్లా ముబారక్‌పూర్ ప్రాంతంలోని ఇన్స్టిట్యూట్ ఆఫ్ మేనేజ్‌మెంట్ అండ్ ఇంజనీరింగ్ సంస్థకు సంబంధించిన ఒక కేసు తరువాత తీసుకున్నదని తెలిపింది. ఆ సంస్థకు కేంద్రం లేదా రాష్ట్ర ప్రభుత్వాల నుండి ఎలాంటి గుర్తింపు లేదని కమిషన్ స్పష్టం చేసింది.
యూజీసీ చట్టంలోని సెక్షన్ 2(ఎఫ్), 3 ప్రకారం, డిగ్రీలను ఇవ్వడానికి కేవలం గుర్తింపు పొందిన విశ్వవిద్యాలయాలకు మాత్రమే అధికారం ఉంటుందని పేర్కొంది. ఈ చట్టానికి వ్యతిరేకంగా పనిచేస్తున్న సంస్థల డిగ్రీలకు చట్టబద్ధమైన విలువ ఉండదని కమిషన్ నోటీసులో స్పష్టంగా తెలిపింది.
యూజీసీ విడుదల చేసిన జాబితా ప్రకారం, నకిలీ యూనివర్సిటీలు అత్యధికంగా దిల్లీలోనే ఉన్నాయని తేలింది — మొత్తం 10 సంస్థలు అక్కడ గుర్తించారు. రెండో స్థానంలో ఉత్తరప్రదేశ్ నాలుగు సంస్థలతో నిలిచింది. ఆంధ్రప్రదేశ్, కేరళ, పశ్చిమ బెంగాల్ రాష్ట్రాల్లో తలో రెండు నకిలీ యూనివర్సిటీలు ఉన్నాయి. మహారాష్ట్ర, పుదుచ్చేరిల్లో తలో ఒకటిగా ఉన్నాయి.
ఆంధ్రప్రదేశ్‌లో గుంటూరులోని క్రైస్ట్ న్యూ టెస్టమెంట్ డీమ్డ్ యూనివర్సిటీ (రెండు చిరునామాలతో) మరియు విశాఖపట్నంలోని బైబిల్ ఓపెన్ యూనివర్సిటీ ఆఫ్ ఇండియా యూజీసీ గుర్తించిన నకిలీ సంస్థల జాబితాలో ఉన్నాయి.
దిల్లీలోని నకిలీ యూనివర్సిటీలలో ఆల్ ఇండియా ఇన్స్టిట్యూట్ ఆఫ్ పబ్లిక్ అండ్ ఫిజికల్ హెల్త్ సైన్సెస్, కమర్షియల్ యూనివర్సిటీ లిమిటెడ్, యునైటెడ్ నేషన్స్ యూనివర్సిటీ, వొకేషనల్ యూనివర్సిటీ, ఇండియన్ ఇన్స్టిట్యూట్ ఆఫ్ సైన్స్ అండ్ ఇంజనీరింగ్, స్పిరిచువల్ యూనివర్సిటీ వంటి సంస్థలు ఉన్నాయి.
యూజీసీ చట్టంలోని సెక్షన్ 22 ప్రకారం, డిగ్రీ కోర్సులు నిర్వహించేందుకు, డిగ్రీలు ఇవ్వడానికి కేవలం గుర్తింపు పొందిన యూనివర్సిటీలకే అధికారం ఉంటుంది. ఈ నిబంధనను ఉల్లంఘిస్తూ అనధికారికంగా విద్యా కార్యక్రమాలు నిర్వహిస్తున్న సంస్థల్లో చేరవద్దని విద్యార్థులను యూజీసీ హెచ్చరించింది.
యూజీసీ సూచన ప్రకారం, విద్యార్థులు ఏదైనా విద్యాసంస్థలో చేరే ముందు ఆ సంస్థ గుర్తింపు ఉందో లేదో తప్పనిసరిగా తనిఖీ చేయాలి. అధికారిక వెబ్‌సైట్ లేదా ప్రభుత్వ ధృవీకరణ పత్రాల ద్వారా మాత్రమే విశ్వవిద్యాలయాల ప్రామాణికతను తెలుసుకోవాలని విద్యార్థులకు సూచించింది. ఈ చర్యల ద్వారా యూజీసీ దేశంలోని విద్యా ప్రమాణాలను కాపాడడమే కాకుండా, విద్యార్థుల భవిష్యత్తును రక్షించాలన్న ఉద్దేశ్యంతో ముందుకు సాగుతోంది.
