US Political Crisis: అమెరికా వ్యాప్తంగా నిరసన జ్వాలలు ఎగిసిపడుతున్నాయి. మిన్నెసోటా కేంద్రంగా మొదలైన ఈ ఆందోళనలు ఇప్పుడు దేశంలోని మొత్తం 50 రాష్ట్రాలకు చేరువయ్యాయి. ప్రస్తుత అధ్యక్షుడు ట్రంప్ తీసుకుంటున్న వివాదాస్పద నిర్ణయాలకు వ్యతిరేకంగా అమెరికన్లు రోడ్లపైకి వచ్చి తమ నిరసనను వ్యక్తం చేస్తున్నారు. చరిత్రలోనే ఇది అతిపెద్ద నిరసన కార్యక్రమంగా నిలిచిపోతుందని విశ్లేషకులు భావిస్తున్నారు.
దాదాపు 3,100కు పైగా నిరసన కార్యక్రమాలకు నిర్వాహకులు పిలుపునిచ్చారు. ఈ భారీ ఆందోళనల్లో సుమారు 90 లక్షల మందికి పైగా ప్రజలు పాల్గొంటారని అంచనా వేస్తున్నారు. ముఖ్యంగా మిన్నెసోటాలోని కాపాలిట్ లాన్ ప్రాంతం నిరసనకారులతో కిక్కిరిసిపోయింది. "నో కింగ్స్" (మాకు రాజులు వద్దు) అనే నినాదాలతో కూడిన ప్లకార్డులు పట్టుకుని, ప్రజాస్వామ్యాన్ని కాపాడాలని ప్రజలు డిమాండ్ చేస్తున్నారు. కేవలం అమెరికాలోనే కాకుండా, ప్రపంచవ్యాప్తంగా ఉన్న అమెరికన్లు కూడా ఈ పోరాటంలో భాగస్వాములవుతున్నారు.
ఐరోపా, లాటిన్ అమెరికా దేశాల్లో ట్రంప్నకు వ్యతిరేకంగా ర్యాలీలు నిర్వహిస్తున్నారు. పారిస్, రోమ్ వంటి నగరాల్లో వేల సంఖ్యలో ప్రజలు తరలివచ్చారు. "అమెరికా సైనికులు అమ్మకానికి లేరు" అంటూ నినదిస్తూ, ఇరాన్పై దాడులను తీవ్రంగా వ్యతిరేకిస్తున్నారు. ముఖ్యంగా "ఆపరేషన్ ఎపిక్ ఫ్యూరీ"ని నిరసిస్తూ అది "ఆపరేషన్ బ్లైండ్ ఫ్యూరీ" అని ఎద్దేవా చేస్తున్నారు.
న్యూయార్క్లో జరిగిన నిరసన కార్యక్రమంలో ప్రముఖ హాలీవుడ్ నటుడు రాబర్ట్ డినిరో పాల్గొని నిరసనకారుల్లో ఉత్సాహాన్ని నింపారు. వాషింగ్టన్లోని లింకన్ మెమోరియల్ నుండి నేషనల్ మాల్ వరకు భారీ ర్యాలీ జరిగింది. వలసదారుల పట్ల కఠినంగా వ్యవహరిస్తున్న అధికారులపై చర్యలు తీసుకోవాలని, అధికార మార్పిడి పద్ధతిగా జరగాలని నిరసనకారులు కోరుతున్నారు. అమెరికా ఆత్మను కాపాడుకోవడానికి ఇదే సరైన సమయమని వారు పిలుపునిస్తున్నారు.
ఈ నిరసనలపై వైట్ హౌస్ భిన్నంగా స్పందించింది. ఈ ఆందోళనలకు సామాన్య ప్రజల మద్దతు లేదని, కేవలం వామపక్ష శక్తుల ప్రేరేపణతోనే ఇవి జరుగుతున్నాయని కొట్టిపారేసింది. ప్రభుత్వం ఎన్ని విమర్శలు చేసినా, క్షేత్రస్థాయిలో మాత్రం నిరసనల హోరు తగ్గడం లేదు. అమెరికా చరిత్రలో ఇదొక కీలక మలుపుగా మారే అవకాశం కనిపిస్తోంది.
